صحيفة كورة سودانية الإلكترونية

الهلال في (أبها) صورة!!

853

صَابِنّها
محمد عبد الماجد

الهلال في (أبها) صورة!!

‌نحن في الحرب دي الواحد فينا وقت يشوف صور لاعبي الهلال في التمرين أو في معسكر (أبها)، الواحد فينا بيبقى زي الأكل ليه طلب سمك.
‌لمن تشم الريحة في إيديك وتقوم تغسل يدك بالصابونة من ريحة السمك.
‌وانت ليك (10) شهور ما شفت ليك سمكة.
‌وشك من الفول بقى زي (القدرة).
‌الواحد لو عطس ساكت يعطس (موية فول).
‌العطسة بقت تطلع بي (جبنتها).
‌نحن في الحرب دي، أظن الواحد لو وقعت فوقو (دانة) أحسن من أن يقولوا ليه الهلال إتغلب، أو جابو قوون في الهلال.
‌(إلّا الهلال) على رأي الراحل صلاح مليشيا، رحمة الله عليه.
‌القوون في الهلال عندنا زي خبر الموت.
‌كل شيء ولا هزيمة الهلال.
‌لا رسمي لا ودي.
‌دي شيء ولا بناقش فيها.
‌نحن في الحرب دي مرات يقولوا لينا قرّبت!!
‌نجهِّز (طواقينا) ومرقة (عصارينا).
‌لمن نقعد نتشاكل في شاحن الموبايل.
‌عمري ما كنت قايل نفسي بشتهي (السوق العربي) للحد دا.
‌السوق العربي بقى لينا زي الحلم.
‌السوق العربي… الحلم العربي!!
‌ومرات يقولوا لينا بنضفوا في أم درمان.. والله خايف من (النضافة) الكتيرة إستاد الهلال وقت الحرب تنتهي نلقاه بقى (كشك).
‌غايتو الطابق التاني ما أظن يكون قاعد لغاية الآن.
‌مرات يقولوا لينا خلاص مفروض الناس ترجع بيوتها.
‌علماً بأنّ البيوت بقت صقيعة ساكت قاعدة في السهلة وعدمانة نفاخ النار.
‌ومرات يقولوا لينا ما تطلعوا عشان ح يستعملوا (القوة المميتة).
‌القوة المميتة دي نحن بنسمع بيها من شهر خمسة.
‌ومرات يقولوا لينا حميدتي مات.
‌ومرات يقولوا لينا لا ما مات.. لكن ما بقدر يتحرّك.
‌ومرات يقولوا لينا دا البعاتي.
‌ومرات يقولوا لينا دا ما بعاتي، دا الذكاء الاصطناعي!!
‌ونحن نشيل ونصدِّق.
‌نحن أول مرة نشوف لينا ذكاء اصطناعي (طويل) كدا.
‌ومرات يقولوا لينا جدة.
‌ومرات يقولوا لينا أبداً، جدة خلوها.
‌ومرات يقولوا لينا نمشي الإيقاد.
‌مرات عنتيبي، ومرات فجأة كدا ينطوا لينا في المنامة.
‌هو في نوم.. يا حليل النوم!!
‌مرات يقولوا لينا البرهان ح يلاقي حميدتي.
‌خلاص خلال أسبوعين.. اللقاء سوف يتم.
‌ومرات يقولوا لينا أبداً مافي كلام زي دا كباشي هو الذي سوف يلاقي عبد الرحيم دقلو.
‌شفتوا كيف؟
‌إنتو فاكرين السياسة دي لعب!!
‌أهو كلهم دقلو.
‌عبد الرحيم من حميدتي ما فارقة كتير.
‌مرات يقولوا لينا (بل بس).
‌أصلو ما بتفاهم ولا بنتفاوض ولا بنلعب.
‌ومرات يقولوا لينا شغّالين بالنفس الطويل.. أصبروا إنتو، الناس ديل قاعدين (يتكتكوا)؟
‌طوِّلوا بالكم إنتو ما تستعجلوا.
‌الضيق كعب.
‌مرات يقولوا لينا كدا ومرات يقولوا لينا كدا، لمن بقينا زي مرايات النيسان مفندرات لي برّه.
‌السواق لمن يدور يلف يطلع لي نصو.
‌مرة نفطر ومرة ما نفطر نقول الظروف ما معروفة.
‌مرات ننوم ومرات النوم يطير من عينينا.
‌في ضرب!!
‌أها نحن في الحالة دي زي جدول سبعة للطالب الما حافظ، وقت يجيبوا لينا سيرة الهلال، الواحد فينا بكون متل العريس الجابو ليه (الكشف).
‌نتمغى بدون ما نتمغى.
‌ونقوم من غير ما نشعر.
‌الواحد فينا فجأة كدا بيلقى نفسو وقف.. ونفسو اتفتحت للأكل.
‌نفرح وننبسط زي كأنو ما في حرب.
