صحيفة كورة سودانية الإلكترونية

حالتو عندو رباط صليبي!! لجنة تفكيك (المريخ) بقيادة الغربال وياسر مزمل واباذر ميسي

2٬751

صابنها

محمد عبدالماجد

حالتو عندو رباط صليبي!!

لجنة تفكيك (المريخ) بقيادة الغربال وياسر مزمل واباذر ميسي

 

……

· عندما سجل الهلال اللاعب ياسر مزمل ووالي الدين خضر (بوجبا) بعد صفقة هى الاعلى في تاريخ التسويق للأهلي شندي خرجت صحيفة (الصدي) تتحدث عن (المقلب) الذي شربه الهلال بتسجيل هذا الثنائي المصاب بالرباط الصليبي.

· دا مقلب السرور.

· مقلب الهنا.

· وباسطة سلا.

· سجلوا سيف الدمازين ومحمد عباس كنان ومازن محمدين وطبنجة وبتكلموا عن (المقلب) الذي شربه الهلال بسبب تسجيل بوجبا وياسر مزمل.

· الناس ديل ما وصلتهم الكهربة؟

· تحدثوا عن اصابة مزمل وبوجبا بالرباط الصليبي في عناوين الصحيفة الرئيسية.

· شامي لي ريحة (سمك)!!

· ما راعوا احساس زول.

· وبتكلموا عن (المهنية).

· لو دي مهنية ..تبقى المهنية في ستين.

· والكيزان.

· والفلول.

· كلهم في 120.

· شامي لي ريحة (بصل)!!

· صيحفة الصدى عملت من اجل ان تحبط جماهير الهلال وهي تتحدث عن (اصابات) لا تنهي مسيرة اللاعب ولا توقفه.

· وهو نفس الشيء الذي فعله اعلام المريخ عندما سجل الهلال لاعب المريخ السابق عبده الشيخ (مصابا) وسخر اعلام المريخ من تسجيل عبده الشيخ في الهلال.

· عبده الشيخ العملو في المريخ شوية.

· بقوا يشربوا ما يروا.

· شامي لي ريحة (حمام)..ما عندو اجنحة!!

· ممكن الزول يشم ليه حاجة غلط؟

· وهو نفس الشيء الذي فعله اعلام المريخ عندما سجل الهلال لاعب المريخ السابق حمودة بشير وقالوا عنه (مصاب).

· حمودة بشير كان اروع (ارتكاز) في تاريخ الهلال في الالفية الثالثة.

· اصابة السرور.

· اصابة الهنا.

· الجديد في الحالة الاخيرة ان الهلال سجل ياسر مزمل ووالي الدين خضر من الاهلي شندي مع ذلك قطعت صحيفة (الصدى) بالمقلب الذي شربه الهلال.

· من ذلك العنوان الذي خرجت به صحيفة (الصدى) في عناوينها الرئيسية بعد تسجيل ثنائي الاهلي شندي في الهلال قطعت بنجاح هذا الثنائي في الهلال.

· اصلو أي حاجة بنقوا فيها في الصدى بتنجح.

· كنت اعرف ان ياسر مزمل شايل ردو في (كراعو).

· او في (رأسو).

· القون عندو متل الحلقة الاخيرة في المسلسل.

· او متل الحلة الفيها مناسبة.

· ما عارف قلت كدا ليه؟

· مجرد احساس.

· شامي لي ريحة (انقلاب)!!

· ياسر مزمل صبر كل هذه الفترة ليرد على الذين اكدوا فشله في الهلال بعد الاصابة التى كان قد تعرض لها.

· الجميل في الهلال وفي لجنة التطبيع الهلالية انها ارسلت ياسر مزمل الى القاهرة وأكملت علاجه ثم جاءت بعد ذلك وقيدته في كشوفات الفريق رغم (الاصابة) ليأتي ياسر مزمل ويحقق كل هذا النجاح في الهلال.

· اللمسة عند مزمل بي (قون).

· ما شاءالله.

· يصنع.

· ويسجل.

· دي (رونالدو) ما بعملها.

· حالتو دي عندو (رباط صليبي).

· انتوا ما كلمتوا صلاح نمر.

· ما كلمتوا منجد النيل.

· شامي لي ريحة (عكة).

· ما قلتوا ليه الزول دا عندو رباط صليبي.

