صحيفة كورة سودانية الإلكترونية

رمضان في كل مكان

3

 

نبض الصفوة

امير عوض
رمضان في كل مكان

لا دائم إلا وجه الله.

كجول اتفنقل من الصدارة.

صدارة لجولة واحدة.

بعدها خطوات تنظيم.

معتدل مارش للمركز الطيش.

كل سنة بنعيش الفيلم ده.

بالزنبقة أو بالهلهلة.

الطيش ثابت.

أندية المجموعات دي كلها بتتقاتل للصدارة.

الهلال بموت في طياشتو.

الغريبة دائماً بشيل ليهو تلاتة نقاط.

يخلي الجماعة يعشموا.

و بعدها هاك يا تلطيش.

الأهلي المصري قطع فيهم كفين.

مجريات المباراة بتقول انها كان مفروض تنتهي سبعة صفر.

الاهلي عندهم محترف راس حربة تحلف تقول اهداهو ليهم سوداكال.

القون فاضي يشوتها في الآوت.

لكن ناس شحاته ما قصروا.

قون رمضان ده ما عايزين نتكلم فيهو.

ما ناقصين بمبان و فليق.

فنقلة رمضان لجمال سالم دي بنعمل فيها زي الما شوفناها.

قصة انو جدعو بزاوية و الكورة بزاوية دي بنقول مدبلجة و ما حصلت.

الأهلي فيهو حداشر لاعب.

ما لقوا زول يشوت البلنت الا رمضان؟

الاضطهاد ده شنو يا اولاد النيل؟

ما لقيتو غير (قشران) ده؟

ليه تعاودوا بينا الوجع تاني؟

ذنبهم شنو السافروا ديل؟

جمال (ملوص) جاتو نفسيات من اسم رمضان ده.

حرف (R) ده بقي من يشوفوا بخش في حالة اكتئاب.

الــR دي عندو بقت (سايلنت).

أي رمضان بجيب قون في (ملوص).

قال ليك تلاتة من لعيبة النجم مشوا المحكمة يغيروا اساميهم.

خلونا نرجع للتحليل.

الهلال استحوذ علي الكورة بنسبة ٢٩%.

بغض النظر عن الــ29 دي رقم رمضان عجب.

بالله دي نسبة يحللوها.

دي محرجمة.

ذكروني قصة واحد نجح في امتحان الشهادة و جاب 51%

خجلان يحلل نتيجتو.

قصدي خجلان يكلم بيها اهلو.

لما جاء موعد التقديم للجامعة صاحبنا دخل في زقاق ضيق.

ابوهو جاب الاستمارة و عايز يملاها معاهو.

صاحبنا يتراجف في الكرسي زي فارس لما يشوف الشحات.

ابوهو نهرو قال ليهو اها نسبتك كم عشان اقدم ليك في كلية مناسبة.

بصوت واطي رد لابوهو.

نسبتي 51%

أبوهو فرترب نط.. و قال ليهو (علي الطلاق نسبتك دي كان دخلتك معهد الموسيقي و المسرح الا تدخلك قسم الزغاريد).

اها يا هلالاب زغردوا بال29 دي.

كمان قالوا زعلانين انو القناة الناقلة طنشتهم.

فريق ما عندو ضربة ركنية؟

لا أوف سايد!!

لا متحكم في الكورة!!

المباراة كلها مخندق!!

يحللوا ليهو شنو؟

يقولوا شنو يعني؟

الا يقولوا (الحي الله و القاتل الله).

كمان الخندقة بتتحلل؟!!

الا يستعرضوا (البيض) الاكلوهو سليم و أبو عاقلة!!

يحللوا شنو يا زناطير؟

كدي قولوا انتو.

هاكم المايك ده حللو.

لعيبة مغلوبين بسلموا علي بعض تحلف تقول النتيجة ادتهم الصدارة.

فريق اتفنقل من المركز الاول للتالت و لعيبتو بحضنوا في بعض من الفرح.

ما مصدقين ذاتو.

كانوا متوقعين المازمبية.

ناس بروف بوي للان مخلوعين.

بوي طبعاً بقي بروف.

اتخصص بعد عمرٍ طويل.

تخصص نادر.

المسكين بقي أخصائي ضربات جزاء.

أي مباراة بسكب فيها علمه الغزير.

بنط في المهاجم زي ناس المصارعة.

قلبي مع المصنقراتي.

قاعد زي مدرب (السيجة) و مع ذلك كيسو طار.

قدر ما قبض في الارض في النهاية طار.

أحد الثقلاء قال الزول ده بقعد في الارض عشان يزوغ من الكاميرا.

ما عايز المنسقة معاش تشوفو.

قدر ما اتدسدس فطومة شافتو.

زمن الغتغتة و الدسديس انتهي.

