صحيفة كورة سودانية الإلكترونية

بركاتك يا الكاردينال منتظرين (كالدريون) جاب لينا (اوردغان)

27

وان طال السفر

محمد عبد الماجد

 

• بنتلفح كلامك زي (شال السقط).
• أمس قاعدين في مطار الخرطوم.
• نتفلت متل الناس الما عندها موضوع.
• قالوا الكاردينال عندو (قنبلة).
• الكاردينال جايب ليه (محترف) صاقعة.
• حارسين الطايرات.
• ما نسمع لينا صوت إلّا صنقعنا ليه.
• التسجيلات باقى ليها 5 أيام.
• البقول الهلال جايب (جيان).
• والبقول ليك (ساماتا).
• والبقول ليك الأخطر من (ساماتا).
• ساماتا شنو كمان؟.
• والبقول ليك الشحات.
• والبقول ليك عمر السعيد.
• يا زول شطحنا شطح شديد.
• نشرب في الموية الباردة دي ونمد في كرعينا.
• القوة المالية الضاربة.
• والقروش العند الكاردينال الحكومة ما عندها.
• عفارم عليك.
• والله الزول دا بعد الجوهرة شبعنا في (الكلام).
• شبعنا في الهواء.
• قاعدين نعدد في الطيارات.
• ما في طيارة مرقت مننا.
• فكرنا في اينستا …قلنا يمكن يختمها في الهلال.
• البقول ليك لا محترف في الدوري السعودي.
• والبقول ليك محترف من قطر.
• يا زول.
• المريخاب يرجفوا من كلامنا متل (باب الزنكي).
• ما خلينا لينا طيارة.
• قالوا كالدريون اللاعب الكولمبي.
• أصلو ما في غيرو.
• يا زول لكن الكاردينال بيدفع مليون دولار للاسماعيلي.
• ليه ما بدفع؟.
• الزول دا القروش العندو …الحكومة ما عندها.
• القوة المالية الضاربة.
• شهقنا وفتحنا عيونا.
• قالوا الطيارة وصلت.
• الشوارع مقفلة.
• وناس النجدة شغالين سيك ..سيك.
• والخرطوم كلها واقفة على فد رجل.
• الطيارة نزلت.
• فتحنا عيونا.
• لا والله ..عركناها عديل كدا.
• سبحان الله.
• بركاتك يا الكاردينال.
• راجيين (كالدريون)…ظهر لينا (اوردغان).
• معقولة!!.
• لا …لا …الكاردينال عملها كبيرة.
• القوة المالية الضاربة ظهرت.
• تركيا رفعت استثماراتها الى 10 مليار دولار.
• في قوة مالية ضاربة أكتر من كدا.
• الشركات ح تشتغل.
• والدولار ح ينزل.
• والسياحة ح تنتعش.
• يا زول كالدريون شنو؟.
• وساماتا ايه؟.
• جيان بتاع جنك.
• الزول دا جاب (اوردغان) عديل كدا.
• وعشان أثبت ليكم النظرية، الهلال سوف يلعب مع فريق تركي في بورتسودان.
• تقولوا لي (كالدريون).
• دي صلاح ادريس بعملها؟.
• نمرق شوية من الحتة دي.
• ونطلع قدام.
• واثبت ليكم الموضوع دا بالورقة والقلم.
• قاعدين في الحوش بنتونس بعد موضوع المطار…كبابي الشاي حايمة في الصوانى متل شفع سنة رابعة ابتدائي.
• يطاقشوا متل (كراسي الحفلة).
• وترمسة الشاي متل (حكم النص).
• الدنيا دي غريبة خلاص.
• هسع واحد يطلع ليك من غرفة معكوسة ويقول ليك : (لا غريبة ولا حاجة).
• بتحبوا الغلاط.
• والتنظير.
• والكلام الفاضي.
• لو اتفلسفت ليكم الموضوع بقع ليكم.
• أحسن أجيكم واحدة …واحدة.
• نمشي خطوة …خطوة.
• الكاردينال طلع أذكى من صلاح ادريس.
• صلاح ادريس بتاع كلام.
• صلاح ادريس فاكر نفسو بنقطها.
• وعامل فيها حافظها.
• او الناس المعاه شايفنو كدا.
• شايفنو حافظها.
• لو اقتنع صلاح ادريس ..هم ما بقتنعوا.
• وعلى هذا الأساس.. انطلقوا.
• متل الزول البيقفل على كرت واحد.
• بيقفل على (دو الاسود).
• ما بغير قفلتو أصلو.
