ده الكلام يا بيكو

0
917

وكفى

اسماعيل حسن
ده الكلام يا بيكو

* أبوبكر عبد الله الشهير ب (بيكو).. شاعر وأديب مريخي قح…
* وجه هذه الرسالة عبر قروب (الديناكوردات شفوت الزعيم) بالوات ساب إلى القبيلة الحمراء.. وتعميماً للفائدة التي يرجوها، رأيت أن أخصص لها مساحة اليوم .. وهذا نصها:
* معركة دحر الصفراب: لا صوت يعلو هذه الأيام فوق صوت (دحر الصفراب)..
* لا تخاذل ولا تهاون..
* ولا قبول لأي من إحتمالات كرة القدم..
* لا نريد سوي الانتصار الذي يسعدنا كأنصار..
* هي معركتنا جميعا، كل الأسلحة فيها مباااااحة..
* للجمهور كلمته – وللمجلس كلمته – وللإعلام  كلمته !!
* وكلمة المقاتلين داخل أرضية الملعب هي العليا بكل تأكيد!!
* إذا مسيطرين علي التحكيم – إذا مستخدمين منشطات – إذا عاملين تحالف مع شيخ (مايرنو) –  كلو ما فارق معانا – عايزين نفوز فقط –
* الفوز ولا شئ سواه …
* مااااا بنعرف ليكم حاجه اسمها (بعرفوا شغل الكورة بره الملعب) – ولا بنعرف ليكم أي مبرراات – كورة القمة بطووولة براااها!
* مااااا عايزين كورة مشرفة – عايزين ضغط ، عصر ، وجيب من الشبكة..
* ما عايزين فلسفة – وكورة معقدة – عايزين حركة المقاتل أمير كمال أقل حركة فى الميدان تكون …
* التعادل ح يكون زي الخسارة وااااحد عندنا –
* الفوز فقط هو ما يسعدنا..
* مبررات ما عندنا لي زووووول !
* إذا عندهم شيوخ.. سناااار قرييييبة … الدمازين فركة رجل (ما بره السودان) ..
* ياخ (نيجيريا) ذاااتا ما بعيدة …
المهم نفوووووز  وبس..
* والفوز من عند الله.. ما من شيخ ولا دجل ولا شعوذة..
* بس لابد من السبب..
* عايزين نساهر للصباح من الفرح – عايزين ننتشي …
المدرجات ما فاضية للكتابات !!!
* ما عايزين (رابطة كده خلف الزعيم).. ولا (لجنة كده خلف الزعيم) – عايزين تشجيع يهز أرجاء أم درمان.. ويصل ناس الولايات ذاتو …
* دايرين جن أحمر عديل في ملعب الخرطوم ….
* من يريد (الانتصار) لا يبحث عن شماعة التبريرات !!
* شوف نفسك من موقعك تقدر تخدم الزعيم بشنو عشان ينتصر..
* دخول الاستاد (فرض عين لمن استطاع إليه سبيلا) …
* وإذا ما قادر تجي الإستاد لأنك بعيد فى الولايات أو خارج السودان؛ ماااااا مشكلة …
* خارج السودان ساعد المشجين بالدعم وتوفير وسائل التشجيع !!
* فى الولايات.. خش أقرب جامع واقرأ قرآن …
* أو امشي للشيخ الجنبكم فى الحلة –
* الحكم ذاتو لو جنبكم شوفو لينا …
* شوف بتقدر تقدم شنو واعملو بدون زول يطلب منك..
* انتصار الزعيم فى القمة مطلب لا حياد عنه – وهو واجب كل مريخي على وجه الأرض !! لا خيار ثاني …
* يا نفوووووز – ياااااا نفوووووز .. إنتهى.
————-
من المحرر
————-
* كفيت ووفيت يا بيكو..
* يوم الربوع دايرين نفوز..
* إذا قدمنا عرضاً أو لم نقدم عرضاً؛ لازم نفوز.
* إذا التحكيم ظلمنا أو لم يظلمنا؛ لازم نفوز..
* إذا هطلت أمطارٌ أو لم تهطل؛ لازم نفوز..
* إذا هبت كتاحة أو لم تهب؛ لازم نفوز..
* لازم نفوز يعني لازم نفوز..
* وح نفوز بإذن الله إذا اتوحدنا خلف اللاعبين وساعدناهم بالصففة والهتاف.. وصبرنا على الأهداف..
* أخوان أمير أقسموا بأن هذه المباراة مباراتهم..
* لا مباراة الزلفاني، ولا المجلس ولا الإعلام ولا الجماهير..
* والفيهم مشهودة..
* دائماً إذا وعدوا اوفوا..
* وإذا عزموا .. لا بهمهم هلال، لا بهمهم ريال..
* اطمئن يا بيكو… اطمئن..
* الربوع أخضر بإذن الله..
* وكفى.

المشاركة

أكتب رد

أدخل تعليقك من فضلك!
أدخل إسمك هنا من فضلك