الوقت مناسب جداً لانتقاد حال الهلال !!
بالعربي الكسيح
محمد الطيب الأمين
الوقت مناسب جداً لانتقاد حال الهلال !!
* في العادة تجدني أتجنب الحديث مع الذين يجيدون لعب دور (العاقل) في أيام النكسة ..
* الناس (البتجملوا) عند كل خسارة وعند كل سقوط ..
* يخسر الهلال.. يقول ليك الهلال خسر مباراة ولم يخسر بطولة ..
* يخسر الهلال بطولة.. يقول ليك الخسارة لا تعني نهاية الدنيا ..
* هؤلاء يخدعون الناس ويخدعون أنفسهم ..
* هذا الحديث من حيث الشكل مقبول جداً ولكن من حيث المضمون غير مقبول ..
* ما أي حاجة الناس بتسامح فيها، ولا أي حاجة الناس بتمثل إنها عاقلة ..
* كل حاجة عندها حد ..
* النقد ذاتو مرات بيكون هو سبب في إندلاع ثورة التصحيح ..
* تجي تنتقد يقول ليك ما تنتقد اللاعبين الوقت ما مناسب ..
* ما في حاجة إسمها (الوقت ما مناسب) ..
* ولا في لاعب كبير على النقد ..
* وأنا ما عارف الوقت المناسب ده متين ؟؟
* يعني الهلال طار أول أمس يفترض أنا أقول الوقت ما مناسب وأقوم اعمل تأجيل للنقد ده لحدي نهاية الموسم وألا كيف ؟؟
* يعني الوقت المناسب بين الدورتين وألا كيف ؟؟
* الآن الوقت مناسب، أي زول عندو كلام عايز يقولو يقولو طوالي ..
* ما في ما يمنع ..
* لا بنلقى عذر للاعبين ولا بنلقى عذر للكاردينال ..
* كلو عند العرب صابون ..
* الناس الدايرين يعملوا لينا فيها عاقلين وإنو الخسارة ما نهاية الدينا ديل ناس شكلهم متأثرين بالإعلام الغربي والعربي ..
* الأهلي المصري لما يخرج من دور الـ(32) يمكن للإعلام الأهلاوي أن يعذره لأن (دولاب الأهلي مليان كاسات أفريقية) ..
* وكذلك الترجي والزمالك ومازيمبي والريال وبرشلونة ..
* إنت بتغفر وما بتنتقد اللاعبين لأنك بتكون عارف إنو الفريق ده طار بسبب جنون الكورة أو هي كبوة جواد ..
* ولكن ما يحدث في الهلال (لا هو جنون كورة ولا كبوة جواد) ..
* عشان ما تغشوا نفسكم ..
* الحقائق ظاهرة وواضحة ..
* رئيس نادي فشل في فريق الكرة ولاعبين بدون روح وإعلام البعض منه تحركه مصالحه الشخصية ..
* وبين هذا وذاك يضيع الهلال ..
* والهلال الذي طار من الأبطال لن يتقدم في الكونفدرالية ..
* لو بالغ بيصل المجموعات ..
* ما أكتر من كده ..
* وبالأمس ركزنا على الكاردينال لأنه السبب الأهم في ضعف فريق الكرة بنادي الهلال ..
* السبب الأهم لأن سياسته في إدارة الفريق فاشلة جداً.. التسجيلات فاشلة وتأخير الحوافز والمرتبات فشل كبير، والتدخل في الشأن الفني فشل أكبر والاطاحة بالاجهزة الفنية أم الفشل ..
* وإذا كنا نتحاشي عن قصد الحديث عن المشكلة المالية التى يمر بها فريق الكرة فان الوقت قد حان للحديث عنها ..
* هنالك مشكلة مالية يمر بها فريق الكرة ، والحديث الدائر بخصوص عدم إستلام حوافز مباراة القمة نهاية العام الماضي هو حديث صحيح ، والحديث عن عدم صرف المرتبات منذ نهاية العام الماضي هو حديث صحيح أيضا ..ً
* دي الحقيقة الداير يصدق يصدق والما حابي يصدق فله مطلق الحرية ..
* بس دي الحقيقة ..
* عدم وجود ميزانية واضحة لفريق الكرة أيضاً لا يعفي اللاعبين من التقصير في المباراة الأخيرة ..
* لا يعقل أن تلعب امام جمهورك الذي تجاوز عدده الـ(50) ألف مشجع ثم تفشل في التأهل على حساب فريق مغمور يلعب بعشرة لاعبين ..
* الكلام ده عيب ..
* علي بالقسم لو في إحساس يفترض اللاعبين ديل (يفرتقوا) هذا الفريق المغمور ..
* لو في إحساس جمهور قدر ده ما بيرجع زعلان ..
* لو في إحساس الهلال ما بطير من داخل إستاده ..
* تخاذل وإنعدام إحساس وتوهان ..
* لا نفعت الخبرة ولا شفعت الأعمار الكبيرة ..
* كاريكا الذي يعتبر من أكبر اللاعبين الموجودين في دوري أبطال افريقيا هذا العام لا يزال (يتلبد) من الكورة، ولا يزال يتواضع في المباريات الكبيرة ..
* وين خبرة كاريكا ؟؟
* كاريكا إتعود يسخر خبراته في المباريات الصغيرة وعندما تأتي المباريات الكبيرة لا بنلقي خبرة ولا بنلقى كاريكا ..
* والأسوأ من ده كلو أي ضربة ثابتة كاريكا داير ينفذها ..
* أرجع الآن لشريط مباراة الموانئ ستجد أن الهدف الذي ولج مرمى الهلال سببه الأول كاريكا ..
* نفذ كاريكا الركنية بطريقته العشوائية فإستلمها لاعب الخصم فكانت هدف ..
* الخبرة هي أن تكون مثل مهند الطاهر (تؤثر) على النتيجة وتحل ضيق فريقك وقت الضيق ..
* مهند الطاهر ينقل هلال الأبيض من نجاح لنجاح ويقدم كل خبراته لصالح الفريق ..
* وكاريكا (يلبد) في المباريات الكبيرة ويأتي ليتألق أمام مريخ كوستي والرابطة وأهلي مدني ومريخ الفاشر ..
* مريخ الفاشر والرابطة وأهلي مدني نحن غير محتاجين فيها لخبرة كاريكا ..
* محتاجين لكاريكا في المباريات الكبيرة لأنه يفترض أن يكون كبيراً ..
* الزول بيكون كبير بتأثيره يا كاريكا ..
* واحدة من أهم أسباب إصلاح الحال في الهلال لابد أن نتحدث عن عيوب الهلال في الهواء الطلق وبشجاعة ..
* تقول للأعور أعور عشان الحال ينصلح ..
* ما تبقوا زي ناس المريخ كلما خسروا يرددون (نهواه في كل الظروف) حتى أصبح فريقهم من صغار أفريقيا ..
* الهلال غير ..
* أي زول داير ينتقد ينتقد بدون إساءات وبدون مصالح ..
* نثبت حق الكاردينال في الإنجاز الذي تم فيما يتعلق بالجوهرة ولكن يخصوص فريق الكرة (صفر على الشمال) ..
* و..و..
* والله في ..
