صحيفة كورة سودانية الإلكترونية

دبابيس ودالشريف

1٬962

دبابيس
ودالشريف

** استقبال كبير رائع للمريخ في بنغازي نرجو أن يكون دافعا للاعبين لتقديم الأفضل أمام الزمالك الذي لعب مباراة دورية مساء أمس أمام سموحة وبالتأكيد الجهاز الفني للمريخ حرص على متابعتها

** ما أفاد الترجي في مباراته أمام المريخ خوضه َمباريات دورية والزمالك كذلك يلعب مباريات دورية فيما توقف الدوري الممتاز عندنا من فترة طويلة واكتفى المريخ والهلال بمباريات ودية لم تضع أمامهما الحقيقة كاملة

** الهلال المهزوم في جنوب افريقيا حظي باستقبال حافل بمطار الخرطوم وما عارف لو كان غالب كان عملو شنو

** فريق مهزوم نستقبله بحفاوة وتصفيق ورقيص

** الكنغولي فولاران مدرب الهلال قال في تصريحات ساخنة… سنخطط لهزيمة الاهلي بامدرمان…. ربنا يسهل

** مجلس الهلال تسلم ٣٥٠ الف دولار حافز صعود الفريق لدوري المجموعات وبالمقابل يفترض أن يتسلم مجلس المريخ نفس المبلغ ولا نعرف هل تَم استلامه ومن استلمه.. مجلس ابوجيبين ام مجلس سوداكال

** وفد مقدمة من الاهلي المصري وصل الخرطوم والمصريون يمارسون ضغطا شديدا على الاتحاد الأفريقي لتلعب مباراته أمام الهلال بدون جمهور

** جماهير الهلال حمدت الله كثيرا أن عمار طيفور لم ينتقل لصفوف فريقها

** حكمنا النهائي على البرازييليين الأربعة الذين يلعبون في المريخ نتركه لما بعد دوري المجموعات وواضح أن اثنين منهم كبار في السن

** لجنة الأخلاقيات بالاتحاد الدولي تقول كلمتها النهائية في الثنائي معتصم جعفر وأسامة عطا المنان يوم الاثنين المقبل…. وامسكو الخشب.

** معتصم وأسامة ادينا من قبل في تصرفات مالية ومعتصم قام بارجاع ما حصل عليه وأسامة كان متلتل حتى الانتخابات الأخيرة

** غايتو الاتحاد الدولي جنو وجن الناس المتنهب ولا يرحم ابدا

** بعض البعام ردو علي ما كتبته عن سعدية عبدالسلام بقلة أدب

** شعراء المريخ وادبائه هم.. عبدالقادر كرف ومحمد الزبير الرشيد والسر قدور… د عمر محمود خالد… حاج حسن عثمان…. صالح بانقا صالح ابن البان…. الزبير عوض الكريم…. وما عداهم مسخ مشوه خاصة العاملين شعراء في اليومين دي ….. شعر دراب

** لم أعرف تاريخا في المريخ لسكرتير المريخ الجديد المنتخب وشايف جنو تصريحات..

** أقوى رئيس وسكرتير في تاريخ المريخ هو الراحل حسن أبو العائلة و عمل سكرتيرا للنادي قبل أن يكون رئيسا اما الرئيس الذي صرف على المريخ صرف من لا يخشى الفقر هو جمال الوالي

** انخدعت في محمد الحافظ عضو مجلس المريخ السابق

** لا يستطيع أحد أن ينكر ما قدمه حازم مصطفى للمريخ وحازم دخل تاريخ المريخ من أوسع أبوابه… والأخ أيمن ابوجيبين يسير في طريق جمال الوالي

** أين الإشاعة الكبيرة محمد طه التازي رئيس المريخ الفخري وماذا قدم لتأهيل القلعة الحمراء

** ١٢ محترف اجنبي في الهلال…. ما شاء الله يا العليقي.. يتربو في عزكم

** الاهلي المصري لديه ٣ محترفين فقط

** كابتن محمد موسى لاعب المريخ السابق اقترب من الحصول على درجة الماجستير….. مبروك مقدما… والرسالة تناقش غدا

** الانسحابات بدأت من منافسة كأس السودان…. انسحب هلال الساحل وتوتي ونخشي أن تتوالى الانسحابات في وجود اتحاد عام متساهل ضعيف أهمل منافسة تحمل اسم البلد

** الطقس في ليبيا بارد جدا ودي ما كويسة مع لاعبي المريخ…. والجالية السودانية في كل أنحاء ليبيا بدأت التحرك نحو بني غازي…. والمصريين يمكن أن يزحفو من القاهرة لبنغازي عن طريق البر… المسافة قريبة

** شاهدت مباراة الزمالك وسموحة مساء…. حصل تغيير كبير في أداء الزمالك وانتصر بثلاثية وأخطر لاعبيه زيزو وسيف الدين الجزيري ويتمتع بخط وسط مهول