· صلاح نمر قلبو وقف.

· بقى يتلفت متل الزول الما عندو رخصة.

· رسوم المخالفة بقت 10 مليون جنيه.

· تقول الزول كاتل ليه رقبة.

· والله انت يا صلاح نمر يلموا فيك ناس المرور بي حالتك دي وبعد المرور العملو ياسر مزمل بشيلو منك (اللوحات).

· بتقعد في الصقيعة.

· شامي لي ريحة (ما بنطير برانا).

· ديل العسكر بقوا يقولوا كدا.

· وقت الشغلة قبلتهم ..قالوا يفكوا المكون المدني.

· شامي لي ريحة (خيانة)!!

· الغريب ان لعنة (الرباط الصليبي) اصابت المريخ – حيث اصيب معظم لاعبي المريخ بالرباط الصليبي بعد السخرية من الاصابة (المقدرة).

· في زول بسخر ليه من اصابة؟

· في زول بسخر ليه من مرض؟

· قولوا باسم الله.

· نتمنى ان تعود كل العناصر التى تعرضت للإصابة في المريخ – وها هو التش قد عاد اجمل واقوى وأفضل بعد ان تعرض للإصابة بالرباط الصليبي.

· مالو نقص اصبع؟

· مشكلة المريخ ما في صلاح نمر.

· ولا في منجد النيل.

· ولا في سوداكال.

· مشكلة المريخ في (الصدى).

· الجماعة ديل بكرة ليكم عليّ يطلعوا يهاجموا شداد.

· كمان جابوا ليهم زول اسمو (الجاكومي) بيشاكل ضلو.

· الصدي كانت تتحدث عن (مسرحية صدارة الهلال ليوم واحد) في الدورى الاولى للممتاز عندما كان المريخ متصدرا.

· وقتها كان الهلال عندما يسبق المريخ ويلعب قبله ..يتصدر ..فيعود المريخ بعد ان يتساوي المريخ في عدد المباريات مع الهلال فيتصدر.

· شامي لي ريحة (وصافة).

· وصافة 11 بنط.

· كتبوا في الخطوط الرئيسية لصحيفة الصدي (المريخ ينهي مسرحية صدارة ليوم واحد).

· انتوا ما تصبروا.

· انتوا ما تروقوا.

· انتوا ما قالوا ليكم في دورة تانية.

· ما قالوا ليكم الغريق قدام.

· ما قالوا ليكم ناس صلاح نمر ديل ما قاعدين يقصروا مع الهلال.

· الجماعة ديل ما قاعدين ينستروا.

· الفريق الذي تحدثوا عن مسرحية صدارته ليوم واحد – بحمد الله وفضله الآن انهى الدوري الممتاز بفارق (11) نقطة من الوصيف.

· 11 طابق.

· 11 قرن.

· دي الواحد لو صنقع فيها ..ممكن يروح فيها.

· بضرب فيكم عرق.

· شامي لي ريحة (وجع رقبة)!!

· وجع الرقبة بشموه؟

· صحيفة الصدي (الفال الحسن للهلالاب)..ما وقفت في ذلك.

· صحيفة الصدى امس تحدثت عن ان الاتحاد العام اهدي بطولة الممتاز للهلال.

· تتخيلوا!!

· انتوا الناس ديل ما قاعدين يخجلوا.

· كتبوا ذلك في الخطوط الرئيسية للصحيفة.

· انتوا الناس ديل ما قاعدين يتابعوا الدوري؟

· ما بقرأوا جريدتهم؟

· الاتحاد العام الذي لم يعاقب المريخ ولم يحاسبه وهو يشرك (4) محترفين في مباراة المريخ وهلال الساحل في الدورة الاولى يتحدثوا عن انه اهدي الهلال بطولة الدوري.

· احساس ما في.

· مهنية.

· وطنية.

· ما في.

· الاتحاد العام الذي لم يعاقب ولم يحاسب المريخ الذي لم يشرك في مباراته امام الاهلي الخرطوم لاعبي (السنية) اللائي تفرضهم لائحة الدوري اهدى الهلال بطولة الدوري.

· في زول قبل كدا جرب طمام البطن من الكلام الاشتر؟

· الكلام الكُتر.

· نحمد الله ونشكر فضله على نعمة الهلال.

