صحيفة كورة سودانية الإلكترونية

الصاروخ (الصيني)!!!

3٬457

صابنها
الصاروخ (الصيني)!!!
محمد عبدالماجد
• لو الايام دي عندك (مغص) شديد ومصارينك بتقطّع فيك .. وبتشعر بي (لاواى) كدا ، و(لفة رأس) وبتشوف (الشبابيك) بتتحرك براها تنزل في نص الصالون وبترجع تاني !! والمراوح بتكلم في نفسها ، الموضوع دا ما (جرثومة معدة) ولا هو تهيأت … الموضوع دا عشان اكون واضح معاكم عندو علاقة بتسجيلات الهلال.
• بالصيني تحديدا.
• لا الحلبة ولا المحريب ولا الحرجل ممكن تشيل هذه الاعراض.
• اذا بتشعر بهذه الاعراض ، انت اكيد (مريخابي).
• شوفوا الكلام دا ما بقولو ليكم (دكتور) – الكلام دا ما بتلقوه إلّا هنا.
• احسن نقول ليكم الحقيقة .. بدل ما نقعد نجرجر ليكم.
• لو بتشعر بي (دوشة) … واي حاجة تأكلها بتستفرغها ، وبتدخل البيت تفتش عن (الموبايل) عشان تضرب الشفع بدل ما تضرب الموبايل ، وانت شائل الموبايل في ايدك ….الموضوع دا ما (ضربة شمس).
• الشمس ما عندها أي علاقة بالموضوع.
• ما تقعدوا تنططوا في عيونكم متل عناقريب الحبل.
• زي شعر حميد مرات بطلع ليك بي (نخرتك) زي البيبسي الجديد.
• الموضوع دا عشان تبقوا عارفين (ليليبو).
• قالوا ليك (ليليبو) بشيل الباكات في صفحتو وبدخل بيهم خط (18).
• لو ما بتنوم كويس.
• وما قاعد تاكل.
• وحارس التلفون.
• تخش الفيس وتطلع من الواتس.
• وبتفتش في (حالات) الواتس بالدس.
• الموضوع دا عشان تبقوا عارفين ما (حب).
• حب شنو بعد السن دي؟
• الموضوع دا (جاجو).
• جاجو دا بفلفل (الباكات) زي (الرز).
• زي الضل بخش 18 بي ماكينة الحلاقة.
• أي مدافع بلاقيه بحلق ليه.
• من هسع انا شائل هم صلاح نمر وكرشوم والجاكومي.
• غايتو السنة دي ناس المريخ لو مرقوا من التسجيلات دي ما بتجيهم أي عوجة.
• المرق منهم من (الكرونا) ما بمرق من التسجيلات دي.
• اول مرة افهم حكاية العقوبات الامريكية الاقتصادية على السودان وتقع عليّ.
• العليقي طبق العقوبات الاقتصادية الامريكية على المريخ.
• نادي عندو مجلسين ما قادر يحل مشكلة الصيني ويعيد تسجيل توني.
• لا حازم.
• ولا سوداكال.
• تتخيلوا الاتنين ديل اقصى حد عندهم (اسكندر).
• فرحانين بي اسكندر.
• وكاس (فضيل).
• ناس الهلال ديل (فنانين).
• كملوا الفن كله.
• عملوا أي شيء في المريخ.
• شلنا عبده الشيخ .. قالوا (مصاب) وما نافع.
• العملو عبده الشيخ في المريخ .. نجار في خشب ما عملو.
• سجلنا حمودة بشير .. قالوا نفس الشيء (مصاب).
• ما اتعلموا من درس عبده الشيخ.
• حمودة بشير أي (كورنر) بتعكس ليه قون.
• زمن حمودة بشير في الهلال الكورنر بي قون.
• سجلنا علاءالدين يوسف بدون بنج.
• لابنج كامل ولا موضعي.
• قلع من التشكيلة.
• وناس المريخ فرحانين بي (اسكندر).
• صلاح ادريس جاب علاءالدين فييرا من المريخ بعد ان تألق هذا اللاعب في اخر مباراة جمعت بين الهلال والمريخ في كاس السودان.
• فاز المريخ في تلك المباراة وكان فييرا نجم المباراة الاول .. شالوا الكاس وشلنا فييرا.
• ضربة فييرا لغاية الآن ناس المريخ بتهضرب بيهم.
• سجلنا جمال سالم .. ناس مزمل ابوالقاسم قالوا جمال سالم باقى في كشفو (11) يوما.
• ما ينقصوا ساعة.