لحقتو أمات طه قبل المؤتمر الصحفي ينتهي.

الزول اتكلم في المؤتمر دقيقتين بصفتو مدرب الهلال.

فتح الباب لقي نفسو مدرب سابق.

الديباجة في رقبتو لسه معلقة.

يا حليلك.

المدرب رقم 27 في كتيبة الكاردينال.

مدربين عايزين ليهم كشف.

أفريقيا دي كلها اتملت أكياس.

لكن انا بحلل ليكم المباراة.

انتو نصيبكم من التحليل آخر 6 ثواني.

6 ثواني فيها قوون صدفة.

تاني ماف هلال.

نحن شوفنا الاهلي بهلهل فيكم.

الهلهلة دي ما بتتحلل.

و لا شغل بوي الماسورة ده بتقال.

زول ضيع المنتخب.

و ضيع مباراة القمة علي فريقو.

و أمس قتل الباقين من الهلالاب.

الاحصائية دي هدية لكردنة.

لانو لما شطب الجريف قال انو اتسبب في هزيمة الهلال 15 مرة.

اها استلم الماسورة دي كمان.

احصائيتو جاهزة.

انت شوت بس.

ارفس طوالي.

هسع رأيكم شنو في التحليل بتاع بوي ده.

طيب نحلل ليكم جمال ملوص.

في القمة ملصها لعجب.

و جاء يتضاحك مع اولادنا.

يا ربي قاصد شنو بالضحك و الاحضان دي.

ما علينا.

خلونا في فنقلة أمس.

زول جدعوهو بزاوية و الكورة في التانية.

و لا هاميهو.

يتفتقل و يتدردق في النجيلة.

820 مليون في الشهر اتفنقلت.

كردنة بدفع 10 الف دولار للماسورة ده.

820 مليون يقبضها و يفك الكورة.

ذكروني قصة لذيذة.

قال ليك واحد ﻣﻘﺪﻡ ﻋﻠﻰ ﻭﻇﻴﻔﺔ ﻣﺤﺎﺳﺐ ﺑﺸﺮﻛﺔ.. ﺍﻟﻤﺪﻳﺮ قال ليهو ﻣﻜﺘﻮﺏ ﺑﺎﻟـcv بتاعتك ﺇﻧﻚ ﺳﺮﻳﻊ ﺑﺎﻻﺟﺎﺑﺔ ﺑﺎﻟﺮﻳﺎﺿﻴﺎﺕ.

اها ﺧﻠﻴﻨﺎ ﻧﺸﻮﻑ سرعتك.. 17 في 18 بي كم?

زولنا قال ليهو بسرعة تساوي 30.

المدير عاين ليهو من تحت النضارة.. و قال ليه (الاجابة غلط).

صاحبنا رد للمدير.. غلط غلط.. المهم سرعتي كيف.

ملوص بقبض في الدولارات و شغال يجاوب غلط برضو.

ولدنا.

و لا هاماهو المرمطة دي.

لما زهج منكم في المباراة قرر يطلع يشم هواء.

طلعتو دي جابت الفضايح.

بالله انتو جايين بتشيرت واحد للحراس؟

لا قفازات لا كدارات؟

طيب يونس ده كان بتدرب بشنو؟

قال ليك لما جمال حرن الجماعة 8 دقايق بحنسوا فيهو يدي يونس قفازو شدة.

جيمي قال ليهم امي قالت لي ما تدي هدومك لزول غريب.

و قال ليهم انا حالف و ما بقدر اصوم تلاتة يوم.

كفاية عليّ رمضان.

المهم بعد تحانيس و تحانيس و تدخلات من ابو برنيطة.. جمال ملوص قرر يصوم القضاء.

الا يقضي في تونس.

قالوا الايام دي باردة.

ياهو ده التحليل البتنقوا فيهو.

اها حللناكم.

شدوا حيلكم مع النجم.

سمعتنا في تونس زي الجنية الدهب.

تونس دي كلها بتعرف المريخ.

ما تمشوا هناك و ترجعونا للخمسات و الستات.

عايزين تكونوا الطيش ماف مشكلة.

كونوا طيش بإحترام.

بدون بهدلة و مرمطة.

ما تحرجونا مع ناس الزولفاني.

شمال افريقيا دي يادوب بقت تحترمنا.

ما تبوظو البنيناهو.

و نتلاقي بعد كورة النجم اذا مدّ الله في الآجال.

نبضة أخيرة

طيشابي.. لا تكلمني.

قد يعجبك أيضا

اترك رد

لن يتم نشر عنوان بريدك الإلكتروني.

يستخدم هذا الموقع ملفات تعريف الارتباط لتحسين تجربتك. سنفترض أنك موافق على ذلك ، ولكن يمكنك إلغاء الاشتراك إذا كنت ترغب في ذلك. قبولقراءة المزيد