بدون ميديا احلى

0
278

عن كثب

ادراك عبدالرحمن

اصبحت المديا تشكل هاجسا كبيرا فى اوساط المجتمع.. العالم كله اصبح يشكو التواصل الاجتماعى..والانعزالية الالكترونية لان سرعة انتشار الاخبار وسهولة الاتصال اصبحت مرعبة الكل  يضع سماعات فى اذنيه… يسد اذنيه زمان يقوليك سادى اضنيه دى بى طينه ودى بى عجينه الان الكل فى اذنيه سماعتين واحد واتس والتانيه فيسبووك حتى التلفزيون الذى كان يجمع الاسرة بداء يتلاشى الونسة فى حلقات والترابط الاسرى اصبح معدوم قروبات داخل قروبات وهذه الكلمة تعربت من كثرة تداولها..عندما كنا صبية كنا جزء من الاتصالات …كنا المرسال وحلقة الوصل وبرغم سخونة الدافورى تطل المرأة برأسها وتكوس صبى سريع ومطيع لقضاء حوائجها وترسلوا الدكان لاستجلاب بصل مكاده. . وزيت فتذهب وانت مرغم..ولابأس  قليلا من النقنقة..وهناك مراسيل عجيبة وسخيفة الوليه تقوليك كوسلى (عبده)قالوا بلعب كوشتينه فى الحلة وطبعا دى ساهله جدا بتكون عارف (وارينها)وين واول ما تصل الشله بكون عارفنك مريسيل وتلقى عمك عبده ورقو يطقطق قافل وتقوليهو الرسالة(عم عبده مرتك قال تعال هسى دى..ناوو)طبعا بكون كارهك وغالبا ما يقوليك خلاس غور خلاس …رغم انو ماعندك ذنب..واسواء المراسيل يقوليك امشى البلد كلم ناس فلان قوليهم علان عمليتو فى المستشفى بكرة واركب لورى عبدالصمد قايم بعدين تخيل الان (اس ام اس) ينهى العملية فى ثوان ..راكب لورى شاحن بصل وسته ساعات يمشى ويقيف عشان تقوليهم العقد الخميس ممكن تلغراف لكن التلغراف كلمة وغتايتها …فلان مات…او عباس سافر..لكن المرسال بكون فيهو تفاصيل اوفى..اجمل مافى الا موبايلات قراءة المجلات وتبادلها كانت بيروت تغرق السودان بالمجلات العالمية سوبرمان..الوطواط بات مان..بونانزا..الفارس المقنع..وتتم الترجمة ببيروت لبنان مجلدات وقصص والغريبة سوقها فى السودان هو الرائج وتجى تستنكر عروبة السودان..فسوبرمان هو نبيل حلمى الشخصية السرية لسوبرمان وصديقه نديم والحسناء الجبارة ورندا عشيقة سوبرمان..والوطواط اسمه صبحى وصديقه زكور …الغريبة لم تستعمل بيروت وتحاشت فى الترجمة اسماء اسلامية كان الوطواط يكون اسمو عبدالله والحسناء الجبارة ..فاطمة..وهلم جرا..وبيروت ترجمة  كل الافلام ومعروفين معامل خورى وعبيد ولا انيس عبيد…عموما كنا نتبادل المجلات وتأخذ حزمة وتبحث فى الحلة عن شخص تتبادل معه المجلات وقد تعود بحزمة جيدة تكفيك نهارين تتصفح وتستمتع بالقراءة.

ومن اسواء المراسيل ابلاغ اللعيبة المنتخبين مع التوقيع والخطورة تكمن فى الاخطار والتصرف بلباقة عندما يفتحيك ليك ابوالولد الباب..ولازم تكون حافظ البيت الفيهو كلب شرس ..والمافيهو كلب ..لانو فى كلاب اول ما تجر السلك بجوط جوطه ..يحيرك..ومرات يجيك ابو الولد النوع البقد الكوره وبكرهها لازم تكون لبق وتشيل حكاية المنتخب خالص..والايكون نصيبك رصعه قوية…لكن الرسالة بتكون وصلت لصاحبك فى البيت..

كان المجتمع بدون مديا ينبض بالتلاحم وعدم الانعزال كنا نذهب الى دور السينما فى شلليات وتتعالى اصواتنا نحكى ونضحك.. الان رغم التقدم لكننا اصبحنا فى عزلة..الكل ملق اذنيه حتى زوجتك وزوجك وابنائك فى عزلة مع صداقات وشخصيات غالبا ما تكون مزيفه ووهمية وازهاق الوقت الذهبى..سدى.

قصاصات

اللاعب شيكا فوفانا والذى سجل هدف فى صقور الجديان فى سيراليون وبعدها سجل نزار التعادل ومازدا يكورك نو نو..سيوقع للمريخ وبالمناسبة اللاعب الذى سيقود المريخ كان يلعب فى تشيكيا نادى اسمو متواضع وطيش الدورى وعلى كمان الله شفع التانية يغلبوه اسم الفريق فريدك ميستيك.MFK Frýdek-Místek

ومغلوب يوم 25/11/2017من اف كى.باردوبيسى و2/0 فريق متواضع لى درجة  والفيديو موجود عند نادى فريدك ميستك ولا ناكرين المطيشه..هو لاعب عندو دراد هير جامايكا وممشط المهم ياعمك يسكت ناس المريخ بى شعيراتو ديل..لكنه هزيل..فنيا..وخشمى وعندى..

ايعقل ان يمدد الصاوى العقد ويسافر وبعد سنة يرجع للعش الاحمر..ناس المريخ ..بصراحة طماعين.

بكرى المدينة انتهى اتحاد اللقيمات ولا صاجك مولع لسع..

يقوليك كاريكا وبشه ينجون من الشطب لا والله نحن ربنا شافنا من الطبيز…

قناة الهلال متعة العطاء الى الامام..

التحية الجديدة لاولاد الهلال ..هاى كاردى…

بدور ببكى

شمهروش فى اجازة وبسأل عن خشم الموس.والمريخ الراح..

تحياتى

(ولقد خلقنا فوقكم سبع طرائق وما كنا عن الخلق غافلين)

 

 

 

حمل تطبيق كورة سودانية لتصفح أسرع وأسهل

لزوارنا من السودان متجر موبايل1

http://www.1mobile.com/net.koorasudan.app-2451076.html
3,699 حملو التطبيق

لزوارنا من جميع انحاء العالم من متجر قوقل

https://play.google.com/store/apps/details…

13230 حملو التطبيق

على متجر mobogenie

http://www.mobogenie.com/download-net.koorasudan.app-357365…
5000+ حملوا التطبيق

المشاركة

أكتب رد

أدخل تعليقك من فضلك!
أدخل إسمك هنا من فضلك