صحيفة كورة سودانية الإلكترونية

انتظروا (الركشات)

2٬513

صابنها

محمد عبد الماجد

انتظروا (الركشات)

 

• قلت ليكم قبل كدا الجاكومي كب ليه (قلاب رملة) في استاد المريخ وطلع بعد الصورة التى التقطها لقلاب الرملة في استاد المريخ ونشرها في صفحته الرسمية يتحدث عن تأهيل الاستاد وعن القلعة والحمراء وعن حربهم للهلال.

• يا الجاكومي عاوزين تحاربوا الهلال بـ (قلاب رملة).

• كدا اصبر لمن تكبوا ليكم قلابين تلاتة .. ثم تعلنوا الحرب على الهلال.

• قلاب رملة واحد ما بعمل ليكم الحبة.

• مجلس كل انجازاته (قلاب رملة) عاوز يحارب الهلال ويعيد قيد التش وطيفور والتكت ورمضان عجب واحمد ادم بيبو.

• مجلس حازم كنا نطلق عليه اسم مجلس جمعية حديقة الموردة .. الفيفا وكاس اكدوا عدم شرعية هذا المجلس فجاء اتحاد الكرة السوداني بحازم والجاكومي من جديد في لجنة تسيير للمريخ.

• عارفين مجلس المريخ المعين دا اسمو مجلس شنو؟

• اسمو مجلس قلاب الرملة.

• زي ما كان مجلس جمال الوالي اسمو (بص الوالي) … فان مجلس المريخ الحالي اسمو مجلس قلاب الرملة.

• يعني تاني من اقول ليكم مجلس قلاب الرملة فذلك يعني اني اتحدث عن حازم مصطفى والجاكومي.

• براكم بتجيبوا الكلام لي روحكم.

• بالمناسبة سواق قلاب الرملة الجاكومي لغاية الآن ما حاسبو.

• الجاكومي منتظر (الدعم السريع) تحاسب ليه.

• يعني هو يأخذ الصورة … والدعم السريع يدفع الحساب.

• والله فالح.

• دي حميدتي ما بعملها ليكم.

• مجلس (قلاب الرملة) اوقع المريخ في كارثة جديدة.

• حيث جاء في الاخبار امس : (أصدر الاتحاد الدولي لكرة القدم”فيفا”، الجمعة، قرارًا صارمًا تّجاه نادي المريخ، قضى حرمانه من التسجيلات لثلاث فترات متتالية . وجاءت خطوة لجنة الانضباط بـ”فيفا”، على خلفية عدم التزام نادي المريخ بدفع مستحقات اللاعب النيجيري أديلايي أولميايكلان والتي تبلغ 59 ألف دولار. وتسلّم الاتحاد السوداني لكرة القدم، الخطاب رسميًا من”فيفا”، يطالب بتنفيذ العقوبة على النادي).

• مجلس قلاب الرملة فشل في سداد متأخرات اللاعب النيجيري اديلايي أولميايكلان والتي تبلغ 59 ألف دولار في الوقت الذي يتحدث فيه حازم مصطفي رئيس مجلس قلاب الرملة عن (15) مليون دولار لتأهيل استاد المريخ.

• تتخيلوا مجلس يفشل في سداد 59 الف دولار ويتحدث في الوقت نفسه عن (15) مليون دولار لتأهيل استاد المريخ!!

• انتوا حازم دا بضحك على منو؟

• تأهيل استاد المريخ غير (قلاب رملة) ما شفنا فيه حاجة.

• حازم مصطفى عاوز يؤهل استاد المريخ بحق (الركشات).

• انتظروا (الركشات) عشان تأهلوا استاد المريخ.

• يا.

• شيل نفس طويل.

• عشان ح اطلع فاصل وارجع تاني.

• شوفوا حازم رئيس مجلس قلاب الرملة قال شنو في قناة النيل الازرق.

• والله انتوا ذاتو يا ناس قناة النيل الازرق فايقين وما عندكم موضوع.

• (أعلن رئيس تسيير نادي المريخ السوداني حازم مصطفى، عن أنّ الاستاد يحتاج إلى 15 مليون دولار، للتأهيل بصورةٍ سليمةٍ. وقال حازم مصطفى في تصريحاتٍ لبرنامج مساء جديدٍ بقناة النيل الأزرق، الجمعة، إنّهم في اللجنة لا يريدون صيانة الملعب والعودة من جديد للمشاكل. وأشار إلى أنّ عائد وأرباح الركشات من اتّفاقية النادي مع شركة جياد، سيعود لتأهيل الاستاد. وأضاف” نحن مستعدّون للدفع”. وأوضح حازم مصطفى، أنّ جمهور المريخ ”شفقان شفقة شديد” ـ على حدّ قوله ـ ، لكنّه أشار إلى أنّهم سيعملون بما لديهم).

• زول ما قادر يدفع 59 الف دولار هل يمكن ان يدفع 15 مليون دولار.

• إلّا اذا كان عندو في الـ 15 مليون دولار قدرهم.

• كدا ادفع 59 الف دولار.

