تبقى سيرتك هي الكلام

0
723

تغريدة واتساب
بقلم : معاذ ابومؤيد
تبقى سيرتك هي الكلام

فتاح ياعليم رزاق ياكريم
تفتح الباب وتدخل قروب او قروبين او ثلاثة ..
تلاقي نفسك في نفس الدائرة
ونفس النقاش ونفس الحوار
?ابوجريشة ?
فعلا مفروض يتكتب معاها بم بم
لاتمر أربعة وعشرين ساعة الا وابو جريشة متصدر عناوين البيت المريخي!!
وكلها خلافات او تصريحات
اخر الضحايا حسن الوسيلة !!
العناوين القادمة اخاف ان تكون لوك ايمال يتخلف عن البعثة وأبو جريشة يقود الدفة الفنية دا لو ماقائدها تحت تحت لانو شفت لي صورة تعبر عن حالة الانصات!!
وبعدين يالجنة التسيير
الخلل قدامكم ومطنشين ؟؟
ولا انتو عاملين رايحين ؟؟
صوت القروبات واصلكم وعارف واصلكم كيف !!
معقولة بس ….
••••••••••••••••••••••••••

الفنان محمود عبدالعزيز الحوت رحمه الله عليه كان فنان واحد ومجتمعين علي حبو جمهورية معجبين وروابط لم يختلفوا ابدا علي الفن العنده او علي اداء اغنياتو
محمود لم يكن متعجرفا او دكتاتوري !!
كان يطلع المسرح ويغني مايطلبه المستمعون وهم بعد كل اغنية يرددون مايريدون من الاغاني!!
مافي زول حجر راي زول
ولاقال دا زول عايز محمود حكرا ليه ولاقال دا عايز يضر محمود!!
كونت روابط ومجموعات كلها هدفها دعم محمود بالحضور وابداء الاعجاب بفن محمود
حتى بعد ممات محمود ظلت الروابط تجتمع من اجل روح الحوت والدعاء له….
محمود يغني مايطلبه الحضور
ماقال ليهم عايزين تسيروني عشان قاطعين تذاكر !!
ولاعشان انتو مجموعات !!
يلبي كل الطلبات بكل أريحية ويتبادل معهم الحب والاهتمام
رحل محمود وبقت مجموعاته بعيد عن المشاحنات والخلافات جمعهم حب محمود فقط ولم تجمعهم الشهرة او المصالح !!!
حكينا القصة دي ليه عشان نعرف قيمة الحب وقيمة الرأي والرأي الاخر !!!
الحوت انصت لمطالب جماهيره
من غير عجرفة او تعالي…
مجموعات محمود وقروباته دعمت محمود بالفكر والمال والحضور..
تمنينا ان تنتقل جمهورية الحوت وروح قروبات ومجموعات محمود للقروبات المريخية لكن !!!
••••••••••••••••••••••••••
استبشرنا خيرا وقلنا صوتنا وصل للإدارة والكلام هنا بلسان القروبات المريخية…..
شاهدنا التلاحم في النفرات المالية وقلنا الإدارة نزلت لمستوى المشجع واصبح شريكا للإدارة في كل همومها والإدارة بادلته نفس المشاعر
لكن وين !!!
مركب القروبات لابد ان تطالها يد المصالح والسعى وراء المناصب والشهرة!!
الناس اجتمعت لإصلاح الخلل والشان المريخي..
وابعاد اصحاب المصالح
لكن معقولة تقدر تسير من غير ما تمر بسوق المصالح والمتسلقين!!!
الباحثين عن المناصب الإدارية
عين علي المنصب والتستر خلف عباءة القروبات!!
القروبات لجمع المال وصنع القرار
المدرج يقود ولاينقاد
ومن اراد تمرير أجندة لجنة التسيير من خلال القروبات لغتكم مفهومة للجميع !!
والقراءة مابين السطور اصبحت مفهومة للمشجع البسيط والمع الكيان معرووف والمع لجنة التسيير معروف والعندو ميول ناس التجمع برضو معروف
اشكال الفيسات في الكيبورد في الموبايل تقدر تفرزها!!
والكلمات في القروبات تقدر تفرزها !!!
••••••••••••••••••••••••••
ختاما
ليس بالمال وحده ينصلح الكيان
••••••••••••••••••••••••••
ونحن علي المدرج ووسط القروبات عز الخريف نص النهار لازم تجيك لفحة سموم تزهجك وتطلعك من طورك لكن لفح سموم المحب والعاشق للكيان مقبولة لكن اللفحة التانية دي تتبلع كيف الله اعلم
المريخ مريخ الشعب
والشعب دا الجمهور
والإدارة ممثل فقط لاصواتنا
والماعجبنا في القرارات او التصرفات بنوصلو ليكم بكل ادب واحترام لانو دي صفات الصفوة القمنا واتربينا عليها !!
••••••••••••••••••••••••••
همسة أخيرة
انت تمثل اصوات قروبك لاتكن اناني وتنفرد برايك الناس دي مابخلت ليك بالمال لاتصادر آراءهم وعقولهم
ومن تولي إمامة القوم مسؤول امام الله عنهم
••••••••••••••••••••••••••
خارج النص
ظاهرة اطفال الانابيب بدات في الانتشار ولابد من علاجها سريعا
حتى نشوف جسد مريخي معافى من اصحاب المصالح الشخصية والمتسلطين والباحثين عن المناصب والشهرة!!!
خطاب موجه بادب اخير من الهتاف امام الملأ!!
لنا عودة في تغريداتنا القادمة لاصابع الاخطبوط المزروعة في القروبات ….

 

تغريدة واتساب

المشاركة

أكتب رد

أدخل تعليقك من فضلك!
أدخل إسمك هنا من فضلك