المعمل الما بعرف الملاريا بتغلبو الكورونا  !!

0
66

 

بالعربي الكسيح
محمد الطيب الأمين
المعمل الما بعرف الملاريا بتغلبو الكورونا  !!

* العالم كله تضرر من كورونا ما عدا الكرة السودانية .
* قول لي كيف ؟
* كورونا وقعت للكرة السودانية في جرح .
* وتعال اناقشك .
* الأندية العالمية والعربية تضررت من إيقاف النشاط .
* بل هذه التوقف يتسبب في خسائر فادحة لهذه الأندية.
* خسائر في الإعلانات والرعاية والبث والدخل الخاص بالمباريات.
* قروش لا حصر لها تجنيها الأندية عندما يكن النشاط مستمرا .
* دخل رهيب يحققه النشاط في الدوريات العالمية .
* هذا بخلاف مكاسب اللاعبين من حوافز ومرتبات أسبوعية وشهرية.
* لكن تعال شوف الكرة عندنا .
* إيقاف النشاط مصدر سعادة بالنسبة للأندية السودانية .
* توفير .
* راحة من الصرف .
* الدوري عندنا اغبش ساكت .
* ما فيهو مكاسب .
* ولا دخل .
* المباريات التي يكن طرفها هلال مريخ دخلها لا يغطي حتى نفقات المباراة نفسها .
* كل الأندية ما عدا الهلال مديونة.
* ديون من وكالات السفر ومن الفنادق والبصات السفرية وغيرها من الجهات .
* أندية تعتمد علي جيوب الأفراد ولذلك إيقاف النشاط هو راحة لهذه الجيوب .
* ليس هنالك مستفيد من الكورونا بخلاف الأندية السودانية وتجار الكمامات .
* تجار الكمامات عملوا قروش .
* قروش تقيلة.
* سعر الكمامة يختلف من صيدلية لأخرى.
* ده غير الكمامات التى تباع في السوق الأسود.
* الكمامات في الولايات السعر مضاعف (١٨) مرة .
* واصلا الولايات تدفع ثمن الأزمات دبل..
* المعاناة الحقيقة في الولايات وليس الخرطوم .
* معاناة في الصحة والتعليم والأكل والشراب .
* الخرطوم تقاتل من أجل أن تظل الرغيفة بجنيه بينما في عدد من الولايات الرغيفة بجنيهين قبل عام من سقوط البشير.
* كل شي في الولايات قاسي .
* واقسى شي إنو الكيزان في الولايات قاعدين وشغالين .
* الولايات فيها ثورة مضادة يقودها كيزان الولايات .
* لو لم يتم تطهير الولايات من الكيزان والخلايا النائمة سيكون الوضع كارثي .
* الولايات لا تحتمل أي حالة من الكورونا .
* زول واحد لو جاتو كورونا في الولايات ممكن يعادي الولاية كلها .
* ما فيش فحص ولا معامل ولا غرفة جاهزة .
* ولاية كاملة ممكن يكون فيها جهاز اوكسجين واحد أو اثنين .
* لو جات عشر حالات ساكت سيكون الوضع كارثي بهذه الولايات .
* إذا كان الخرطوم العاصمة قاعدة في السهلة فما بالك الولايات .
* الحامي الله .
* والحارس الله .
* وغير الله ما عندنا شئ .
* لا عندك طب ولا عندنا معامل زي الناس .
* المعمل الما بيفرز بين الملاريا والرطوبة قطع شك ما بيعرف الكورونا .
* بس نمسك في الله .
* ونسأله أن يخفف علينا ويرحمنا ويلطف بنا .
* ثقة في الله سنعبر هذه المحنة الكبيرة.
* ثقة في الله سنكون أقل دولة تسجل حالات إصابة أو موت .
* ثقة في الله وليس استهتار .
* حالنا لا يخفى على الله وهو الذي يعلم كل شئ .
* لطف يارب.
* و..و..
* والله في.

ترك الرد

من فضلك ادخل تعليقك
من فضلك ادخل اسمك هنا