ايوووي…عقدوا

0
29

 

في السلك

بابكر سلك
ايوووي…عقدوا

*عندما انطلقت الثورة بزغرودة كانت الخطوبة
*وحينما عانقت ارواح الشهداء السماء كان سد المال
*وحينما تعاهد الاحياء علي المضي علي خطي من قدموا العمر مهرا للوطن كانت الشيلة متكفي
*يا نجيب حقنا يا نموت كلنا
*ودم الشهيد ماراح الليلة سقطت صاح
*بعد الخطوبة بعض الناس حاولوا يفركشوها
*وشبكونا ليك عندنا شورة وعندنا نافورة
*فكانت مجهودات خيلان العريس الافارقة
*الزرق الطوال والسمر السمحين
*طيروها للدايرين يفركشوا العرسة من راسهم
*وفندوا لهم حججهم الواهية
*فكانت اولي اغاني الاحتفال
*يازاهية يا لاهية قلبي الشلتي جيبي
*بالاصرار تم العقد
*وكما انطلقت زغرودة عند الخطوبة في التاسع عشر من ديسمبر ٢٠١٨
*انطلقت زغرودة عند العقد في السابع عشر من اغسطس ٢٠١٩
*كأننا يوم الخطوبة قلنا العرس خلال سنة
*واوفينا بعهدنا
*تم القران
*عقدوووووا
*وانطلقت زغاريد
*عرس السودان من المدنية
*وتبقت زغرودة
*نحتفظ بها للسماية
*فالدعوات كانت
*ان شاء الله تغلبها بالمال وتغلبك بالعيال
*نحتفظ بالزغرودة الفضلت للسماية
*لايهمنا ان يكون المولود ولد ولا بت
*فكنداكاتنا اثبتن ان لافرق بين ولد وبنت
*الجميع مثلما شارك في الثورة سيشارك في البناء والتعمير وازالة اسباب وآثار التدمير
*تجيب مانجلك تجيب كنداكة كلو حلو
*كلو واحد
*ومبروك ياسودان
*ايها الناس
*في بحثنا عن هويتنا اخترنا سودانويتنا
*ومن الحضور الذي شارك في اتمام واكمال نجاح الثورة كانت افريقيتنا بائنة جدا
*يبقي البدورك ولا التدورو يا سودان
*ايها الناس
*كان يوما عظيما
*كان يوما للاستنساخ
*فمن خطاب الاصم نستنسخ المحجوب
*ومن اشراقات اسراء عادل وبلاغتها وحضورها استنسخنا ليلي المغربي
*وقبل كل ذلك جينات جيل اكتوبر التي ظهرت في شارع الثورة
*تؤكد ان ذلك استنساخا لذلك الجيل
*وفعلا
*الطلقة مابتكتل بكتل سكات الزول
*تلتين سنة ساكتين
*جانا وجع اضنين من الكذب ومن عبارات علي شاكلة الحس كوعك
*والراجل يمرق الشارع
*ورب رب رب
*وجهل مطقع
*وغرور مغرور
*حتي عفنت الكلمات جوة اضنيننا
*اشتقنا للكلام النضيف وابينا الكلام المغطغط وفاضي
*تركنا الاجماع السكوتي
*والسكوت الاجماعي
*فتهنت مسامعنا باحرف الدقير المهذبة ولغة الخطاب الجميل
*ايها الناس
*الفات ده كلو الساهل
*يادوب دخلنا في الصعب
*بناء دولة ماساهل
*يحتاج لتضحيات هي فرض عين علي الجميع لا فرض كفاية ان قام به البعض سقط عن الآخرين
*كلنا لازم نقدم
*وعشان نقدم لازم نغير سلوكنا السلبي لسلوك ايجابي
*حتي تتغير مفاهيم كتيرة تم ترسيخها بامثال كثيرة علي شاكلة ان فاتك الميري(مال الحكومة) اتدردق في ترابو
*تاني ميري مافي
*مال الحكومة زي المفاعل النووي
*تهبشوا بطرشق فيك ويوديك
*تاني البلد مابتتحمل وزير حرامي او زوجة رئيس لباعه او اخوان رئيس زلمطحية
*الرئيس زاتو مجرد موظف حكومة خادم للشعب
*كل السلوك القديم الذي تم فرضه علينا
*يجب ان نقابله بعبارة العصر الجديد الواثقة من نفسها الساخرة من المساخر
*أه..وييين يا

*ايها الناس
*السؤال الذي يطرح نفسه علي الساحة دوما
*البلد دي عملت لي شنو
*يجب ان يصحح ويعدل لسؤال يحمل مضامين الحراك وهدف الثورة ليقول
*انا عملت شنو للبلد دي
*لو كل زول فينا سأل نفسو السؤال ده
*بالتأكيد سنطأطئ الرؤوس امامك ياوطن
*سنشعر بالقصور
*وسيشعل ذلك فينا فتيل الانتاج والتضحية لاجل وطن بقامة قاره
*وزي ماقال اكرم زكي
*يابلد
*ان انستينا وقودا اشعلينا
*وان وجدتينا حطاما اتركينا
*وما اعظم وقودك ياوطني
*شبابا تشابك شديد الزحام لاجلك ياوطن