‌ولا في دانة.
‌ننسى موضوع (الشفشفة) تماماً.
‌نسمع أخبار الهلال كأننا بنسمع في وردي.
‌والله التركيز البكون علينا وقت يجيبوا لينا سيرة الهلال لو عملناه في المدارس كنا دخلنا طبّ.
‌ساكت ضيّعنا نفسنا.
‌دحين ونحن في الوضع دا، قالوا لينا المريخ أعار بخيت خميس لليبيا.
‌وأعار الجزولي نوح لليبيا.
‌وأعار التش لليبيا.
‌دا غير محمد المصطفى.
‌وكرشوم في الطريق.
‌ونجم المريخ السابق ونجم حي العرب الحالي سفيان عبد الله مشى برضو ليبيا.
‌في ساعتها قلنا ليهم إنتو الجماعة ديل وقت ما قدروا يجيبوا (حفتر) رئيس فخري، قالوا أحسن نحن نمشي ليهو.
‌يا ربي حفتر عندو علاقة بهذه الإعارات؟
‌هسع (التش) دا بعيروه؟!!
‌والله (التش) لو وضعتو في (متحف) ما أعيرو.
‌الغريبة بعد الإعارات دي، ليبيا فيها هلال وما فيها مريخ.
‌شفتوا العظمة.
‌زي السعودية فيها الهلال برضو.
‌سمعتوا ليكم بالغلط ساكت في مريخ أو أي نجمة في السعودية أو في ليبيا.
‌الهلال في المجموعات.
‌وشانتير في نهائيات الأمم الأفريقية.
‌ولاعبو المريخ اتفرّقوا في الدوري الليبي.
‌شيء النصر.
‌وشيء السويحلي.
‌والله يا حليل أبوجيبين، على الأقل كان بتم ليهم الباقي (صور).
‌المريخ (اتشفشف) يا رِجّالة.
‌النمير دا لو قعد شهر تاني، هيثم كابو ذاتو بنلقاه في الاتحاد المصراتي.
‌نرجع للهلال وانتصاره على أحد أندية روشن في السعودية.
‌الوحدة في معسكر منذ 19 يناير واصلاً هم أتوا من دوري شغال ودوري قوي.
‌غلبنا حطين أربعة، قالوا حطين فريق درجة تانية.
‌جابوا لينا الوحدة.. الوحدة شالت تلاتة.
‌الوحدة بقت الوحدات.
‌براكم بتجيبوا لي روحكم الكلام.
‌مع ذلك أنا ما عاوز إتكلّم عن الغربال وعن هدفه (المروحة).
‌ولا عاوز إتكلّم عن أبو عاقلة، يصنع في الأقوان، ولا هيثم مصطفى وهو لاعب ارتكاز.
‌ولا عاوز اتكلم عن روفا الروفا.
‌ما عاوز إتكلّم عن الجان جان كلود.
‌ما عاوز إتكلّم عن الزامبي البرت، يصنع ويسجِّل.
‌ولا عاوز إتكلّم عن آدم باسو، زولكم فتح.
‌ولا عاوز إتكلّم عن فوفانا.. تقول بيلعب في نهائيات الأمم الأفريقية.
‌ولا عاوز إتكلّم عن ولدنا الموريتاني خادم بعمل في العجب مع منتخب بلاده، ما شاء الله عليه.
‌ما عاوز إتكلّم عن فلوران الذي جعل في الهلال 35 لاعباً أيِّ 11 لاعباً منهم بقوم بالمهمة.
‌ما عاوز إتكلّم عن أيِّ واحد من ديل.
‌انا عاوز إتكلّم عن جمهور الهلال العظيم.
‌والله أنا في كل مرة بيدهشني هذا الجمهور.
‌جمهور الهلال في الرياض خلق حالة حب عظيمة بينه وبين اللاعبين.
‌يا جماعة الهلال دا بختلف بالجمهور.
‌جمهور في هذه الحرب شكّل حضوراً كبيراً، وقدّم دعماَ عظيماً للهلال.
‌جمهور الهلال في الرياض فعل كل ذلك بحب.
‌في البرد دا ما وقفوا.
‌درجة الحرارة في الرياض 14.
‌والله انا شفت صور الجماهير مع لاعبي الهلال، مرارات الحرب كلها انتهت.
‌ح نرجع تاني.
‌نغني ونضحك.
‌ونفرح.
‌ونمشي السوق العربي.
‌شعب بهذه العظمة مافي خوف عليه.
‌جمهور الهلال دا جمهور مُدْهِش.
‌في كل مباراة هذا الجمهور يُدهشك.
‌هذا الجمهور هو كنز الهلال الحقيقي.
‌الهلال لعب في أبو حمد، جمهور الهلال في أبو حمد فتح كل بيوتهم للهلال.
‌جمهور الهلال في أبو حمد، أيِّ مُشجِّع ضبح للهلال بي طريقتو.