· الاتحاد العام الذي حرم ادارة الهلال وإعلام الهلال من متابعة المباراة من الملعب عشان المريخ فيه مشاكل اهدى الهلال اللقب.

· الاتحاد العام الذي فاجأ الهلال قبل ساعة من بداية المباراة وحرمه من حقه بالتتويج باللقب بعد ان سلب منه (اداريا) في المواسم السابقة بسبب (الاختناق) الموجود في المريخ.

· نحن مالنا ومال (الاختناق) الذي يعيش فيه المريخ.

· نحن ما عندنا علاقة بالجاكومي.

· ولا سوداكال.

· بي طريقتكم.

· الهلال الذي هزم المريخ امس وفاز عليه ورفع الفارق الى (11) نقطة ..الاتحاد العام اهداه اللقب.

· تتخيلوا.

· انتوا شارع النيل غيروه؟

· النيل ذاتو عيروه؟

· وإلّا الحاصل شنو؟

· شامي لي ريحة (محكمة رياضية).

· الناس ديل فاكرين محمد عبدالرحمن الغربال هو (الفاتح باني).

· شامي لي ريحة (تواطؤ).

· انتوا قايلين ياسر مزمل دا (الفاضل ابوشنب).

· ضربة جزاء واحدة ما كافية ..الفاضل بمنحهم ضربيتن.

· يا سادة يا كرام.

· الهلال فاز بالدوري بفارق (11) نقطة من الوصيف.

· لا مشينا (كاس).

· لا جبنا سيرة المحكمة الرياضية.

· شامي لي ريحة (فلول).

· في ريحة (كيزان).

· ما اتفقنا مع مريخ الفاشر …ولا انتظرنا المريخ يخصمو من رصيده (6) نقاط.

· الفرق بين الهلال والوصيف (11) نقطة.

· النقطة تنطح نقطة.

· (11) نقطة.

· بالميدان.

· في الملعب.

· من جوة.

· بي الغربال وارنق وابوعشرين والشغيل.

· (11) نقطة.

· انتوا الدولار عمل كم؟

· ناس لجنة التمكين شافوا (التفكيك) البعمل فيه ياسر مزمل لدفاع المريخ قرروا يبستعينوا بياسر مزمل في اللجنة.

· الزول دا اخطر من وجدي صالح.

· ياسر مزمل ببل صاح.

· ولا بتلفت.

· ما شاءالله.

· وتبارك الله.

· عينا باردة.

· هو عليكم الله المريخ ناقص (تفكيك).

· كفاية العملوه (الكيزان) في المريخ.

· ناس حازم والجاكومي هسع ماشين في نفس الدرب.

· الجاكومي بلحقكم نيل الحصاحيصا.

· اسمعوه مني.

· فرتكة صاح.

· سوداكال صدق نفسو.

· قال فريق المريخ ما بخسر من الهلال في رئاسته.

· بالله.

· خلاص يا سوداكال (الحنك) دي اصبح بيش.

· بعد كدا يمكن يشيلوك.

· يا زول ناس الغربال وياسر مزمل ديل ..ما في حاجة بتثبتهم.

· لا سحر.

· لا شعوذة.

· لا دجل.

· ولا كواديك.

· لا الفاتح باني.

· ولا صلاح نمر.

· ديل ما شاءالله عليهم.

· شامي لي ريحة (عدس).

· هسع العدس علاقتو شنو بالموضوع دا.

· اقول ليكم.

· ناس المريخ ريحتهم بقت عدس ..عدس.

· الله يديم الفرح.

· والانبساطة.

· ولجنة التفكيك.

· الغربال.

· وياسر مزمل.

· واباذر ميسي.

· انتوا وين عصمت عبدالحميد.

· الزول دا فاتوا (المولد).

· سيرة وانفتحت.

· ……………….

متاريس

· والله قاعد اكتب ليكم وخايف الكهربة تقطع.

· خايف ما الحق وارسل العمود.

· لو لقيتو العمود ..اعرفو الكهربة ما قطعت.

· ولو ما لقيتوه ..اعرفوه قطعت.

· المضحك ناس المريخ زعلانين عشان هلال كادوقلي انسحب من امام الهلال.

· انتوا عملتوا شنو؟

· لو انسحبتوا كان احسن ليكم.

