دكتور أكرم التلاجة مليانة وعيال فرحانة !!

بالعربى الكسيح

محمد الطيب الأمين

دكتور أكرم التلاجة مليانة وعيال فرحانة !!

* تمديد الحظر (الما في اصلا) يشبه شاي الغزالتين (الما فيهو غزالة اصلا) .
* بنشرب في شاي الغزالتين عمرنا كلو ما شفنا فيهو غزالة ، وبنسمع في الحظر ٣ شهور ما شفنا شارع فاضي .
* قصة وآخرها لسه .
* أمو لما (ولدتو) سألوها جبتي شنو؟ قالت ليهم جبت (ولد) ، وهو لما بقى كبير قرر يبقى (بت) ، وفي النهاية لا بقى ولد يملأ العين ولا بقى (بت) تسر الناظرين .
* بقى حاجة في النص مثيرة للطمام.
* وعلى فكرة .
* التيس الذي هو (راجل الغنماية) برضو عندو دقن .
* حاجة تكسف .
* رطل اللبن بي ٤٠ جنيه ، وعشان تعرف ده لبن إلا يقولوا ليك (ده لبن) .
* في حلتنا (رطل اللبن) زايدنو (رطلين موية) .
* الله في .
* يسكن أقصى غرب أم درمان ويعمل (ماسح ترابيز) بإحدى مطاعم الخرطوم . * له من البنين والبنات (٣) وله (أم) تعاني من فشل كلوي (بتغسل) .
* أثناء الحظر باع (الموتر) ودفع حوالي (٣٢) مليون إيجار (أمجاد) في شهرين ونصف بحثا عن مركز غسيل لوالدته ، أما باقي المبلغ ذهب إلي جيوب التجار (لبن ، صابون بسكويت ، بصل وزيت) .
* ثم باع فيما بعد (مروحة البرندا) وانبوبة الغاز من أجل سداد حق (إيجار البيت) .
* هذا الرجل الآن يسأل : هل السرقة تجوز أم يواصل سياسة البيع ويعرض (احدي كليتيه) ؟
* نرجو الإجابة من وزارة الصحة .
* حتى وقت قريب كنت أظن أن (البت) العندها (جضوم) معناها بتاكل عصيدة حارة ، والرجل العندو (كرش) معناه بياكل البطيخ بقشرو .
* هكذا كنت أظن.
* وأي زول طبعا حر في (ظنونو) .
* لا أقلل من كورونا وخطورتها ولكن معظم المشاهير الذين أعلنوا عن أصابتهم بهذا المرض كانت أعراضهم (شوية صداع) و(فقدان حاستي الشم والتذوق) .
* وهذه الأعراض بالذات داهمت نصف الشعب بولاية الخرطوم و(العبدلله) منهم وفيهم .
* فقط أنصح الجميع بأن لا يتعاملوا مع كورونا باعتبارها (برستيج) أو (مغنطيس) لجذب التعاطف.
* ده مرض ما هظار يا أولاد الحلال .
* وغايتو جنس غايتو .
* سنين طويلة والمرأة تنادي بالمساواة مع الرجل، وبأمر كورونا حصلت المساواة وكلنا أصبحنا (ربات بيوت) .
* وسنين طويلة والرجل ينادي بضرورة الحجاب عند المرأة ، وبأمر كورونا أصبحت المرأة (محجبة إلا ربع) و(محتجبة ونص وخمسة) .
* هذه من حسنات كورونا غير المرئية نشكر عليها الخالق العزيز.
* (ضر كده) قرر الكاردينال يبقى سياسي .
* الكاردينال في الرياضة كان (اشتر) وفي السياسة سيكون (صادق مهدي ساكت) .
* كل من يفرح بتمديد الحظر (تلاجتو في البيت) تكاد لا تقفل من فرط الخيرات .
* وكل من يستنكر تمديد الحظر (تلاجتو في البيت) فيها (كورة موية وباقي دواء أطفال وريحة عجورة نصف معفنة) ، ده طبعا اذا في تلاجة أصلا.
* الاكيد المؤكد أن (تلاجة دكتور أكرم بتقفل بعد تحانيس ومسايسة) .
* من التعابير الذكية يقولون : (فلان ده شغال بي بطنو) .
* أو شغال لبطنو .
* والمقولة تعني أن الوظيفة التى يشغلها (فلان هذا) توفر له راتب في حدود (الأكل والشراب) .
* شغال عشان يأكل ويشرب وبس .
* لا بيقدر يوفر ولا بيقدر يتعالج إذا مرض ولا بقدر يجامل في الأتراح والأفراح .
* شغلو في حدود بطنو .
* الآن نحن مع الحظر والاغلاق بقينا شغالين ناكل في خاطرنا .
* ويا أستاذة : قبل الحظر شايف كان عندك مبادئ (كرش) ، بتمنى بعد الحظر ما أشوف عندك مبادئ جلحات .
* و..و..
* ولما تحكي ذكرياتنا كنت تحكيها بي أمانة كيف بدت وكيف ……… كنا بنقطعك شارع الظلط لما جيت من البلد جديد .