الشفوت والمدرجات جاهزين… كيف ناس الإدارة واللاعبين

0
646

تغريده واتساب☀
بقلم : معاذ ابومؤيد
الشفوت والمدرجات جاهزين…
كيف ناس الإدارة واللاعبين

تبقى من الزمن ليلة واحدة والشفوت نفسهم يكونوا في الاستاد من اسه وكلهم عزيمة واصرار

???
في شفوت عملوا بروفات للالتراس
وفي شفوت جهزوا اللبس الموحد ناس الزي الموحد ديل ناس صفوة من اجل المريخ بقيادة اخونا هاشم لينا عودة ليهم قريب…..
وفي شفوت والله جهزوا البراميل وحق الموية والتلج للالتراس
وفي شفوت اعلنوا عن تذاكر مجانية للطلاب والمحتاجين
وفي شفوت جهزوا الالات الموسيقية
وفي شفوت جهزوا الحافلات من الاقاليم للعاصمة متوجهين
ديل الشفوت وكلامي دا واثق منو وبعرف المشرفين من الكلام دا كلو
مشرف مشرف وشفت شفت
وحنكتب اسماءهم كلهم
ويوم شكرهم مايجي…..

????
دا موقف المدرج والشفوت وانا اراهن عليهم زلزال الملاعب وعارفهم ماعايزين وصية لاشماريخ لا قاروة مياه غازية
ركزوا علي التشجيع وما تستعجلوا الانتصار

????
بس الشايفنو من الإدارة مافيه اي بشارة الناس ديل مصرين علي كل زول يغرد براهو مفتكرين نفسهم بيديروا في تويتر ولافيسبوك واحد يصرح منقولة والتاني ما منقولة والنيل الازرق تصرح وفرتكان يصرح والشتل يكتر شفتو عيب عدم وجود مكتب اعلامي
هو المشجع الشفت منتظركم مفتكرين تكونوابالغتو

شارع العرضة معروف للشفوت وتلفزتكم دي بتهم ناس معينة

???
راجعو حساباتكم وما تنالوا سخط ناس الاقاليم والمغتربين
والمغتربين ديل ياهم ناس رابطة الدوحة الانقذوا معسكراتكم
وناس الامارات العالجوا اصاباتكم
فهمتوا ولانعيد ليكم
الدفعوا المغتربين ليكم بيعادل دخل كل مباريات البطولة الأفريقية….
دفعوه من قوت اولادهم من اجل الكيان ديل هم الشريحة البتهمهم التلفزة من عدمها لو ماقدرتوهم تكونو خربتو العلاقات معاهم

???
واخبار مجلسكم الظهرت في الاعلام اليوم استمتعنا وفرحنا بخبر واحد الانتخابات شهر ابريل بس ما وريتونا اول ابريل ولا آخره عشان نستعد بحفله كاربة
اتخيلت نفسي في قروب واتساب وصحيت لقيت
لجنه التسير غادر……
بالله كلكم اتخيلوا المنظر دا
لجنه التسير غادر ……

???
نجي لللاعبين اها ماتنوموا علي العسل وتضمنوا النتيجة و بايرميونخ وراكم الطفى النور منو
يعني البطفي نوره من بدري واطته تصبح سريع
عشان كدة اكربوا نصكم والشفوت ديل يستاهلوا تضحياتكم عايزين اداء رجولي يشعلل المدرج
والدقسة فيها اللحسة
قون نيجيريا مايدقسكم

????
ختاما
كل الشفوت القلعة جوة
ومامحتاجين تلفزة ولا إذاعة
عارفين نفسهم عايزين شنو وعارفين شارع العرضة وين
وكل زول حافظ مكانو في الاستاد
???
ونحن علي المدرج وبنشجع
وتشجعينا لمدة تسعين دقيقة متواصلة
والبغلط اثناء المباراة دا سلموه لاقرب شرطي وواصلو تشجيعكم وماتشتغلوا بيه تاني
ركزوا علي التشجيع فقط هو طريقنا للصعود
واسمعو كلام الشفت دا لأنه اجمل تعليق مر علي في الواتس سالوه جاي الاستاد رد قال:
(ومن اسي بتغرغر بالملح عشان الكوراااااك )
فوق فووووق مريخنا فوق
فوق فووووق مريخنا فوق

???
خارج النص
يعني اسه كل همكم يا إدارة التلفزة
بالله دا هم اسه
شاركوا المدرج دا همه وماتنسوا مافيا التذاكر والدخول دا اهم من التلفزة
ممكن الحشد يكون خمسين الف والداخل خزينتكم حق عشرة الف
ظبطوا البوابات والتذاكر والدخول

???
نصيحة أخيرة
الموبايلات دي ممكن تشتغل تلفزة بس من غير إعادة
نوريكم كيف ولاحتمنعوا الموبايلات مع التلفزة 

 

تغريدة واتساب

المشاركة

أكتب رد

أدخل تعليقك من فضلك!
أدخل إسمك هنا من فضلك