صحيفة كورة سودانية الإلكترونية

اهلي الجرافة زعلانين

4

في السلك

بابكر سلك
اهلي الجرافة زعلانين

*عملت من اخ عزيز ان الاهل بالجريف ماخدين علي خاطرهم من عبارة وردت بعمودي اول امس
*قصة الاهلة في الجريف دايرين يبيعوا بيوتهم
*طبعا الموضوع ببساطة يتعلق بمزحة علي وقعت حسين الجريف
*ولعل الاخوة الاهلة بالجريف ستروا تلك الوقعة خلف دعابتي
*ولكني لم اقصد طبعا المساس بالجريف ولا اهلها
*فالجريف العريقة الناس جوها ما جاتهم هي
*ومهما تطاول البنيان وتغيرت الاسامي
*تبقي جريف الاصالة هي الجريف
*ومسميات شارع الستين والمعمورة والممطورة والحي الفلاني
*ده بالنسبة للناس الجداد
*اما القدام ناس الاصالة فالامر كله عندهم جريف
*من الشيطة وحتي اعلي عمارة واكبر حيطة
*نحنا في المريخ تربطنا العلائق الطيبة بالجريف واهلها
*ولن ننسي قصة تسجيل معاوية الجريف للمريخ
*حينما سدد رئيس نادي الجريف حافز التسجيل من جيبه واهدي معاوية للمريخ
*خلي اي شى
*الموقف ده بس بجبرنا علي احترام الجريف واهلها
*لذا علي اهلة الجريف البحث عن شماعة تانية يعلقوا عليها وقعت حسين
*ايها الناس
*الجريف هي احد اهم روافد النجوم
*حمد ومعاوية واولاد بخيت وادريس وحمد الهلال وغيرهم كثر
*لذا تجد عندنا الاحترام والاهتمام ورفع التمام والقبعات
*ياناس الجريف لكم العتبي
*لكن وقعت حسين شينة
*المتر في الجريف اغلي من المتر في نيويورك
*تقول لي استفزاز كيف بس!
*المهم
*بعض الشفوت زعلانين من عمود كسير التلج
*وهو عمود مكمل للعمود القبلو عن حقارة العرب بينا
*العنوانو كان نحنا عاد ما اولاد بلال
*النقد فيه واضح وموجه للجهات المعنية
*دولة واتحاد وإدارات اندية وبعض من الجماهير
*ماعيب نعبر عن سلوكنا القويم
*ولكن العيب قولة الحق التي يراد بها الباطل
*وسائل التعبير كانت كثيرة
*ولكن الدوافع مختلفة
*وعلي الناس ان لاتلبس الطاقية من طرف
*فالطاقية مفصلة علي مقاس محدد
*هناك بعض تعبيرات جاءت لاغراض غير الواضحة
*انا اعلمها جيدا
*وللمعلومية
*عبارة آنستونا وشرفتونا وونستونا
*كانت باقتراح مني
*لان السطر الفوق قال
*الاخ التوأم
*وكلنا نعلم بالتوأمة الموقعة بين المريخ والوصل منذ التسعينات
*فليست كل التعابير كانت المقصودة
*ولكن المقصودة تعرف نفسها تماما
*وارجو ان لا نفصح اكثر
*المهم
*نجي لي حجوة ام غريزينة
*قضية غارزيتو
*ماذا فعل المكتب التنفيذي حيالها منذ اول مخاطبة من الفيفا؟؟؟
*العقوبة والمطالبة بالسداد مابتجي علي الطائر
*الموضوع بمشي بمراحل
*ماذا فعل مكتبنا التنفيذي في تلك المراحل؟؟؟؟
*قصة غرزة دي دايره ليها مؤتمر دولي
*ووسيط اثيوبي
*وضغط من منظمات العمل الطوعي الانساني
*عشان الباب ده يتقفل
*بالمناسبة
*المجلس عارف انو في مشكلة اسمها مشكلة غارزيتو؟؟؟
*ما اظن
*ايها الناس
*ان تنصروا الله ينصركم
*اها
*نجي لي شمارات والي الخرتوم
*والينا
*الباعوض ماهامينا
*الضبان ماهامينا
*الرغيفة قدر الزرارة ماهامينا
*المدارس تقفلوها ماهامينا
*المدارس تفتحوها تقع فينا ماهامينا
*كيلو اللحمة بنص مليون ماهامينا
*كيلو الطماطم بقي مجنون ماهامينا
*وكيلو الخيار ده ياهو زاتو الجنون ماهامينا
*طبق البيض يودي السجون ماهامينا
*الحكومة متين بتشكلوها لينا؟؟؟؟
سلك كهربا
ننساك كيف والكلب قال قصة يأجلوها كل ٤٨ ساعة ٤٨ ساعة تاني ذكرتني بتاع الحافلة الكاتب بكرة الركوب مجاني
والي لقاء
سلك

قد يعجبك أيضا

اترك رد

لن يتم نشر عنوان بريدك الإلكتروني.

يستخدم هذا الموقع ملفات تعريف الارتباط لتحسين تجربتك. سنفترض أنك موافق على ذلك ، ولكن يمكنك إلغاء الاشتراك إذا كنت ترغب في ذلك. قبولقراءة المزيد