• الوضوع ما بحسبوه كدا.
• الولادة ما كدا.
• سجلنا شيبوب .. (ودي اتجدع فيها الكاردينال) بعد ان عبر (4) مطارات دولية بدون جواز سفر.
• وقفز من الطابق الرابع.
• كيري ساكت.
• شيبوب قلعناه من (الكشف).
• من جوة البيت.
• ناس المريخ لغاية الآن ما فهامين الكلام دا تم كيف؟
• الموضوع ما وقع ليهم.
• دا شغل ما بقدروا يستوعبوه لينا.
• فييرا خلوه.
• شيبوب انسوه.
• التقليعة الجديدة عملها القليعي.
• المرة دي (فسخ) عديل.
• لا بنج.
• ولا الدعم السريع.
• الفلول قالوا تسجيل الصيني في الهلال ما صحيح.
• زي ما قالوا في جمال سالم.
• وقابيتو.
• واكرم الصلوي.
• بتعيدوا في ارشيفكم (المنيل) ستين نيلة ليه؟
• الدعم السريع هسع الدخلهم في الموضوع شنو؟
• حقارة كدا بس بدخل الدعم السريع.
• والفلول.
• فسخ بس.
• وكمان بندفع ليكم حقكم على دائر المليم .. عشان تبقى صافية لبن.
• اصلو ما عاوزين لينا حق زول.
• الصيني مشى الاتحاد قال عاوز يفسخ.
• وقال بدفع 20 مليار عشان يتخارج من المريخ.
• معقولة (الكراهية) للصيني بالمريخ وصلت لهذا الحد.
• درجة (الفسخ).
• ودفع (20) مليار جنيه عشان بس يطلع من المريخ.
• شكرا للنفطي.
• الصيني عاوز ليه (لوتري) عشان يمشي امريكا.
• اقصد يمشي الهلال.
• تاني شنو؟
• اشرحها ليكم كيف؟
• الصيني عشان يقطع الزلط دفع ليه (20) مليار.
• دا لوتري ولّا ما لوتري؟
• يا متعلمين يا بتاعين المدارس.
• قدر ما اقول ليكم ما ح تستوعبوها لي.
• انا يا دوب الكلام وقع ليّ.
• أثار خبر خروج الصاروخ الصينى “Long March 5B” عن السيطرة، الذعر لدى عدد من سكان العالم والمهتمين بعلوم الفضاء.
• الكلام دا كان في مايو الماضي.
• ناس المريخ الوقت داك (نائمين) .. ما جايبن خبر.
• انتوا فاكرين الصاروخ الصيني دا شنو؟
• الصاروخ الصيني دا عماد الصيني.
• إلّا يقولوها ليكم عديل كدا.
• ما بتفهموها (طائرة).
• الصاروخ الصيني خرج عن السيطرة زي عماد الصيني تماما.
• وفي هذا الإطار، أوضح رئيس المعهد القومي للبحوث الفلكية والجيوفيزيقية المصري، جاد القاضي، تفاصيل تداول المواقع العالمية والخاصة بالأقمار الصناعية خبر خروج هذا الصاروخ.
• وفي بيان له، كشف جاد القاضي إنه في الواقع أن هذا الصاروخ “تم فقدان السيطرة عليه، وهو في محاولة للعودة غير المنضبطة إلى الأرض بعد إطلاقه من محطة الفضاء الصينية، حيث إنه من المرجح أن يسقط جزء من الصاروخ الصيني “Long March 5B”، الذي تم استخدامه لإطلاق الوحدة الأولى لمحطة الفضاء الصينية الأسبوع الماضي إلى الغلاف الجوي للأرض في الأيام القادمة، ومن غير الواضح متى وأين سيهبط الحطام، بينما تشير البيانات المتاحة من مواقع مراقبة الأجسام الفضائية احتمالية دخوله للغلاف الجوي للأرض.
• من جانبها، وفي إطار الحديث عن تفاصيل هذا الخبر، شرحت الأستاذة المساعدة بقسم أبحاث الشمس والفضاء بالمعهد، سوزان صمويل، أن “الصين قد أطلقت أول وحدة لمحطة الفضاء الخاصة بها في المدار في وقت متأخر من يوم 28 أبريل 2021، حيث أطلق صاروخ “Long March 5B” بنجاح وحدة “Tianhe” التي تزن 22.5 طن من وينتشانغ، يوم الخميس بالتوقيت المحلي، وانفصل “Tianhe” عن الجسم الرئيسي للقاذفة بعد 492 ثانية من الطيران، ودخل مباشرة مداره الأول المخطط له”.
