المشكلة نجيلة؟؟؟

في السلك
بابكر سلك
المشكلة نجيلة؟؟؟

*تسول المريخ للملاعب خنجر في قلب كل عاشق للكيان
*وقد يكون سلاحا من اسلحة الكيمان التي تتنافس لاجل للسيطرة علي الكيان
*والسؤال
*هل المشكلة نجيلة؟؟؟؟
*يعني اسي لو النجيلة قامت
*بنلعب افريقيا في استادنا؟؟؟
*ام ان الامر مختلف؟؟؟؟؟
*بمعني ان هناك متطلبات للكاف ومواصفات محددة؟؟؟؟
*بالطبع طبعا
*فالمشكلة ليست مجرد نجيلة يمكن الاحتيال عليها بورنيش يظهر نضارها كذبا
*للكاف متطلبات لابد منها
*منها علي سبيل المثال
*السياج حول الملعب
*وده مشكلتو اتحلت بالسياج الجديد العملو(البصري)
*السياج القديم البشبه سور جنينة الحيوانات كان مخالف للمواصفات حتي قبل ظهور المطلوبات الاخيرة
*وجنينة الحيوانات لغير الناطقين بها
*هي حديقة للحيوان بالخرطوم تقع محل كورنثيا الحالي
*كان فيها جميع الحيوانات عايشه في امان وسلام ومحبة
*من قفص ابو القدح شمالا وحتي قفص الغزال والنعام جنوبا وقفص وبحيرة القرينتي شرقا حتي قفص الاسد غربا
*القرود كانن في النص
*حوامات
*اصلو النص ده بدور الحوامين
*والشيتا والطاؤوس
*في مشهد يوريك ان لله في خلقه شؤون
*جازفوها الله يجازف باقي عمرهم
*القذافي اظنو كان دافع كويس
*وعملوا بدلها برج الفاتح
*الفاتح ذاتو مااتهني بيهو
*اتجازف وغيروهو لي كورنثيا
*حق الحرام يا عمك
*المهم
*السياج ماكان قانوني واتغير
*الاجلاس
*اجلاس المدرجات الشعبية من المطلوبات
*ماكان عندنا اجلاس في المدرجات الشعبية
*خور الصرف اسفل السياج كان مشكلة واتحلت
*البصري صباهو
*حمامات للجماهير
*دي عمرنا ما كانت عندنا
*كنا بنستقبل الحيطة
*وهي من المطلوبات الجديدة
*غرف اللاعبين والحكام بالمواصفات الجديدة
*وامكنة الاعلاميين
*سهولة الدخول والمخارج
*يعني باختصار القصة مانجيلة وبس
*القصة مطلوبات اساسا ماكانت مطلوبة وماكانت موجودة
*نملك من المطلوبات الحديثة الكشافات
*والمولد
*والمقصورة (تحتاج مراجعة مداخل وحمامات)
*وبارك الله فيمن قام بها
*لذا لامحل للتباكي علي مطلوبات هي اساسا لم تكن من الموجودات
*الملعب كان موجودا ورائعا
*ولكنه بدا تدهورا منذ افتتاحة ويظل يحتاج للترقيع والصيانة علي طول
*والسبب ان اشكالية التربة بالمنطقة لم نقم بعلاجها في منطقة الاستاد
*فعملنا بنظرية السراميك في بيت الجالوص
*كلما يقوم نرقدو من جديد
*وسنظل كذلك ان لم نقم بحل الاشكالية جذريا
*ايها الناس
*والله استاد المريخ لامحتاج دعم سريع ولامحتاج من لقطب او اذي من رئيس
*محتاج لجنة تدق صدرها
*وتخت قدامها مطلوبات الكاف
*وتجيب المختصين
*وتفتح باب الدعم لكل الشفوت في جميع انحاء العالم
*القصة ماصعبة ولا مستحيلة ولا تحتاج لتبني(الشيخة) للموضوع
*يبقي المهمة مهمة شفوت ياشفوت
*يانتشفتن يانتبشتن
*ايها الناس
*ان تنصروا الله ينصركم
*اها
*نجي لي شمارات والي الخرتوم
*انت يا والينا
*الزول لما رجع من امريكا شنو معاهو الجابو لينا؟؟؟
*ولا ما سمحوا ليهو يخش السوق يا والينا
سلك كهربا ننساك كيف والكلب قال ياحليل جنينة الحيوانات…لو كانت قاعدة كان اتملت مسؤولين
والي لقاء
سلك