صحيفة كورة سودانية الإلكترونية

جاهم شايل شنطتو وقال ليهم أنا من طرف حازم !!

2٬209

قزاز ورذاذ
محمد الطيب الأمين
جاهم شايل شنطتو وقال ليهم أنا من طرف حازم !!

* إتخيل .. تكون قاعد في أمان الله يجيك واحد شايل شنطتو وبدون مقدمات وبدون سابق معرفة يقول ليك أنا جيت أقعد معاكم.
* تقعد وين؟
* يقول ليك : أقعد معاكم هنا في البيت.
* وأنت منو اصلاً؟
* أنا زول.
* الحوار ده حصل بالضبط في معسكر المريخ بالقاهرة و(العهدة على الراوي).
* قال ليك ناس المريخ قاعدين في المعسكر بالقاهرة فجأة دخل عليهم شاب مصري.
* الجماعة قالوا ده بيكون إعلامي مصري جاي يعمل إستطلاع مع البعثة.
* إستطلاع شنو وأنت نجيلة ما عندك؟
* قال إستطلاع قال.
* واحد منهم سأل الشاب المصري ده قال ليهو : حبابك يا إبن النيل تطلب خدمة؟
* المصري قال ليهو : خدمة شنو يا أستاذ أنا لاعب معاكم.
* معانا وين؟
* قال ليهو : معاكم في المريخ ده.
* من متين؟
* من هسه ، أنا جاي من طرف حازم هو اللقال لي إنضم للبعثة.
* طوالي حجزوا ليهو غرفة ناصية في الفندق.
* وصرفوا ليهو (اللبس).
* ومشى التمرين.
* ما من طرف حازم وكده.
* في التمرين لو مسك الكورة ما في لاعب بقرب عليهو.
* بخلوهو ياخد راحتو.
* من طرف حازم وكده.
* امبارح الصباح المريخ لعب مباراة ودية.
* والمصري شارك أساسي.
* من طرف حازم وكده.
* التشكيلة كلها بتلعب للمصري ده.
* أي لاعب معاهو الكورة أول حاجة بشوف المصري وين وبلعبها ليهو.
* من طرف حازم وكده.
* المصري بالصاح بالكضب جاب ليهو قون غايتو.
* وأول ما جاب القون طلع من الملعب والكورة شغالة ، مسك تلفونو دخل الفيسبوك كتب : (الحمدلله سجلت أول أهدافي مع المريخ السوداني).
* كتب الكلام ده ورجع تاني واصل المباراة.
* ما من طرف حازم وكده.
* لاعب لا مسجل في الكشف ولا في زول سمع بالمفاوضات معاهو ولا عارفين الرشحو منو.
* اللهم زول مصري جا شايل شنطتو ودخل المعسكر ودخل التشكيلة ودخل الفيسبوك ذاتو .
* أنا لما شفت صورتو بعد المباراة عرفتو.
* الزول ده قبل كده أنا شفتو.
* ولو ما أخاف الكضب شربت عندو عصير في موقف شروني.
* شكلو ما غريب علي والله.
* ما داير أحلف ساكت والدنيا خميس لكن الزول ده كان شغال في كافتريا في موقف شروني.
* أو موقف جاكسون.
* أو موقف الإستاد.
* المهم .. موقف من المواقف.
* عليك الله حصل سمعت ليك بعملية زي دي؟
* شغل زي ده في الحواري قابلك؟
* اوع يغشوك ويقولوا ليك ده لاعب بعمل إختبارات.
* في مدرب محترم بعمل إختبارات للاعب وأمامه مباراة أفريقية بعد ٧٢ ساعة؟
* وهو ذاتو قالوا ساب الكورة وبقي وكيل لاعبين.
* اصلاً هو ما بعرف يلعب وغير كده بقى وكيل.
* غايتو غارزيتو ده زادو موية والله.
* زمان ما كان كده.
* بقى يقبل بأي حاجة.
* لما تشوف الحاجات دي بتحمد الله على نعمة الهلال.
* والله صحي.
* زي المصري ده لو جا معسكر الهلال إلا يتصور مع الغربال ويرجع.
* كده افرض المريخ ما كان مشي القاهرة؟
* هل اللاعب ده كان ممكن يجي الخرطوم؟
* ولا الشغلانية صدفة ساي.
* يكون المصري ده عرف المريخ في القاهرة وقال يمشي عليهم.
* كل شي وارد.
* مساكين المريخاب قالوا ارتاحوا من سوداكال جاهم حازم ح يخليهم يندموا على سوداكال.
* ونحن غايتو السنة دي بالذات يا متنا من الضحك ويا كمان الضحك كتلنا.
* تنويه .. اليوم الخميس سيتم بث حواري مع مذيعة قناة (العربية) و(الحدث) الأستاذة لينا يعقوب عبر قناتي على اليوتيوب (قناة دقايق) ، أرجو شاكراً دعم القناة بالإشتراك والمتابعة.
* ونركب صافنات ونجيبة (مصرية) واصلو الزول بيموت والذكرى تفضل حية.
* و…و…
* وعندي ليك سر من زمان داير أقولو ومنكسف …….. (أنا من طرف حازم).