· شكرا اولتراس الهلال.

· انتوا اعظم شعب.

· أي كلام فيكم شوية.

· في الكورونا.

· في الحظر.

· موجودين مع الهلال.

· في القاهرة.

· في الجوهرة.

· ما في حاجة بتوقفكم.

· انتوا اعظم شعب.

· اعظم جمهور.

· شكرا لجنة تطبيع الهلال رتبت لفرحة الهلال بشكل مختلف.

· ما عاوز اخصص اسم.

· لكن في ناس شغالين صاح ..سوف نعود ونتكلم عنهم.

· احلي من عكسية فارس ومن قون ياسر مزمل (برمة) الشغيل للكورة.

· انت معلم يا الشغيل.

· فارس لعب مباراة كبيرة.

· فرحة وليد الشعلة بهدف ياسر مزمل كانت اكبر من فرحة ياسر مزمل ذاتو.

· شكرا وليد الشعلة.

· محمد موسى.

· سليم برشاوي.

· شكرا عبداللطيف بويا ..انت فعلا كابتن.

· كلكم ما قصرتوا.

· شكرا للجهاز الفني للهلال.

· البرتغالي ريكاردو ..نقول عنو شنو؟

· أي كلام عنو شوية.

· شكرا لقناة الملاعب قدمت تغطية ممتازة لتتويج الهلال.

· ما عاوز اتكلم عن بكري المدنية.

· احسن اسكت.

· ….

· ترس اخير : بكرة عندنا كلام تاني..جهزوا (القفة) و (بستلة) اللبن.

قد يعجبك أيضا
11 تعليقات
  1. دلدوم يقول

    في زمتك دي كورة دي…..اكتبو عن فضيحة الملاعب والكاف…..صحافة حضيض تبيع الوهم …..الفريقين جنائز لا تبيع الوهم للجمهور واذا عزرنا المريخ بمشاكله طيب الهلال عزره شنو؟!

    1. احمد التجاني يقول

      يا دلدوم يا اخوي: والله لو كان المريخ فاز ما كنت قلت كلامك دة. المريخ معزور نعم لكن الهلال احترمه كفريق يعتبر الثاني في السودان ومباريات القمة لا تخضع لاى توقعات. لو كانت المباراة جنائزية وفاز المريخ لخرجت وقلت المريخ رغم كل ما يمر به هزم الله اما اذا فاز الهلال فالمباراة جنائزية. ليس هنالك وهم فيما قاله الأستاذ محمد. فصحيفة الصدى وتحديدا مزمل أبو القاسم كتب وروج عن انه الهلال اكل مقلب بتعاقده مع ياسر مزمل وبوغبا وانه اللاعبين الاثنين مصابين بقطع في الرباط الصليبي وانهم انتهوا كلاعبين. الان اللاعبين الاثنين ردوا رد عملي على ما كتبه مزمل في الملعب. الحقيقة ان الصدى هي التي تبيع الوهم لجمهور المريخ المغلوب على امره وليس العكس. والاعلام المريخي بشكل عام ساهم بشكل كبير في الكارثة التي يمر بيها المريخ. أتذكر بابكر سلك كتب عن محمد ارنق بعد انضمام الأخير للهلال وسخر منه فإذا بأرنق يثبت بعد فترة قصيرة قدراته كمدافع شرس بل وحجز مكانه في المنتخب.

      من يبيع الوهم يا دلدوم يا اخوي هو اعلامكم السالب. اما الحقيقة التي لا تستطيع ان تخفيها واللي نشرت في وسائل الاعلام الخارجية والداخلية ان الهلال انتصر على المريخ وفاز بالدوري – انتصار لا فيه شق ولا طق – لا من المكاتب ولا من كاس.

  2. صلاح يقول

    ههههه الصبي العجوز مستعارخي حرقه الكلام وجاك ناطي يبخس في بل الهلال سيد البلد أبزرد للوصيف المرخرخ، ولو كان المرخرخ فاز كان عمل لينا غيغة وزمبليطة وجاب ليه كم لقب ولا نجرة من عمود أستاذه وملهمه الكاهن الأعظم أليخماو……. أديله يا ود عبد الماجد يا كايده !!
    بعدين يا ود عبد الماجد زول إسمه أبو الأحقاد وتابع للفلول عاوز قلبه يبقي أبيض وما يشمت من مصائب الناس ؟ لكن أنا متوقع إنه يسقط سقطة شينة وربنا يخلص حق كل الناس الشتمهم والقذفهم والإنتهك أعراضهم…..