• تفك ليه (سبعة شيرية) ..يقول ليك : والله (السبعة) دي لو كانت (دو اسود) ..تشرب ما تروى.
• تفك ليه (شايب هارتي)..يقول ليك : والله (الشايب) دا لو كان (دو أسود) ..كان فهمت حاجة.
• كان عرفت شيء.
• تفك ليه 9 طويلة.
• يقول ليك والله التسعة دي لو (دو أسود) كان تشيل شيلتك.
• وبعد كلامو دا منتظر (دو الأسود).
• تفك ليه (دو الأسود) في النهاية …يقول ليك والله (دو الاسود) دا لو فكيتو قبيل ..كان نتفت ليك ريشك نتف.
• في ناس كدا.
• ديل قافلين على صلاح ادريس.
• أقول ليكم الكاردينال أذكى من صلاح ادريس في شنو؟.
• الكاردينال دا من قبل التسجيلات شابكنا (اللجنة الفنية).
• واللجنة الفنية هي البتقرر.
• واللجنة الفنية قالت.
• واللجنة الفنية أوصت.
• وهو لا في لجنة فنية ولا حاجة.
• كلام ساي.
• والمدرب أوصى.
• والمدرب قال.
• كلام.
• وهو لا في مدرب أوصى.. ولا في مدرب قال.
• موضوع (بشة وبويا) الكاردينال عاملو مراقة.
• مراقة من المحترفين.
• الجرايد ما عندها موضوع غير (بشة وبويا).
• ومواقع التواصل الاجتماعي ..الهم الاول (بشة وبويا).
• والناس تشيل وتتكلم.
• البتفق مع الموضوع.
• والبختلف.
• 25 يوم ..نحن في موضوع (بشة وبويا).
• ولولا سفر المنتخب الوطني موضوع (بشة وبويا) كان سوف يحسم في آخر لحظة في التسجيلات.
• الكاردينال شغل ليك الناس بي (بشة وبويا).
• وجعل اعادة (بشة وبويا) انجاز يحسب له ..وهو شيء يفترض ان يكون طبيعي.
• الناس نسوا أي حاجة.. وفرحوا فرح مبالغ فيه باعادة قيد بشة وبويا.
• عارفين ليه؟.
• عشان الكاردينال وصل ليهم إحساس انو يمكن ما يعيد قيد بشة وبويا.
• الاعادة بقت فرحة.
• اها دي صلاح ادريس بيعملها؟.
• التخطيط (الذكى) برضو الواحد بقيف عندو ..وبصفق ليه، حتى لو كان بتختلف معاه.
• عاوزين لينا رئيس (شفت).
• حكاية (القوة المالية الضاربة) براها ما بتعمل حاجة.
• شوفوا (شفتنة) الكاردينال.
• الناس دي اسبوعين مدورة في موضوع (هيثم ومهند).
• البقول ليك مع الرجعة.
• والبقول ليك ضد الرجعة.
• مواقع التواصل الاجتماعي.
• والجرايد.
• كلها ما عندها شغلة غير (عودة) هيثم مصطفى ومهند الطاهر.
• ووفد الهلال يغادر الى الأبيض.
• واللجنة الاستشارية تطالب بعودة هيثم مصطفى.
• اللجنة الاستشارية قلبت اللجنة الفنية.
• الكاردينال شغل ليك الناس عن التسجيلات.
• والمحترفين.
• والناس كلها المتفقة والمختلفة بتتكلم عن هيثم مصطفى ومهند الطاهر.
• لمن طلع الكاردينال من لندن (فجأة) وقطع الطريق أمام عودة هيثم ومهند.
• أها دي صلاح ادريس بقدر يعملها.
• الكاردينال دا ما قروش بس.
• الناس البتنظر ليه كدا – ما عارفة شيء.
• غشيمة هي..ما غشيم هو.
• بعد الموضوع دا – الناس كما أشرت في المساحة السابقة انشغلت بموضوع (بشة وبويا).
• اعادة توقيعهم في الهلال.
• ولسه.
• والكاردينال ح يعمل.
• والكاردينال ما ح يعيد.
• والكاردينال قال للجنة الفنية.
• واللجنة الفنية هي البتوصي.
• واللجنة الفنية اجتمعت.
• واللجنة الفنية قررت.
• وهو لا فى لجنة فنية ولا حاجة.
• جيبوا لي اسم زول واحد في اللجنة الفنية.
• اللجنة الفنية حقت الهلال (كسكتة).
• الكسكتة بس.
• بعد موضوع هيثم ومهند انتهى.