*ايها الناس
*في توقيع الامس اعلان لترك السلوك السالب
*اعلان لترميز خطوط الحد الفاصل بين الحرية والفوضي
*بين الحق والواجب
*بين حقك وحق الوطن وحق الغير
*الحرية ليست عشوائية
*ولكنها قانون
*قانون يؤطر لدولة القانون
*قانون يسود ينهي خيار شيخ فلان وفقوس شيخ علان
*داك عهد اجمل مايقال فيه
*أه وييين يا

*لذا الحرية نار ونور
*ومن اراد نورها فليصلي بنارها
*ونار الحرية هي التقيد بالقانون والاعتراف بحدود وحقوق الغير
*وقبل كل ذلك حق الوطن علينا
*وشفت التوب
*وسيد التوب
*وما لاقاني اجمل منو
*كان التوب الابيض حضورا انيقا علي ارض الاعتصام علي اكتاف ايقونة الثورة آلاء صلاح
*وكان نفس التوب الابيض الانيق حضورا مشرفا مثقفا بهيا يوم التوقيع علي اكتاف اسراء عادل
*ولعل التوب الابيض يشكل رمزيه لمعان عديدة
*منها المرأة العاملة
*وما احوج مجتمعنا للمراة العاملة في شتي المجالات
*وكل التحايا والتجلة والاحترام لكنداكات بلادي
*كنداكة كنداكة
*وكان دو كان داكا
*ايها الناس
*انتصر شبابنا علي البعاتي وام بعلو
*ونحنا مرقنا
*بايدي لاتحمل الكف منها الا ارواح الشباب
*فانتصرت السلمية علي العنجهية والنفخة الكذابة وكل وعيد الحرامية
*قال لينا الراجل يمرق
*فخرج اليك الشباب يا ابو الشباب
*ولحست كوعك وبوعك ودشرت حق الوطن في دقائق معدودات
*ايها الناس
*لن تكتمل الفرحة الا بالقصاص من قتلة الشهداء
*ومعرفة مصير المفقودين
*واعادة اموال الدولة
*وكشف القناع عن كل الوجوه التي قبحها الله
*زمن الغتغيت انتهي
*الاصم
*حلا وحمار
*احب البطيخ زاتو
*هكذا هو الشباب الثائر المثابر
*شباب الثورة
*موش رب رب رب وكلام مغتغت وفاضي
*وياسلام
*لما تملي الافق اناشيد وردي ومحمد الامين والعطبراوي والسلام الجمهوري
*انتوا شنان وين؟؟؟؟
*ايها الناس
*جشع لأ
*استغلال الانسان لمنصبه او لاخيه الانسان لأ
*جهوية لأ
*قبلية لأ
*جلدا ماجلدك تجر فيهو الشوك لأ
*لانه جلد يحميه القانون
*ثم ماذا في خصوص نفايات الصين وشمالنا الحبيب؟
*الحتة دي دايرة تحقيق وبلاغ واعدام في الشارع العام
*لان من قتل الناس بالسرطانات كمن قتل الناس بارض الاعتصام وكانه قتل الناس جميعا

*لكن فرحانين بالتوقيع
*وقال الحبيب اكرم
*يا وطن في قلبي دقات اسمك ايقاعها بيزيد
*ياوطن في عيوني رسمك لوحة النيل والخلود
*ياوطن ساعاتنا دقت واعلنت انك في عيد
*ياوطن في قلوبنا انت ونحنا بحبك نجود
*انت انت وانت لينا وياوطن يكفينا انك في بطاقاتنا الاسم
*نحنا نفخر بيك سمعه وانت شمعة تضوي لينا وياشرف اسمك يدقدق في جوازتنا الختم
*ايها الناس
*تاني زول بغشنا ويدخلنا الجامع عشان يسرق شباشبنا مافي
*زول بقدر يمنعنا صلاتنا وصيامنا وقيامنا مافي
*زول بقدر يقفل مساجدنا وكنائسنا مافي
*العلاقة بين المخلوق والخالق علاقة خاصة لاتقبل التدخلات ولاشفاعة فيها الا للمصطفي الحبيب
*فكونا من الفارغة ومقدودة ومغتغته
*بالمناسبة
*التوقيع تم ولا ربنا قبل ابتهالات الشيخ داك؟؟؟
*ماقبلها!!!!
*ايها الناس
*ان تنصروا الله ينصركم
*وان تخلصوا للوطن يمتعكم
*اها
*نجي لي شمارات والي الخرتوم
*والينا
*ارتحنا من عنقالي في موية الطين يخوض لينا
*ارتحنا من غابات الاسمنت المسروقة الملت المدينة
*ارتحنا من الكضب وربربة الفارغة الفينا
سلك كهربا
ننساك كيف والكلب قال البلد دي حقتنا مدنية حكومتنا
والي لقاء
سلك

المشاركة

أكتب رد

أدخل تعليقك من فضلك!
أدخل إسمك هنا من فضلك