  3. Masa يقول

    عضو مجلس ادارة المريخ الجاكومي خش استاد المريخ بطنبجة وتم دحره
    وتيم المرخرخ خش القمة بطبنجه وبرضو تم دحره

    😂😂😂😂😂😂😂😂😂😂😂😂😂😂😂

  4. Ala يقول

    معقول مليار سطر وجملة واحدةمفيدة مافي ارحمونا الله يرحم والديكم

  5. جلابي الدوحة - قطر يقول

    من جقك تفرح الفوز علي المريخ بطوله بحد زاتها ومبروووووك الفوز
    نجي للمهم المباراه امس ما مقياس لقوة الهلال او المريخ بل كانت عك كروي فريق الهلال جاهز من كله ادارة ولاعبين ودعم الاتحاد وانسحاب فرق بطريقه غريبه جدا والفوز بشكاوي بطريقه اغرب يعني باختصار شداد وشلته هيئو ليكم كل الطرق للفوز بالدوري والفوز علي المريخ عكس المريخ الذي اتي الملعب ناقص هجوم ونفسيات ارض بسبب فقدان الدوري والادارات وحربها وانه المباراة تحصيل حاصل وساعدكم غارزيتو السمسار بوضع تشكيله للتتهزم ويقوم بفرض شروطه علي التسجيلات للسمسره
    المباراة اوضحت انه الهلال في الواطه والمريخ تحت الواطه والاتنين يحتاجو معجزه في دوري افريقيا
    افرح لانه ليك سنين ما فرحت لكن انت كاعلامي جيد وتقول الحق يجب التركيز علي فريقك في التغير ومعاجة الفتور والبطء والوقوف علي الكره كذلك اعلام المريخ فلا هلال ولا مريخ حيدونا الفرحه الخارجيه مع وجود هذا الشداد الذي خرب الرياضه والان الكل يلعب خارج ارضه
    لو حصلت هذه الكارثه في الصومال لاستقالت الوزارة والاتحاد ولكن في السودان الكرسي ورثه للجالس زقاموس ودستور السودان ليس به كلمة استقاله نهائي حسبي الله ونعم الوكيل علي مدمري الرياضه في السودان

  6. ابو الكوتش يقول

    حروفك ميه ميه
    مبرووووك لكل الهلالاب
    بطولة الدوري و الختام المسك

  7. فيصل جمال الدين يقول

    ههههه سيد اللبن جاء؟؟؟ قسما بالله العلي العظيم هضربة مثل دي ما سمعنا بيها !!! طبعا انت ما مصدق فوز الهلال وبعد هدف مويس ناس فارس خلوا كورة تعلب؟ خاصة بعد دخول رمضان ياااه فارس طلع خبيث زي المصريين تعمد الاحتجاج عشان تموت الدقائق وتنتهي المباراة… رغم ذلك والله مسيخة عليكم ومشبتو ترقصوا العروس لوحدكم وقطعتو رحط براكم هههه مشتهين التتويج لانكم نسيتو المراسم القانونية للتويج شي مضحك بجد اما لجنة التفكيك والفلول والكيزان خليك ماسك في بلف نبتة والمقرن وهل هي شركات تابعة لبيت مال المهدية يديرها انصار المهدي هههه ومال السوباط والعليقي ديل من اهل الصفة؟ المصيبة انت مخلوع وعامل فيها ذكي هههه عود لينا يا ليل الفرح واسعد المحرومين الذين غادرهم الفرح منذ سنيييبن طويلة..طبعا الجكومي وحازم عاملين ليكم فوبيا مسخت عليكم البطولة ام ضربات جزاء وتسلل وأسأل الغربال ٦٠% من حصيلة أهدافه ضربات جزاء وتسلل واضح وبعد دا فرحانين!!!! وشكاوي سرية ومؤامرة على مريخ السلاطين شوكة الحوت وفشل المؤامرة على اهلي الخرطوم لكن ما نجحت وقبلهم سيد الاتيام ود هاشم سنار والنسور ومريخ بورتسودان وحظي بالدعم ابوسبعة هلال هارون وشاطب ٦ النمور معقولة في فريق يطلق صراح ٦ من لاعبيه لفريق واحد؟؟؟ …. اذا تم لعب مباراة الكأس الدنيا ستنقلب نيران وسيمسخ ليكم كل شي وستصرخون… ههههه مخلوووووع ومهضرب وما مصدق سبحان الله.