• وموضوع بشة وبويا خلص..عشان المنتخب مسافر.
• قالوا مدثر كاريكا مرشح للشطب.
• كيف الكلام دا ما عارف.
• زول نجم الموسم الافريقي قبل الفات حسب كلام الكاف.
• وزول حسم كل مباريات الهلال الصعبة في الدوري هذا الموسم.
• في شندي.
• وأمام الأهلي الخرطوم.
• وفي كوستي.
• أي مباراة صعبة الحسم كان يا من بشة يا من كاريكا.
• حتى بويا يعود له الفضل في فوز الهلال ببطولة الدوري الممتاز بهدفه في الخرطوم الوطني.
• مع ذلك فان الكاردينال سبق ان أعاد سادومبا.
• وكان عاوز يعيد مهند الطاهر.
• وهيثم مصطفى.
• وأعاد الشغيل.
• وعاوز يتجاهل كاريكا وبشة.
• المهم موضوع شطب كاريكا نسى ليك الناس المحترفين بصورة تامة.
• الناس بقت تفكر في كاريكا.
• لدرجة انك لو خيرت ليك أي هلالابي بين أعظم محترف وكاريكا بقول ليك كاريكا.
• بالطريقة دي تخلص الكاردينال من حكاية المحترف التانى.
• ودخل في هدوء تام لكشوفات الهلال المحترف البرازيلي.
• في الوقت نفسه أعلن مجلس الهلال عن صرفه النظر عن المحترف الثاني.
• الحكاية خلصت كدا.
• لا الأخطر من ساماتا.
• ولا ساماتا في عضمو.
• ولا كالدريون.
• ولا الشحات.
• ولا عمر السعيد.
• كاريكا بس.
• عرفتوا ليه كاريكا دخل دائرة الاستغناء.
• الكاردينال شغال بتخطيط عالي.
• ذكاء شديد.
• وانتوا فاكرين الحكاية كلها ملخصة في (القوة المالية الضاربة).
• انتوا ما جايبين خبر.
• بل ان مجلس ادارة نادي الهلال استطاع ان يقدم رسالة قوية أمس في اعادة قيد بشة وبويا.
• صورة لاعبي الهلال وتجمعهم وحضورهم لمباني الاتحاد ليكونوا مع بشة وبويا تؤكد روح المجموعة.
• بشة وبويا.. وكاريكا والشغيل ويونس الطيب والطاهر سادومبا وجمعة والسموأل.
• شباب وكبار.
• ولاعبون قدمى وجدد.
• تاني في شنو؟.
• ما في روح أكتر من كدا.
• وما في رسالة أعظم من هذا.
• والموضوع لسه.
• دي صلاح ادريس بيقدر يعملها.؟.
• الزول دا شفت.
• الزول دا مفتح.
• الزول دا سايق الناس للحاجة العاوزها.
• لا لجنة فنية.
• ولا اعلام.
• الكلام دا كبير شديد.
• والحكاية عنده باقي.
• …………….
• ملحوظة : قال صلاح ادريس قال.
هوامش
• نتمنى ان يكون المحترف البرازيلي على قدر المقام وان يحدث الاضافة التى نبحث عنها.
• الحمدلله ان في الهلال محترفين في قيمة مكسيم وشيبولا واوتارا.
• بقاء اوتارا براهو بالدنيا.
• نتمنى ان يجد مجلس الهلال مخرجاً جيداً لوليد علاء الدين.
• نيمار ما تجهلوه.
• كان من الصعب ان يفقد الهلال لاعب وطني تاني.
• لذلك تسجيل محترف واحد ورفع الامر للتسجيلات القادمة حتى يحدد المدرب البرازيلي حاجته كان أمراً جيداً وحكيماً.
• فقط يجب ان لا يرسل الهلال اكثر من 24 لاعباً في الكشف الافريقي.
• حتى يكون أمام الهلال فرصة اضافة 6 لاعبين في مرحلة المجموعات.
• الهلال سوف يلعب في التمهيدي وسوف يلعب في دور الـ 32 بعد التأهل ان شاءالله من التمهيدي.
• وهذه المراحل لا تحتاج لأكثر من 24 لاعباً.
• تصريحات الطاهر سادومبا في قناة الهلال وتواجده في تسجيل بشة وبويا الى جانب كابتن الهلال كاريكا تؤكد ان هذا اللاعب كبير.
• فقط ننتظر ان تحل مشكلة نيمار بصورة تليق بالهلال.
• وابقوا على سفر.
• ………..
• عاجل : وخير وبركة ان شاءالله.