‌الهلال مشى النهود.. أيِّ مُشجِّع للهلال في النهود عمل ليه (حفلة) بمناسبة زيارة الهلال.
‌الهلال لعب في القضارف.. جمهور الهلال من أم درمان لغاية القضارف طلع في الطرقات لاستقبال الهلال.
‌طلعوا للهلال في الكاملين وفي مدني وفي الفاو.
‌في الدامر ، ظلَ هناك طفلٌ صغير أمام فندق إقامة الهلال طوال فترة وجود الهلال في الدامر.
‌الهلال دا فريق عظيم.. عظيم بهذا الجمهور الرائع.
‌جمهور الهلال في الرياض، شكراً على هذا الحب.
‌حضروا رغم أّن المباراة بدون جمهور.
‌رغم الحرب والبرد.
‌كسروا اللائحة وأجبروا مراقب المباراة للسماح لهم بالدخول.
‌بهذا الحب، طبيعي الهلال يغلب ثلاثة.
‌بهذا الحب، بنتأهل إن شاء الله ونشيل لقب الأميرة السمراء.
‌بهذا الحب، بنشيل السوبر وكأس العالم للأندية.
‌أبقوا على هذا الحب، والله ما بتجيكم أي عوجة.
‌كونوا بخير.
‌…..
متاريس
‌أبوعشرين لو كان في المريخ هسع كان يكون في ليبيا.
‌في السويحلي تحديدا.
‌تستاهل يا بخيت خميس.
‌رمضان عجب ما لقى ليه إعارة.
‌الجان جان كلود أعاد تخطيط شوارع الرياض من جديد شارع.. شارع، وزنقة ..زنقة ، وعمل إضاءة كمان للشوارع التي لا إضاءة فيها.
‌معسكر أبها اتضح أنّه ضربة معلم.
‌روح معنوية عالية، وإمكانيات متوفرة في كل الجوانب وحب لا ينتهي.
‌كان الهلال في حاجة لهذا المعسكر عشان يغيِّر شوية من معسكر أديس أبابا ومعسكر دار السلام.
‌الأجواء في السعودية تختلف عن الأجواء الأفريقية.
‌الهلال بعد 5 أشهر في أدغال أفريقيا كان في حاجة لمعسكر بهذه الأجواء.
‌وقبل المعسكر لا بد أن نقول إنّ الراحة التي مُنحت لهم قبل المعسكر جعلتهم يعودوا بهذه الروح وتلك المعنويات.
‌الروح الموجودة في الهلال الآن روح بطولة.
‌والانتصارات في مثل هذه المباريات تعطي دوافع قوية وهي بشريات خير إن شاء الله.
‌فلوران له دورٌ كبيرٌ في هذه الروح المشعة في الهلال.
‌كذلك يحفظ لعبد المهيمن الأمين السيطرة على هذا العدد من المحترفين والنجوم المحليين.
‌سيطرة بحب.
‌مدافع الهلال السنغالي الجديد جونيور تأخره كل هذه الفترة أمرٌ مريبٌ، رغم التعليل بأنّ التأشيرة هي سبب تأخر اللاعب.
‌إن شاء الله وإنت بتقرأ في هذا العمود يكون جونيور وصل.
‌الزول دا لو عاوز يفتح ليه سفارة سعودية في السنغال ما كان سوف يكون في حاجة لكل هذه الفترة.
‌دي تأشيرة أم جنسية؟
‌اللوتري بتاع الولايات المتحدة الأمريكية مع كل الإجراءات ما عاوز كل هذا الوقت.
‌مباراة الهلال أمام بترو أتلتيكو تبقى ليها 24 يوماً.
‌ومباراة الهلال أمام الترجي يوم 2 مارس.
‌إذا لم يصل المدافع السنغالي جونيور قبل تجربة الهلال القادمة، فإنّ استفادة الهلال من اللاعب أفريقياً سوف تكون مستحيلة.
‌نخشى أن نكون فقدنا باسط وبانغا ومانو دون الاستفادة من أي إضافة.
‌وإرنق مازال يحتاج للمزيد من الوقت.
‌في ظل هذه الأجواء السعيدة في الهلال، لا بُدّ أن نقف عند هذه السلبية.
‌…
‌ترس أخير: مع ذلك الهلال في أبها ظَهَرَ في أبهى صورة.

قد يعجبك أيضا
اترك رد

لن يتم نشر عنوان بريدك الإلكتروني.

يستخدم هذا الموقع ملفات تعريف الارتباط لتحسين تجربتك. سنفترض أنك موافق على ذلك ، ولكن يمكنك إلغاء الاشتراك إذا كنت ترغب في ذلك. قبولقراءة المزيد