صحيفة كورة سودانية الإلكترونية

الوسيط الاثيوبي بالغ معانا

1

في السلك

بابكر سلك
*لن نبارح محطة شبيبة القبائل حتي نستفيد من الدرس جيدا
*او قل حتي نقوم بالتقييم العلمي الدقيق والاستفادة من المعلومات الصحيحة المحيطة بالقصة عشان نعرف الرصة
*قصة القبائل زي مافيها سلبيات برضو فيها ايجابيات كثيرة
*الاولاد ادوا المباراتين بروح عالية وولاء للشعار لا شك فيه
*وحتي الجهاز الفني استطاع ان يدير الموقعة الاولي بحنكة كادت ان تكفل له الفوز خارج الارض لولا سوء الطالع الذي لازم المهاجمين
*وكادت ان تعيدنا بنقطة لولا تحامل التحكيم علي ارض الجزائر ونقضه للهدف الصحيح للنعسان والذي استفاد فيه من تمريرة بكري الرائعة
*ومن الايجابيات التي تحسب للجهاز الفني قيادته الفريق لاحراز اهداف تلاته ملعوبة
*ليست صدفه
*فقط نحسب علي الجهاز الفني زي ماذكرنا امس اندفاعه الهجومي في وقت هو فائز فيه بالتلاته ومتأهل مطلقا التمهيدي بالتلاته
*فكانت الطامة اننا لم نستفد من اهدافنا التلاته
*ومن سلبيات اللقاء احجام بعض الجمهور من التواجد علي المدرجات بصورته المعهودة
*ولانري سببا مقنعا لذلك الغياب يا اهل الغياب
*علي كل كانت التجربة مفيدة جدا
*فقط مايحيرني هو موقف الوسيط الاثيوبي معنا
*ماشفت لي حكم بحسب ركلة جزاء مشكوك مشكوك فيها ياولدي علي فريق في بلده وبين جماهيره وفي الزمن المضاف وتؤدي لتغيير النتيجة وقلب الموازين غير حكم الوسط الافريقي
*الوسيط الافريقي بالغ معانا
*مابتعرفوا يا علي اسد سوق نمرة اتنين؟؟؟
*ماشفتوا البلنت البحسبوها لما تدق محل الحقنة دقت وين؟؟؟؟
*ممكن الخصم يجيب هدف يطير بيهو اصحاب الارض في مثل هيك زمن اذا كان الهدف ناتج عن مهارة الخصم وحدها
*زي قون سيو الطير السواسيو والمواسير في الدقيقه خمسة وتسعين داك
*زي قون انيمبا التاني سنة ٢٠١١ في شباك الزنطور
*لكن ضربة جزاء في ارضك ومشكوك فيها في زمن زي ده
*علي اليمين انتوا مابتعرفوا يا علي اسد
*الحكم ده صلاة في المسجد ماعزمتوهوا؟؟؟؟؟
*المهم
*امامنا معركة عربية نحنا قدرها
*ولعلنا نمسح الدموع علي قميص الوداد
*فالمريخ كبير وكبير جدا
*ولو كانت القرعة تمهد له الطريق بفرق في بلدانها مافي زول بعرفها
*او فرق بلدانها زاتها مافي زول بعرفها زي الفرق البتقابل ناس روشا دي
*كان شلنا كأس افريقيا قبل يبدأ
*المهم
*الزولفاني كان يتم تقييمه كل خمس دقائق اثناء المباراة
*مفضي النص تارة
*ومفضي الجربوكس تارة اخري
*الله ريحو من حروباتنا دي وفتح عليهو
*ولكن لاتنسوا الاسم
*فقط للذكري
*اها
*الكاف شاف كورة السبت
*وشاف كورة الاحد
*كمبيوتر الكاف قال
*الفريقين اللعبو يوم السبت الاتنين يصعدو
*والفريقين اللعبو يوم الاحد تاني مايورونا وشوشهم
*احرجتوا كمبيوتر الكاف زاتو ياروشا
*اسي عليكم الله الشفتوهوا يوم الاحد ده بتسموهوا كورة
*وختت بكري للكورة في صدرو ومراوغة مدافعين وتكلها باللفت في السقف ده برضو كورة؟؟؟
*علي الحلف كلما اشوف بكري ادعو لكردنة
*وفرح الصفراب الخرافي ليس لخروج المريخ الافريقي
*ولكنه كيتا علي قون بكري السمح ده
*ناس قمة افراحها تأتي من اخفاقات الغير
*عمرها غير صفر ماتصير
*ايها الناس
*من الاسباب المباشرة للخروج ضعف ابو عشرين الفني
*الهدف في الجزائر يسأل عنه لان حارس مبتدئ لايسمح لكرة هوائية ان تسقط خلفه
*الهدف الاول للجزائر هنا جاء من كرة لاتستحق (النفض)
*واذا استحقت لايكون النفض بهذه الطريقة
*واذا كان بهذه الطريقة كان علي الحارس ان ينهض برشاقة لانه هو من نفض وهو الذي عليه توقع عودتها مجددا
*اضعف مهارات ابو عشرين الخروج الخاطئ
*فعيوب ابو عشرين النسور هي نفسها عيوب ابو عشرين المريخ
*مدرب الحراس منو يا اسد؟؟؟؟
*ولا علي الله يا علي اسد
*الحارس الله
*لنا عودة
*ايها الناس
*نحن في دولة قانون
*عملناها دولة قانون بي ايدنا وشديدنا
*يبقي لما نقرر نشيل مجلسنا
*لا مجال لذلك الا بالقانون في دولة القانون
*غير كدة لابتشال ولايحزنون ولا بنطون
*المهم
*٢٨ /٨ /٢٠١٩
*يوم لن ينساه التاريخ
*تشكيل واعلان الحكومة المدنيااااااااأاو
*موش قلت ليكم نحنا دولة قانون؟؟؟
*ايها الناس
*ان تنصروا الله ينصركم
*اها
*نجي لي شمارات والي الخرتوم
*كان شفت يا والينا
*بعد الباعوض والضبان طلعا عيننا
*بعد البفباف سعرو الغالي طلع
برضو عيننا
*بعد الضبان بوظ عينينا
*بعد الباعوض قطع كرعيننا
*فتوي جديدة جابوها لينا
*الطلح مع القرض قالوا لينا
*سويناهن طلعنا نحنا من غرفنا يا والينا
*وفضل الضبان يشكر فينا
*اظنو ضبان ضكر يا والينا
*وفضل الباعوض ينوني فينا ويصفق لينا
*سمعنا صفقة يا والينا
سلك كهربا
ننساك كيف بس ورينا؟؟؟
والي لقاء
سلك

قد يعجبك أيضا

اترك رد

لن يتم نشر عنوان بريدك الإلكتروني.

يستخدم هذا الموقع ملفات تعريف الارتباط لتحسين تجربتك. سنفترض أنك موافق على ذلك ، ولكن يمكنك إلغاء الاشتراك إذا كنت ترغب في ذلك. قبول قراءة المزيد