 

 

حمل تطبيق كورة سودانية لتصفح أسرع وأسهل

 لزوارنا من السودان متجر موبايل1

http://www.1mobile.com/net.koorasudan.app-2451076.html

3,699 حملو التطبيق

لزوارنا من جميع انحاء العالم من متجر قوقل

https://play.google.com/store/apps/details?id=net.koorasudan.app

13230 حملو التطبيق

على متجر   mobogenie

 http://www.mobogenie.com/download-net.koorasudan.app-3573651.html

5000+ حملوا التطبيق

قد يعجبك أيضا
2 تعليقات
  1. الابريق يقول

    الحصل شنو! خليتوا المريخ واتذكرتوا والتفتوا على الهلال
    يادوبكم عرفتوا أن المريخ بخير وانتم في ورطة بلا نهاية
    الحقائق ماب تتغطى والقال (المريخ رجل صالح) ما كضّب
    ليرحمنّك الله يا القبطان / حاج حسن عثمان

  2. Daldoum Hagar يقول

    الاخ الكريم؛ أنا أعتقد (واي زول طبعا حر في اعتقاداتو .. اقتباسا من عمود محمد الطيب) ان جزء كبير من مشكلة الكرة السودانية (بالأخص في الهلال و المريخ) هو الإعلام. الإعلاميين يعتبرون أن رئيس النادي يجب أن يشطب كل اللاعبين وفي نفس الوقت يعارضون شطب اي لاعب في فترة التسجيلات.
    وأعجب للذين يطالبون بتسجيل لاعبون يفوق سعرهم المليون دولار، وإلا فالإدارة فاشلة. اذا رجعنا للوراء قليلا فإن افضل مهاجم سجله الهلال و هو قودوين كان تسجيله ب 25 الف دولار فقط، بينما كان تسجيل كلاتشي ب75 الف دولار. وكل التسجيلات ذات القيمة العالية فشلت ماعدا سادمبا، و دونكم اوتوبونج في الهلال وواراغو في المريخ.
    في رأيي الشخصي ان يتم قفل باب المحترفين والاكتفاء باللاعبين الوطنيين، لان أجواء السودان غير ملائمة لنجاح المحترفين بسبب استعجال الإدارات وشفقة الجمهور والنقد الهدام من الإعلام .

اترك رد

لن يتم نشر عنوان بريدك الإلكتروني.

يستخدم هذا الموقع ملفات تعريف الارتباط لتحسين تجربتك. سنفترض أنك موافق على ذلك ، ولكن يمكنك إلغاء الاشتراك إذا كنت ترغب في ذلك. قبولقراءة المزيد