• حازم قال عائد ارباح الركشات سيعود لتأهيل الاستاد.

• يا…

• عييييك.

• شيل نفس طويل.

• نفس عميق شديد.

• الكلام دا بعيد شديد يا حازم.

• موضوع الركشات دا لسه حبر على ورق .. ما في لغاية الآن ركشة واحدة طلعت .. وحازم منتظر من عائد ارباح الركشات تأهيل استاد المريخ.

• معقولة حازم دا يكون قاعد للوقت داك.

• ما عاوز احلف.

• لكن يا حازم ركشاتك دي لو بقت (قطارات) ما بتعمل حاجة.

• لو بقت (طائرات) ناهيك عن ركشات ما بتأهل استاد المريخ.

• على كدا .. نقول للجاكومي من الآن امسك قوى في (قلاب الرملة).

• الظاهر كدا ما عندكم اكتر من (قلاب الرملة) دا لتأهيل القلعة الحمراء.

• حازم مصطفى قال ، أنّ جمهور المريخ ”شفقان شفقة شديد”

• بعد دا كلو وجمهور المريخ هو الشفقان.

• والله لو جمهور المريخ ما شفقان ما كان زول زي حازم مصطفى بيبقى رئيس للمريخ.

• مفروض حازم يشكر جمهور المريخ على انه اتحمله رئيسا للمريخ.

• مطلوب من جمهور المريخ ان يترك الشفقة .. وان ينتظر عائد ارباح الركشات.

• والله دا صبر يحسدوكم عليه يا مريخاب.

• ح تنتظروا تلقطوها من الركشات.

• ركشة .. ركشة.

• مشوار .. مشوار.

• مع المتاريس دي نحن ذاتو ما عارفين ح تلقطوها كيف؟

• دي مصيبة شنو الوقع فيها المريخ دي؟

• مزمل ابوالقاسم زمان لمن الكاردينال اعلن عن تأهيل استاد الهلال وقال ح نعمل الاستاد ثلاث طوابق .. طلع علينا مزمل وقال الكاردينال تعاقد مع شركة صينية للبزازات والمرايل عشان تقوم بتأهيل استاد الهلال.

• الايام لفت ومرت .. واستاد الهلال بقى ثلاث طوابق ومزمل ابوالقاسم لغاية الآن ما اعتذر عن شركة البزازات والمرايل.

• الشيء الغريب ان حازم مصطفى رئيس المريخ طلع علينا وقال ح يقوم بتأهيل استاد المريخ عن طريق عائد ارباح الركشات.

• مزمل ما قال أي شيء.

• ولا جاب سيرة أي ركشة.

• اها احسن شنو؟ شركة البزازات وإلّا الركشات؟

• قلنا ليكم الهلال (رجل صالح)… وحق الهلال يرجع الآن .. ومن قالوا ان الشركة الصينية التى سوف تأهل استاد الهلال شركة بزازات ومرايل طلع ليهم حازم وقال ليهم تأهيل استاد المريخ سوف يكون من عائد ارباح الركشات.

• 15 مليون دولار ح ينتظرها المريخاب من الركشات.

• شوفوا كراسي المقصورة عاوزة ليها كم مشوار؟

• وغرفة ملابس اللاعبين … والله دي لو رقشاتكم بقت تقطع الكبري ما بتعملوها من ارباح عائد الركشات.

• شوفوا الزول دا بفكر بعيد كيف؟

• منتظر عائد ارباح الركشات عشان يقوم بتأهيل استاد المريخ.

• يا.

• شيل نفس طويل.

• والله نحن ساكت ظلمنا الكاردينال.

• الكاردينال عمل استاد الهلال ثلاثة طوابق .. ما حصل في يوم جاب ليه سيرة (ركشة).

• ولا شفنا لينا (قلاب رملة) واحد.

• شكرا للكاردينال.

• ………….

متاريس

• قلنا ليكم تجارب المريخ الودية مع سان جورج بتخدم مصالح الهلال.

• قعدتوا تغالطوا.

• شيلوا نفس طويل.

• (انجز الكابتن محمد احمد بشير “بشة”، محلل الاداء بالمنظومة الفنية لنادي الهلال، مهمة ناجحة تتعلق بدارسة نادي سانت جورج الاثيوبي، منافس الهلال على ورقة الترشح للتمهيدي الثاني من مسابقة الابطال، وتحصلت “ريمونتادا” على معلومات مؤكدة من مصادرها عالية الثقة، تؤكد ان ادارة الازرق أوفدت “بشة”، الى اثيوبيا منذ الاسبوع المنصرم، في مهمة خاصة بمتابعة المباراة التجريبية التي جمعت بين سانت جورج الاثيوبي والمريخ على ملعب الاكاديمية باثيوبيا، وهي المهمة التي انجزها “بشة” متخفيا، حيث اكتفى بمتابعة كامل اطوار التجربة من بعيد، ورصد كل صغيرة وكبيرة عن المنافس الاثيوبي، ليعزز مهمة تحليل “سانت جورج” في الشقين الفردي والجماعي، خاصة وان محلل الاداء بنادي الهلال، كان قد تابع ايضا بعض المباريات المتلفزة للفريق الاثيوبي، من بينها المباراة التجريبية التي خاضها سانت جورج امام سيمبا في دار السلام).