• الكلام دا قبل (الفسخ).
• تعالوا نشوف بعد (الفسخ).
• قولوا لناس الوكالة الصينية ديل (اعقدوا).
• اقصد (افسخوا).
• !!!!!
• قالت وكالة الفضاء الصينية إن حطام صاروخها الفضائي الخارج عن السيطرة والذي كان متجها نحو الأرض سقط في المحيط الهندي.
• وقع في (الهنود).
• زي ما حدث هنا تماما.
• !!!
• وقد تحطم الجزء الأكبر من الصاروخ أثناء دخوله الغلاف الجوي للأرض ، ولكن وسائل الإعلام المحلية قالت إن الحطام سقط الأحد الماضي غربي جزر المالديف.
• وكانت مواقع رصد أمريكية وأوروبية تتتبّع بقلق مسار صاروخ “المسيرة الطويلة 5B” الضخم الذي أطلقته الصين أواخر الشهر الماضي حاملا وحدة من محطة فضاء صينية قيد الإنشاء.
• وحذر مسؤولون أمريكيون وغيرهم من مخاطر الأضرار الذي قد يحدثها سقوط الصاروخ.
• لكن ناس المريخ ح يفهموا لينا الكلام.
• بي طريقتهم.
• ناس المريخ لغاية الآن موضوع شيبوب ما وقع ليهم … موضوع الصيني دا يقع ليهم كيف؟
• طيب ابسط ليكم الحكاية.
• عباس ود الكبج .. جاء داخل على جماعة سمعهم بتكلموا عن الصاروخ الصيني.
• ح يقع وين؟
• والسودان مهدد.
• والمحيط الهندي.
• والصاروخ خطر على العالم.
• والوكالة الروسية قالت شنو؟
• عباس ود الكبج .. حسب (الدوشة) البشعر بيها .. اعتبر الكلام عن عماد الصيني.
• يعني وقت يقولوا الصاروخ الصيني بتبقى ليه عماد الصيني.
• عباس ود الكبج .. وقف في نص الصالون …وعض العراقي بتاعو بي خشمو ، بي حرقة شديدة لمن بطنو ظهرت .. وقال ليهم والله انتوا ما عارفين أي حاجة .. الصاروخ الصيني وقع في رأسي دا.
• وقعد يكورك.
• ويقول في كلمات ما مفهومة.
• وراهم رأسو .. لقوه كل (فليق).
• شيء فييرا.
• وشيء جمال سالم.
• وشيء توني.
• وشيء شيبوب.
• وشيء الصيني.
• قالوا ليه يا زول انت عايش كيف؟ رأسك متل حلة الحلبة. جروا بيه على (الحوادث).
• حلة الحلة الدخلها في الموضوع شنو؟
• دخلوا بيه على الدكتور … الدكتور كتب ليه (فسخ).
• فسخ طوالي.
• وفسخ مستعجل كمان.
• ما عرفوا (الفسخ) دا يصرفوه من يأتو صيدلية؟
• المهم عشان ما اطول ليكم الكلام .. عباس ود الكبج .. هسع وقف ليه في (صينية) وبتكلم براهو.
• بهمهم بكلمات غير مفهومة.
• !!!
• (صينية) تاني!!
• انتوا اصلو ما بتطيروا من (الصينيين) ديل.
• رأسكم قوي. زي الزلط.
• الزلط قطعوه.
• !!!
متاريس
• لاول مرة تقع لي الحكاية .. واعرف ليه الصينيين بيبيعوا (الفكس)؟
• عشان (الفسخ).
• فسخ العقد.
• ما عاوزكم.
• ما دائركم.
• يقول ليكم اكتر من كدا شنو؟
• مفروض ناس المريخ يترسوا (الزلط).
• وممكن يستعينوا بالدعم السريع ويقفلوا الزلط بالسلك الشائك.
• التسجيلات الاجنبية يجب ان لا تنسى مجلس الهلال التسجيلات المحلية.
• طقه لاعب هلال الابيض ضروري في الهلال.
• والشيخ ومنن.
• في الهلال في عناصر ممكن تغادر .. او تعار.
• لو بتتكلموا عن بطولة خارجية ابقوا قدر الكلام دا.
• بالتوفيق ان شاءلله للمدرب فلوران.
• ناس المريخ ما ينوموا.
• ينوموا ليه؟
• وهو مع (اسكندر) دا تفتكروا في نوم؟
• …………
• ترس اخير : ما تنسوا اقفلوا الباب معاكم.