    1. احمد التجاني يقول

      يا فيصل جمال الدين: بطل هضربة يا راجل وخت الرحمن في قلبك. المباراة انتهت والغلب حااااااااااااار وكان طقيت راسك بالسماء فريقك اتهزم اتهزم. اما حكاية انه فارس قصد ينطرد عشان يقتل زمن المباراة فكان تكون مبلوعة لو اختلف فارس مع اى لاعب من لاعبي المريخ. لكن “بلطجي المدينة”؟

      لو انا في مكانك لتقبلت الهزيمة بصدر رحب لانها في النهاية كرة قدم ولدعوت الله انه يصلح حال المريخ. الصراعات في المريخ وصلت حد انه الجبخانة تشتغل جوة استاد المريخ. وبالنسبة لفريقك في مجموعة لا تقل عن 8 لاعبين ديل بقوا في العد التنازلي. نعم الهلال عنده بعض اللاعبين لكن الغالبية أعمارهم مناسبة لخدمة الهلال سنين قادمة. ومن الاخبار اللي وصلتنا من مصادر موثوق بها انو امير كمال دخل على الشافع اليافع الحريف اباذر بالطريقة البشعة اللي الكل شافها وداس على رجله عشان اباذر قال ليهو في اول التحام معاه بعدما بدت المباراة”العب براحة يا والد”.

      خلي عنك الهلال يا فيصل – دة شعرا ما عندك ليهو رقبة – وخليك في مريخك اللي حالته تصعب على الكافر واللي مستقبله مظلم مظلم مظلم.

      1. Hajjam يقول

        ببغاوات اليخماو ديل مابتغالطوا ليك ياود التجاني. ماتضيع وقتك معاهم ديل بيفتكروا كلام اليخماو مقدس. ودائما تاخذهم العزة بالاثم واليخماو لقنهم انه المرخرخ افضل فريق في افريقيا مع انه اعظم انجاز لبهم الصعود اليتيم لدوري الاربعة الكبار بس هم بيفتكروا بيضة الديك والجعرانيات تعادل كاسات العالم.

  8. فيصل جمال الدين يقول

    هههاااااي شعرا ما عندك ليهو رقبة ؟ حلوة دي البسمعك يا تجاني يقول كوؤس المدعووووم مالية الدواليب هههه يا.. اثبت ان المريخ يعيش ظروف مظلمة وغير كدا ما بتقدروا والدليل الهستيريا من الفرحة التي طال انتظارها وطبعا الكذاب الاشر ما بقصر معاكم بإطالة امد ازمة المريخ خاصة والتسجيلات على الأبواب وقلبه الاسود لن يترك المريخ يستقر وطبعا انتم مشجعي المدعووووم لا يحب مناقشتكم لانكم .. من مشى على الأرض بالله كيف تصعون اسم الهلال مع اسم الجلالة استغفر الله العظيم قال ايه: الله الوطن الهلال جميع مخلوقات الله تميز وتعرف بأن الله الأول ليس قبله شي والآخر ليس بعده شيء وانتم غارقون في جهلكم وطبعا الكورة لهو فقط بالله هل يمكنني مجاراتك ومناقشتك وانت موغل في عمى الجاهلية الأولى مع قمة .. التي تنتقي الأسماء وهي جاهلة… اولا تخلصوا من جهلكم وبعدين تعالوا لرقبكم التي تتحمل الشعر كما غنى اسماعيل عبدالمعين ام قرقدى جبدي كان يبقى زي حقي دى. ههههه مبروك وعود لينا يا ليل الفرح.

اترك رد

لن يتم نشر عنوان بريدك الإلكتروني.

يستخدم هذا الموقع ملفات تعريف الارتباط لتحسين تجربتك. سنفترض أنك موافق على ذلك ، ولكن يمكنك إلغاء الاشتراك إذا كنت ترغب في ذلك. قبولقراءة المزيد