النخلة الحمقاء

0
10

 في السلك

بابكر سلك
النخلة الحمقاء

*زماااان
*لما كنا في المدرسة
*ايام المدرسة مدرسة
*ايام مجانية والزامية التعليم
*ايام المدرسة فيها مناهج
*ومكتب التعليم وقتها يختص بالتعليم
*وفيهو خبرات المعلمين
*لابجيب تقارير
*ولاعندو اجتماعات ظل
*ولابوصي بابعاد معلم لانه ضد
*ولابعين زول لان كل مؤهلاتو انو معانا
*في الايام ديك
*درسونا النخلة الحمقاء
*تلك الشجرة اللئيمة التي خصصت ظلها علي قدرها
*مجرد ضل يقعد فيهو زول
*تعمدت ان لا توفره
*وبلحها لو ينشف قبلو
*يحرم علي الجوعي الذين تمتص مايروي عطشها بواسطة جذورها العميقة من موية عيونهم
*لذا
*هوت في النار تستعر
*ايها الناس
*شجرة المسكيت تنتشر في غفلة
*تشوفها مسكيتة مسكينه
*ولكنها طيلة فترة وجودها علي الارض
*تتلف الارض وتفنيها
*والعلاج ليس بقصها وتهذيبها
*لان تهذيب الشكل لا يقي الارض شر الإفساد
*لذا يكون العلاج في اجتثاثها من جذورها
*لتحل مكانها علي الارض الخصبة الاشجار المنتجة التي تمدنا بالظل الواسع والثمار الوفيرة
*انا خلوني
*اسألوا ناس مكافحة المسكيت
*المهم
*الانانية ماحبابها
*في كورتنا دي اللاعب الاناني الداير الكورة كلها في كراعو ويقعد يسوط بيها الملعب كلو بدون مايرفع راسو ويمرر لزميل
*بضر التيم
*وزملانو مابحبوهو
*ومهما صبرت عليه الجماهير
*فان صافرات الاستهجان ستفوت اضانو
*الي ان يصل الامر للهتاف الجماعي
*بره بره بره
*ايها الناس
*لم تكن ثورة الناس مزاج
*ولكنها كانت مسببة
*واسبابها مقنعة جدا ومنطقية
*ولو كنت في مكان المخلوع والشعب برغم كل الظروف لم يخرج عليا
*لامرت بالقاء القبض علي كل الشعب وتقديمه لمحاكمات فورية تحت مادة عدم الاحساس واهمال الوطن
*المهم
*تلك الاسباب المنطقية للخروج حددت اهدافا بعينها
*وعلي المجلس العسكري الموقر ان يحترم تلك الثورة التي يأتي الي ميدانها الكجر علي ظهر تاتشر ويحمل بيده السلاح
*ويأتي الشباب راجلا ويحمل بيده ارواحه الطاهره
*احتراما لتلك الارواح التي حلقت لاجل اهداف الثورة
*حقو مجلسنا العسكري يحترم طلبات الشارع جملة وتفصيلا
*فالشباب دخله شك انه يعيش الخطة جيم
*ايها الناس
*لاناخذ الناس بذنوب غيرهم
*ولكن كل شاة يجب ان تعلق من عرقوبها
*فالتي نطحت تاخذ جزاء النطح
*ويرد للنطيحة حقها
*والتي اكلت الزرع
*تطرشوا في ساحة الاعتصام
*حتي العتوت الرضع اللبن يحاسب
*ده لبن مالعب
*اما الشاة الماشة ساكت مع القطيع
*فلاذنب لها وضيعت زمنها براها
*المهم
*لا ادري سر الاجتماع برموز الماضي الذي خرجنا عليه
*اذا انت ما اديتني باص قون تلتين سنة
*العبك تاني فوق كم؟
*والله ماتشمها
*التشكيلة لازم تكون شبابية كي نضمن المواكبة واللياقة البدنية العالية وحسن الاداء
*المهم
*عندي صاحبي من الذين يرون ان الخروج علي الحاكم حرام
*قلت ليهو اقتنعنا
*لكن رأيك شنو في الخروج علي الحاكم الذي خرج علي الحاكم القبلو؟
*تخيلو الزول ده
*قابلتو يوم في المحكمة
*تصادف انو والد كنداكة الغت محكمة الاستئناف ادانتها جاب لينا فطور في المحكمة زي فطور العريس
*ومع الفطور حفاظة سفاري كبيره شربوتها في السلك
*صاحبنا المابخرج علي الحاكم
*شوف عيني مشي علي الشربوت
*وشال ليهو كوز ليهو كرش
*وشفط ليك الكوز الاول
*ودبل
*وعلي الطلاق ملأ التالت
*قلت ليهو ياشيخنا
*انت مابتخرج علي الحاكم وبتشفط الشربوت؟
*ايها الناس
*ان تنصروا الله ينصركم
*اها
*نجي لي شمارات والي الخرتوم
*ياحليلك ياوالينا
*قالوا شالوك وتاني مابتجينا
*سجم الباعوض الكنتوا مربنوا فينا
*سجم الوسخ وغياب عربية النفايات ياوالينا
*وياحليل الرسوم والاتاوات المن الصباح كلو يوم تفرضوها علينا
وياحليل وسخ المدينة
وازعاج الالف سارينا
الكانت بتقفل الشارع لينا
عشان مسؤول دخل الحمام يادوبك ومارق علينا
وعشان فنطوط مرتو اشتهت السخينة
البلد كلها في فارغة تصرخ فينا؟
سلك كهربا
ننساك كيف والكلب تاني لانلاقيهوا لايلاقينا لانتلاقي يا نتلم
والي لقاء
سلك

المشاركة

أكتب رد

أدخل تعليقك من فضلك!
أدخل إسمك هنا من فضلك