قد يعجبك أيضا
6 تعليقات
  1. جمال الدين عمر الخليفة يقول

    ههههه االظاهر مسمار التكت دا طيرها ليك في راسك صيني شنو وتايواني شنو الجاي تتكلم عنو انت هو ماكان عندك ماكان عاجبك عارف ليه لانو انت اي لاعب موهوب عندكم يدمر من الان اقولك الصيني نهايتة حاتشطبوهو وتلعنو جدفو زي ابو عشرين اوكرا سلمون جابسون ابراهومة الصغير والقال لك منو الصيني نحن عاوزنك لو كنا عاوزنو كان راضيناه ورجع لكن قل ادبو يتعاقب ويتشطب ويمس محل مايمشي انت استعجلت بدل تدخل نفسك في ورطه عقدين كان انتظرت شطبناهو ليك وتسجلو وبعدين نحن نبل فيك من غير الصيني المباراة الوحيده الغلبتنا فيها بسبب الصيني تم طرده والمريخ لعب بالصيني لكن برضو بنادبكم وتدقع الشرط الجزائي وتحرم من فترتي تسجيل

  2. Nasor يقول

    مسامير المريخ الكتيرة طيرت ليك راسك يا عبد الماجد،و خاصة الاخير بتاع النكت و بدون الصيني ولا التايواني العاجبك دا ،تجيب صيني و لا روسي ما عندنا شغلة بالكلام دا، تعالوا الميدان و اخدوا المعلوم حبة حبتين …
    🤣😭😂😆😅😂🤣😭

  3. ابو مصعب يقول

    الصيني نحن ما دايرنو لانه لاعب
    سلوكه سئ والمريخ مدرسه لعب
    وفن وهندسه.. محمد عبدالرحمن
    ابو20 وكانفي الطريق الثلاثي..
    ماذا فعل الغربال وابو20 للهلال
    وهذه ليست المره الاخيره بان يذهب
    لاعب للهلال او العكس..
    المريخ لا يتاثر بذهاب لاعب او لاعبين
    المريخ بمن حضر.. ََ
    المريخ ما بيحيب لاعيبن مواسير
    بدل ما تسحلوا 6 او 7 سجلوا 3
    من العيار الثقيل..

  4. احمد التجاني يقول

    من الاشياء اللي لفتت نظري انه دايما تعليق جمال الدين عمر الخليفة بكون مصحوب بتعليق ابو مصعب ولا اعتقد بإنه المسألة دي مصادفة. ومع ذلك لاول مرة اتفق معاكم في انه الصيني ليس هو اللاعب اللي ممكن تفرد ليهو مقال وتتكلم عنه وكأنه معجزة زمانه. لو كان الامر يتعلق بالتش كان ممكن يكون الامر مختلف. واتفق ايضا مع ابو مصعب في انه ليس في الامر شىء جديد فاللاعبين منذ القدم ينتقلوا بين الناديين الهلال والمريخ. اما عن الصيني فهو لاعب صغير في السن وقوي ويمكن ان يكون من اميز لاعبي الارتكاز في السودان لكن مشكلته انه لاعب متفلت وغير منضبط. وان كان انتوا بتسخروا لانه انتقل للهلال وهو لاعب سلوكه غير منضبط فماذا انتما قائلان عن بكري المدينة؟ وهو في تقديري الأسواء في التاريخ القريب من بين كل اللاعبين. عموما اذا صح كلام الاستاذ محمد عبدالماجد بإنه تم تسجيل الصيني للهلال فهو كلاعب لا غبار عليه لكن المشكلة في تجريب المجرب. ختاما ان كنتوا بتهللوا لفوز المريخ الاخير على الهلال في الجنينة فدة يبقى شىء مؤسف ومحزن ان تتقازم الاحلام المريخية الى الحضيض بدل ما كانت في يوم تقارع النجوم في السماء تهاوت الان لمباراة ودية مدتها 80 دقيقة. حتى لو كان الهلال فاز في المبارة ما كنت سأهلل لاني اعرف انها ليست مباراة يقاس عليها ويهلل ليها. وكان الله في عون المريخ اللي بقى يعاني من الانقسام والتشرذم.

  5. المنصورى يقول

    اقسم بالله البيشوف حال ابو20 ومحمد عبد الرحمن الان يتيقن انه اللاعب فى المريخ غير وفى الهلال غير
    ياخى كفاية الان الهلال بفتش على حارس اجنبى ( بعد تسجيل ولدنا ابو20 )
    لكم ان تتخيلوا نفسيات ابو20 وابوجا هذه الايام
    1000 مرة عمودك دة كلو سنة مكرر والحصلة صفر كبير (Big Zeeeeeeeeeero )

  6. كباشي طه كباشي يقول

    يا ود عبد الماجد لغلاء أسعار باقات النت أنت حتفلس بمشجعي الهلال لمتابعة رواياتك البوليسية الخيالية.
    ثانياً أنت مسئول مباشر عن انهيار أحلام المشجعين من كلامك الطلس وفي النهاية يحصدو السراب .

    زمان كان لديك خط ممتاز في الكتابة لكن .!!!
    لم تصمد علي مبادئك ،القلم أمانة يا اخي .
    لك العذر .

اترك رد

لن يتم نشر عنوان بريدك الإلكتروني.

يستخدم هذا الموقع ملفات تعريف الارتباط لتحسين تجربتك. سنفترض أنك موافق على ذلك ، ولكن يمكنك إلغاء الاشتراك إذا كنت ترغب في ذلك. قبولقراءة المزيد