• شفتوا المريخ دا نفعنا كيف؟

• اصلوا ما قصروا معانا.

• ناس طيفور والتش والتكت وبيبو ورمضان عجب بعد كدا ما بلقوا حرج في عدم اعادة قيدهم للمريخ.

• سيستم المريخ قفل.

• اخذوا راحتكم؟

• الصيني ارتاح.

• شوفوا ناس المريخ عاوزين يعاقبوا الهلال بحرمانه فترة .. الفيفا حرمتهم ثلاث فترات.

• لكن قبل تأهيل الاستاد مفروض تشوفوا ليكم ركشتين خفاف عشان تطلعوا حقوق اللاعب النيجيري اديلايي أولميايكلان.

• 59 الف دولار عاوزة ليها كم ركشة؟

• شوفوا جياد سريع.

• وممكن الاستعانة بالدعم السريع.

• الموضوع ما بيستحمل.

• ……….

• ترس اخير : الركشات تتقطع ليكم .. تعمل شنو ولّا شنو ولّا شنو؟

قد يعجبك أيضا
5 تعليقات
  1. كمال الدين يقول

    قسما بالله انا قاعد لوحدي في غرفة واقرأ في موضوعك …كلما امر من سطر فاضحك لدرجة القهقة.. يازول الناس ديل انا متأكد لو اي واحد فيهم قرأ كتاباتك عنهم سيصاب بجلطة دماغية اضربهم ضربا مبرحا وبالحتة الفيها الحديدة لتسكت تلك الاصوات النشاذ أمثال المدعي مزمز ابو القنابل صاحب عمودكبد الحقيقة وهو من المفترض يسمي بكبت الحقيقة ودفنها حية تتعذب داخل قبرها .لان عنوان العمود يتنافى مع كل المواضيع التي يسكب فيها صاحب العمود العمود مدادا مهدرا

  2. ابوعبدالله الخضرابي يقول

    اضرب الحمام با العليقي
    التش وطيفور ولن تقوم للوصيف قائمة مع منعه من التسجيلات لكن اتحاد اللقيمات بكره يزوروا لهم عقود باثر رجعي

  3. ربيع عبدالله يقول

    نفسي اعرف الزول ده صفة صحفي ده اكيد ولا تطلق عليه مجازا،
    دي حاجة!
    الحاجة التانية نفسي الراجل يتكلم عن الهلال اكتر مما يتكلم عن المريخ،
    والله لو اصلا كان مهتم بتطور فريقه وكيفية حصوله على كأس محمول جوا، كان ما لقى طريقة عن التكلم في الآخرين،.
    عجبي؟؟؟؟؟؟

  4. بابكر بشير يقول

    سبب اخفاقات الهلال هو محمد عبد الماجد
    كما هو الحال في المريخ فسبب انتكاسات المريخ في كتابات مزمل ابو القاسم

  5. ابو مصعب يقول

    محمد ع الماحد نسي مرشخ الهلال
    كان بتع شنو ما بتع ركشات وهذا ليس
    منع.. الركشه اخير نن سيارتك لو
    اصلا انت عندك سياره.. الركشه
    بكام 3 مليار انت سعر سيارتك اقل
    من سعر الركشه.. ابكوا يا ناس
    الرشاشات حازم جدد لتش ايقونة
    الكره السودانيه ولطيفور والبقيه
    خم وصر..
    الجاكومي ارجل راجل سوداني حار
    ترك الجماعه الطيبين يحتمون
    بالحركات المسلحه وبعدين انت
    ما دخلك بالوالي ايام الوالي كنتم
    في الحضيض والوالي الغالي اعتبره
    من اعظم رؤساء المريخ.. رحل وقوز
    ورزين انساني يحب المريخ اتي بلاعبين
    من العيار الثقيل.. ايداهور.. جابسون
    ايفوسا.. وارقو.. اغلي لاعب في
    افريقيا في ذاك الزمان حتي كلتشي
    تم رصده من قبل المريخ ولكن وفد
    الهلال سافر بكير وفاوض كلاتشي
    وتدخل وفد المريخ في الموضوع
    ولكن الوالي تحدث لوفد المريخ
    بان يتركوا اللاعب هذا هو الوالي
    الرحل المهذب في طبعه..
    يا محمد ع الماحد خالد عزالدين
    كان متلك وكثير من اعلام الهلال
    من اعلام الفول مثلكم..

    ساي والمريخ امامكم ولحقدكم
    كونوا في صفركم الي ابد الابدين..

اترك رد

لن يتم نشر عنوان بريدك الإلكتروني.

يستخدم هذا الموقع ملفات تعريف الارتباط لتحسين تجربتك. سنفترض أنك موافق على ذلك ، ولكن يمكنك إلغاء الاشتراك إذا كنت ترغب في ذلك. قبولقراءة المزيد