جكمنة

في السلك

بابكر سلك

جكمنة

*محمد سيد أحمد النائب الأول لحازم
*يعرف بالجكومي
*يعشق الصدامات
*ويذكرني بجد صاحبا لي بتاع مشاكل
*زول لسه فيهو باقي همبته
*يوم قابلت جد صاحبي ده بالمحطة الوسطى أم درمان
*والمحطة الوسطي أم درمان لغير الناطقين بها
*هي موقف المواصلات العريق العتيق الذي تطل عليه نقطة بوليس السوق زمان
*وشرقه كافتيريا فيتال وصيدلية أو نخلة العريقة
*وكان فيها حارات لوقوف التاكسي ومظلات
*والترماج كان له موقعه المحترم فيها
*ويا حليل ميامي
*ميامي ده ما اسم دواء
*ميامي ده أشهر وأشهى حلواني في أم درمان
*لما كان اسمها أم درمان
*وأذكر أن أحدهم كان بحكي لأحدهم تاني عن المحطة الوسطى وقيافتها ونظافتها سنة ستة وأربعين
*وذكر ليهو كيف أن (البيرة) كانت بااااااردة
*الكهربا ما بتقطع الزمن داك
*وحكى ليهو عن الواحد يقطع ليهو كبايه على مشارف الكافتيريات وزول بسألك مافي
*أحدهم التاني قال ليهو ربنا ما كان بسألكم؟؟؟
*أحدهم الأولاني قال ليهو أقول ليك سنة ستة وأربعين ياخ
*نرجع لي جد صاحبي
*لقيت ليك لمة في المحطة الوسطي ودفر وكوراك
*أشوف ليك جد صاحبي وسط العوة
*سألت الناس الحاصل شنو؟؟؟
*قالوا لي الحاج ده مكبر الموضوع ساي وهو غلطان
*مشيت عليهو لقيتو بالعمة والتوب والعصاية والسكين والسوط
*منفعل جدا
*قلت ليهو داير النصيحة ياحاج؟؟؟
*قال لي ما دايره
*طبعا لأنو عارف نفسو غلطان
*رفض النصيحة نهائي
*نرجع للجكومي
*شخصية في ستة شهور انقسم حولها المريخاب
*منهم المؤيد
*وديل أطلقوا عبارة جكمنة لأي وهمنة
*ومنهم المعارض الذي يري الرجل نسخة من جد صاحبي بتاع المحطة الوسطي
*ولا توجد منطقة وسطى ما بين ذلك وذاك
*مافي زول وسط
*يا جكمنة لأي وهمنة
*يا جد صاحب سلك
*لكني أقول لي ديل ولي ديلك
*مافي زول صاح طوااالي
*ومافي زول غلط طوااالي
*ممكن مرة جكمنة لأي وهمنة
*وممكن مرة جد صاحب سلك
*حازم فلقنا (بالجرجير) لإعادة هيبة القلعة
*وطلع جرجيرو واحد من خوابيرو
*جكمنة كشف أوراق حزومي ولجأ لمن لجأ له في عملية صيانة الاستاد
*برغم أن اللجوء كان لجوء (سياسي)، جل أهل قرار منح الجواز المريخي يرفضه
*ولكنه كشف أوراق جرجير حازم
*واستمر جكمنة في درب كشف الحقائق
*حتى كان الفيديو المسرب
*وجكمنة ولا هاميهو
*قايمه عليهو الصراحة
*وبرضك في الفيديو المسرب قالوا لجكمنة داير النصيحة
*قال ليهم ما دايره
*وواصل الرجل إلى أن وصل لمرحلة مطالبة الهلال بالغرامة بتاعت الاستاد
*خمسمية ألف دولار
*دولار ينطح دولار
*جبل عامر ما يمرق دولار قدر ده
*وهي حق مريخي خالص
*في الحتة دي بالذات اتفق الجميع على جكمنة لأي وهمنة
*ومطالبة جكمنة كشفت تقاعس مجالس قبله عن المطالبة
*بالذات المجلس الذي في زمنه تم توقيع الغرامة
*وكشف جكمنة كيف أن السياسة كانت تتدخل بالشأن الرياضي
*وأن عدم المطالبة كان فقط لاستقرار الموسم الرياضي
*واستقرار البلد
*واستقرار الحكومة وقتها
*واستقرار الحزب
*فلو طالب المريخ بالسداد
*سيرفض الهلال الاستجابة
*ويضطر الجهاز للسداد
*لذا صهينوا لأن السياسة كانت تقود الرياضة من أضانها
*شكرا جكمنة علي هذه الوهمنة التي كشفت لنا كيف أننا كنا مخنوقين رياضيا بذراع السياسة الذي يلتف على عنق الرياضة
*في دي طلعت ما جد صاحبي
*أيها الناس
*إن تنصروا الله ينصركم
*أها
*نجي لي شمارات والي الخرتوم
*كان شفت ياوالينا
*يقولوا دايرين يفاوضونا
*يجكمنوا علينا وكلو يوم يكتلوا زول فينا

سلك كهربا

ننساك كيف والكلب قال لي أسي ما عرفتوا من فض الاعتصام؟؟؟؟ جنس هباله عليكم
وإلى لقاء