قد يعجبك أيضا
7 تعليقات
  1. ابو محمد يقول

    خليك نع هلالك الهلكان.. مالك ومال المريخ يجيهم شايل شنط ولا شايل مصيبة زمان انت ماااااالك.. صحي والله اذا اراد الله نشر فضيلة طويت اتاح لها لسان حسود… فلولا النار فيما جاورت لما عرف طيب عرف العود… بتعرف كلام زي ده ولا ما ادوكم ليه… امش يا مشجع يا متعصب.. انت ماعندك اي علاقة بالصحافة.. لا زلط ولا شرق.هخهههخهههخهه

  2. بدر يقول

    تعرف ي أبو محمد الواحد لمن يقلون عليهو مفلس . أهو زي النوع ده مفلس خليك مع الكفيل.لحدي م يجي يوم تندمون تكونوا قاعدين في السهله خليك عارف ي محمد الطيب.في حاجه اسمها موت.خليك في هلالك.انت م مسؤول عن المريخ ي حاقد

  3. احمد علي يقول

    تعرف انت وصاحبك بتاع كرات عكسية تاعبين نفسكم شديد بالمريخ ياخي نصيحة اكتبو باحترافية وخلو البتعملو فيه دا واجزم انكم مرضانين نفسيا شديد ولكن لامثالكم تجاني الماحي موجودة ويمكن يلقو ليكم فيها علاج…اقسم ليكم هسي لو حازم قبضكم تقعدوا السنة كلها زي ا ولا انتو حكاية ثلاثي المريخ شارطكم لحدي ما عمال ليكم حالة نفسية.

  4. هشام موسي يقول

    اتمنى ان تتابع اخبار فريقك الذي تعادل مع ناس السكة حديد درجة كم متعارف.
    ورينا اخبار المحترفين بتاعين فريقك وحا يلعب بي ياتو تشكيلة وياتو خطة.
    بعدين نحنا نجيلة ماعندنا وانت عندك وبرضو حرموك
    وانت هلال الابطال وانا بتاع التمهيدي وبرضو لاعب معاي تمهيدي
    بعدين نحنا في المريخ بنعرف حازم هسة الهلال رئيسو منو والبدفع منو؟ كردنة قاعد ولا عمل رايح
    شوف مشاكل فريقك واكتب بموضوعية عارفك فقير منطق وكلمة لكن اتعلم ما تباري الجداد بوديك الكوش
    انت مفتكر باساءتك للمريخ بتكسب جمهور الهلال ابدا والله الجمهور داير نقد هادف لفريقه ودعم ومؤازرة برضو.
    ياخي اعمل ورشة لمناقشة لماذا فشل الهلال في احرار اي بطولة قارية لمدة اكثر من ٩٠ عام على الرغم من تهيئة الظروف في كثير من الأحيان.
    خليك موضوعي يا ما عندك موضوع

  5. كونان يقول

    زول يريد موطيء قدم في الصحافة عن طريق الاساءة للمريخ الكيان الكبير ….المريخ نادي كبير تأسس ١٩٠٨ واتت جيت من البلد امس نزلت من الباص جوار استاد الهلال ومنها وعييييييك ….ارحم نفسك وارجع البلد

  6. صلاح الدين يقول

    يا أخونا الكريم .. لا تكن نسخة من محمد عبد الماجد القلم الهلالي اللطيف الذي و رغم مريخيتنا إلا أنه يجد القبول لدينا .. لت تستعير أسلوبه و طريقته في الكتابة .. أختط لنفسك طريقا و أسلوبا .. كن أنت..

  7. حسن الحاج يقول

    قال هلال خجلان من الاسم
    قو ل صفرا

اترك رد

لن يتم نشر عنوان بريدك الإلكتروني.

يستخدم هذا الموقع ملفات تعريف الارتباط لتحسين تجربتك. سنفترض أنك موافق على ذلك ، ولكن يمكنك إلغاء الاشتراك إذا كنت ترغب في ذلك. قبولقراءة المزيد