صحيفة كورة سودانية الإلكترونية

الصبه المايله !!

178

لهيب النار

هاشم الطيب

الصبه المايله !!

* الصبة مالت أسندوها بعيدان !!
* قالوا صابنها بشنو ياربي يكون المهندسين باعوا الأسمنت ونقصوا الرملة والخرصانة غير صالحة !!
* في يومين بس يا أبو حميد راح عليهم الدرب في المويه !
* ناس لجنة إزالة التمكين سلموا سلاحهم وإستقالوا وقالوا الفيهو ريحه بتنشم !!
* قبل ما يبرد خبر لجنة إزالة التمكين سته وزراء قدموا إستقالاتهم !
* دكتور حمدوك قال هذه الإستقالات جاءت تنفيذاً لنبض الشارع !!
* ياتو شارع ده العنده نبض !؟
* الناس الخرجوا يوم 30 يونيو لو قلنا مليون بالفعل وين نبض الأربعة وتلاتين مليون الآخرين ؟
* وقبل أن يجف الحبر بضربة معلم 73 موظف من أبناء الشمال تمت إحالتهم للصالح العام وجميعهم من ديوان الزكاة !!
* منو القال ليكم العنصرية راحت ؟
* قول تلاته يا حمادة ! الصبه ماشه مايله والخميس قرب !!
* نرجع لناس كورتنا ..
* من الأخبار قالوا الإتحاد العام قرر تقسيم فرق الممتاز لقسمين النخبة وناس قريعتي راحت !
* النخبة العشرة الأوائل يلعبوا عشان يطلعوا الأربعة الأوائل للمشاركات الخارجية ..
* الباقين يتنافسوا للمخارجة من درك السقوط من الممتاز !
* قام طلع لينا رئيس لجنة المسابقات باني قال هذا مقترح من د. شداد واليوم الأحد مجلس اٌدارة سيحسم الحكاية !!
* طبعا مولانا جمال رئيس الأمل عنده رأى مشاتر قال الكلام ده فطير وما عنده كرعين !!
* أها نرجع لقصة الكوتش الظاهرة كفاح بعد ما أنكر بأنه لم يبيع الفلاح ظهرت الحكاية في العلن !!
* قبطان الفلاح الذى إتفق مع كفاح محمد عبد المعبود الأخبار المتداولة ما عجبته ركب عربيته ومعاه ربيع وعلي بيت كفاح عديل !!
* تصدت للوفد الحاجة والدة الكوتش وأكدت أن سفر كفاح لأتبرا من المستحيلات والولد عنده مشاكل أسرية وبعدم وجوده صعب حلها !!
* الزول ده قابض مرتب شهرين مقدم حقنا وين !؟
* حقكم قاعد ياولادى وبارك الله فيكم وما تلوموا كفاح لكن الظرف قاسي !!
* بمباركة نادى الفلاح ليلة أمس الكوتش الكبير كفاح صالح مدرباً للاهلي الحرطوم .. مبروك ياحبيب وشكراً للفلاح القدر الظروف ..
* أكد القبطان محمد عبد المعبود بأنهم أكملوا الآتفاق مع الخبير الكبير برهان تيه ورحب الرجل بالإتفاق وشكر نادى الفلاح لثقتهم فيه ..
* نجي لناس لجنة الطوارى العليا حظر الباصات رفعتوه ولا لسه ؟
* لو رفعتوه كلمونا عشان ندبر قروش التذكرة !
* نرجع ليكم نسألكم تمن الخروف بكم التني والرباع الكباشي والبطانه ؟
أعز الناس :ــ
يا أعزالناس وإنت حاضن العود تغني !
غبت يالطير المهاجر وانت لابس الشوق حراير !!
ياسمح يا زين خليك في السمح بعد السماحة !!
نحن ما بنمسك دموعنا ونحن بنسمع لو بهمسه !!
قلت أرحل وجيت أبداً ما رحل مكانك !!!
( العزاء لك الحبيب حلنقي ولكل الناس لك الرحمة والمغفرة الحبيب محمد عثمان حسن وردى )

قد يعجبك أيضا

اترك رد

لن يتم نشر عنوان بريدك الإلكتروني.

يستخدم هذا الموقع ملفات تعريف الارتباط لتحسين تجربتك. سنفترض أنك موافق على ذلك ، ولكن يمكنك إلغاء الاشتراك إذا كنت ترغب في ذلك. قبولقراءة المزيد