** طبعا الشيشة راقده في ليبيا…. بختك يا ريكاردو

** ماذا يضيف عبدالمجيد جعفر للجهاز الفني للمريخ أو بالأصح ماذا يضيف للمريخ

** في الاخبار أن الرجل الذي تم تعيينه رئيسا لاتحاد الخرطوم اعتذر عن التكليف وان أسامة خاطب الشرطة لاستلام اتحاد الخرطوم….. معقولة البحصل بين اتحاد معتصم واتحاد الخرطوم

** قبل ١١ سنة وفي مثل هذا الشهر غادر دنيانا الفانية نجم الأغنية الأفريقية والسودانية… ملك الإبداع والطرب الزعيم محمد وردي…. واكتب بتوسع غدا بإذن الله

** وانتي معاي لا بندم ولا بقضي العمر تبريح

** آخر دبوس

** من ينتظر صعود المريخ والهلال لدور الثمانية في دوري أبطال أفريقيا كمن ينتظر السراب

قد يعجبك أيضا
5 تعليقات
  1. احمد التجاني يقول

    كلامك القلته دة كله انا بخليهو على جنب يا استاذ ود الشريف لانه ما فيهو جديد لكن تفتكر فريق جاى من الخارج مهزوم ومنتظراه مباراة هامة يعني الناس ما يستقبلوه ولا شنو؟ ولا يستقبلوه بالعياط والبكاء؟ ولا تستقبلوا بشكل كويس من باب رفع المعنويات وحشد الطاقات. شىء غريب انه حاجة زي دة تصدر منك. من واقع خبرتك وسنك الواحد ما بتوقع انه حاجة زي دي تفوت عليك. ثانيا: ظلمت عمار طيفور ظلم الحسن والحسين. عمار لاعب ممتاز وقام بدور هام في مباراة المريخ والترجي وكان سد منيع في خط الوسط. اما عن عدد محترفي الهلال فعليك الله قول لينا كم عدد المحترفين في المريخ؟ وليه اللي ينطبق على الهلال ما بنطبق على المريخ؟
    وبالنسبة لجملتك الاخيرة انه من ينتظر صعود الهلال او المريخ لدور الثمانية ينتظر السراب فأنا اختلف معك على الاقل نحن في نادي الهلال لن نرمي المنديل الابيض وسوف نقاتل حتى آخر لحظة ولو ربنا ما وفق السنة دي حننتظر السنة البعدها لاننا جبنا المدرب الكنغولي عشان يبني فريق. وصراحة كلامك عن المريخ المرة دي ما جميل. فالفريق يواجه ظروف غير عادية من اللعب خارج ارضه وتعرض لاعبين مؤثرين في صفوفه لللاصابة.

  2. ابو عبدالرحمن يقول

    طبب اامربخ حظي باستقبال رائع لمادا هل هزم التوجب في عقر داره والله ربنا ابتلي الوسط الرياصي بامثالكم ابه الحقد الأعمى دى

  3. سالم السالم يقول

    (استقبال كبير رائع للمريخ في بنغازي نرجو أن يكون دافعا للاعبين لتقديم الأفضل أمام الزمالك)
    (الهلال المهزوم في جنوب افريقيا حظي باستقبال حافل بمطار الخرطوم وما عارف لو كان غالب كان عملو شنو فريق مهزوم نستقبله بحفاوة وتصفيق ورقيص)

    على أساس إنه الدلقون كان يغلب وكدا يعني .هههههه
    إيه التناقض ده يا جدو .. وهل فعلاً الهلال ده عامل ليك منخوليا في دماغك

  4. ابوعمار يقول

    يعني يا جدو معقوله التناقض ده انت فعلا زي ما قال مزمز موظف استقبال ما اكتر استقبال المريخ (الرائع ) يكون لهم دافعا هو المهزوم من الترجي واستقبال سيد البلد حرام يعني يا جدو حلال علي الدلاقين وحرام علي الأسياد اها المصران ما قام عليك مع البعام ؟؟؟

  5. ابوعبدالله الخضرابي يقول

    اهدي لك عنوان مقال عمك مسيلمة الكذوب فاسد ومنخاز وغير مخترم .. يا دبوس اصلو الزمن ده بقى قليل من يلقى الاحترام الوالي طوالي العارف عزه مستريح كان بيصرف من عوجة رقبتك و12 محترف في الهلال عامل لك مغص تموت مغص بالعجزة والمسنين تبعكم والاهلي نقاطه في الحيب نفكر بنقاطه الحمام في بلدهم ونشوف انت يا دبوس تمشي وين بالعجزة والمسنين البرازيلين مش احسن يلعبوا معاك ضمنة ولا ضامنهم بنزلوا الكرش وصلعتهم تقوم ههههه
    الهلال عز رسيد بلد ما بيتكلم فيه الماسورة
    وان عدتم عدنا

اترك رد

لن يتم نشر عنوان بريدك الإلكتروني.

يستخدم هذا الموقع ملفات تعريف الارتباط لتحسين تجربتك. سنفترض أنك موافق على ذلك ، ولكن يمكنك إلغاء الاشتراك إذا كنت ترغب في ذلك. قبولقراءة المزيد