بيوت السودان محتفله بالطلاب وقروباتنا محتفله بالنفرات

0
399

تغريدة واتساب
# بقلم : معاذ ابومؤيد
بيوت السودان محتفله بالطلاب
وقروباتنا محتفله بالنفرات

مبروك لكل طلاب الشهادة السودانيةً بنين وبنات
مبروك لكل اب عاش نجاح المجهود
ومبروك لكل ام ساهرت وتعبت
مبروك لكم بحجم مساحة السودان
مسحتم معانة الالم بفرحة النجاح
نتقدم لكم بالتهاني والتبريكات
والعاقبة عندنا،،،،،
نجي لتهنئة والينا
اقصد معلمنا
سلك
غايتو الصلعه مامن فراغ
اتحت الشعر سبيبة سبيبه مع اسلام
واخيرا اسلام رفعت التمام
وخلت الكلب زاتو مخلوع وجاري يقول مبروك
نبارك ليك ياعمنا سلك
ونبارك لاسلام النجاح
••••••••••••••••••••••••••
نرجع لقراعدنا سالمين بعد مانططنا مع عمنا سلك ونشوف نجاح قروباتنا
نشوف نفرتنا ووقفتنا مع المجلس والكيان،،
القروبات شغالة شغل نضيف والمادفع الليلة باكر اكيد دافع ومنور كشف نفرة الزعيم
جنية وجنية بتعمل مية
ونفرتنا تكون مليارية
ماتقول الجنية شوية
النمل بلقط سكرة سكرة
وبيعمل خلية
نحن خليتنا مختلفة باذن الله
الكل جاهز والكل مستعد الي من بعض الكسلانين والعندهم ظروف!!!
لكن اكيد باكر ظروفهم بتفرج وبيدفعوا معانا
ونحن برانا نشيل الشيلة
قروب وقروب حتعمل مية
وجنية وجنية بتعمل مية
وقروشنا عارفنها ماشة للكيان
عظمه علي عظمة ياجمهور
•••••••••••••••••••••••••
مسك الختام
النفرة ماحتسجل باسم فلان او علان
حتسجل للمريخ الكيان
النفرة ماشة الخزينة
ماحتمشي لقروب
وكل مشرف ايصاله في جيبة
وايصالتنا ماشاء الله كل شهر في ذيادة
دا الاستثمار
•••••••••••••••••••••••••
ونحن علي المدرج ندعم ونشجع ونتفرج
ونحن في القروبات دعمنا حيكون مختلف
انا وانت وهو وهم وكلنا همنا الكيان
لاصوت يعلو فوق صوت الكيان
ولاكبير علي المريخ
الدافع جنية والدافع الف كلو من اجل الكيان
الناس ظروف
لكن الاجمل نطوع الظروف مره من اجل الكيان
الدافع جنية حيدفع الشهر البعدو عشره ،،،
بس شعارنا ماحيتبدل
لن ندعك تدفع وحدك
والعايز راحة البال يدفع من اجل الكيان،،،،
ساهم بالقليل عشان باكر نفرح بالتيم
••••••••••••••••••••••••••
همسة اخيرة
في ناس اختفت في ظروف غامضة
لانسمع لهم حسا
اين هم ؟؟؟
البنعرفوا انو البستقيل او يعتزل بيكون عندو حس وخبر
وعلي الاقل بيكون معانا في المدرجات!!!
لكن تختفوا فجاءة ذي جيش صدام؟؟؟
مامعقولة اصلا
تكونوا هاجرتوا وعملتوا اقامة خارج السودان؟؟؟
نتمنى نراكم معانا علي المدرج
او علي الاقل ساعدونا بالدعاء
ماتبقو ذي السلم والثعبان
تصلوا فوق وفجاه تلاقو نفسكم تحت !!!!
المحيرني جون سينا
وابجضوم وابحلقوم
كلهم ماظاهرين في الشاشه
ياخي باركوا للمجلس الجديد
اعملوا تهنئة في صحيفة!!!
عندي سؤال اخبار كريم الحسن شنو؟؟؟؟
••••••••••••••••••••••••••
خارج النص
رسالتنا الي لجنة التسيير
خلاص نوقف الاحتفالات وننظر فيما هو آت
القادم مسؤلية جهاز الكرة
وياهندسة اخونا ودموسي
تيمك جاهز
وخبر كابتن التيم شنو
لسه في قاهرة المعز!!
اصابة الرباط الصليبي مابتاخد الزمن دا
بعد دا طبقوا اللائحة
الحاصرين اهتموا بيهم
والغائبين كمان لاذم يتخصم ليهم
وياوالينا
الجمهور منتظر التيم
والتيم محتاج لقطاع رياضي وطبي ومحتاج لمدرب لياقه !!!
شوفوا لينا التيم وقللوا لينا الاجتماعات !!!
عجلة الدوري منطلقه من باكر
عندنا فارق نقاط لاذم نجمعها
التيم ثم التيم ثم التيم
دا هم الجمهور
وياجمهور
الدعم ثم الدعم ثم الدعم
دا هم الادارة
••••••••••••••••••••••••••
# تغريدة طبية
اعراض نوبة هبوط السكري
الشعور بالجوع
الشعور بالدوخة
التعرق
شعور بدقات القلب
تنميل
اذدواج الرؤية
رعشة الاطراف
التصرف بطريقة غريبة
التشنج
الدخول في غيبوبة
وربنا ينعم علي الجميع بالصحة والعافية
•••••••••••••••••••••••••
# تغريدة مرورية
وراء كل حادث مخالفة مرورية
والموبايل يشكل نسبة كبيرة من الحوادث المرورية
اصل واتصل
اتصالك مهم لكن حياتك اهم
لاتسرع فالموت اسرع
الطريق ملك للجميع فلاتفتكر انه ملكك وحدك وتقعد تشتم في خلق الله،،،
الصيام يحتاج الي التركيز في الطريق
قيادتك بامان والتزامك بالتوجيهات المرورية حزام امان لك ولغيرك
لاتسرع فالموت اسرع،،،،،،،،
لاتسجل اسمك في قائمة الوفيات بتهور واستعجال وعدم ثبات
كل السرعة توصلك الي دارك الي السرعة القاتلة،،،،،
••••••••••••••••••••••••••
••••••••••••••••••••••••••
هذه اراء التغريدة اقبل منها ماتشاء وارفض منها ماشئت..
التغريدة تنقل نبض المدرج والقروبات وتقف في مسافة واحدة من الاحداث ،،،،،
نحاول ان نلفت الانتباه لبعض الاحداث والنقاط بواقعية……..
التغريدة لن تخرج خارج نطاق المجتمع المريخي نهائيا الا ماندر
نقد الذات يوصلنا الي الامام والي المنصات باذن الله ،،،،،
ادعمونا بالنصح والارشاد وصححونا إن اخطاءنا في يوم من الايام،،،،،،،،
====================

 

تغريدة واتساب

المشاركة

أكتب رد

أدخل تعليقك من فضلك!
أدخل إسمك هنا من فضلك