زنبوق مغيرب المصراوي:

0
569

نبض الصفوة
امير عوض:
ثبت شرعاً رؤية هلال أفريقيا المُطيش.
بعد الزنبقة و المردغة جاء الدور علي المصرنة و الحمدلله تمت العملية بسلام و سلاسة.
في الوقت الذي نال فيه الريال أبطال أوربا ثلاثة سنوات متتالية محققاً بذلك الرقم القياسي أبت نفس الزمبوق إلا أن يحقق رقمه الخاص في (مسك الدفة) لثلاث سنوات علي التوالي.
الطيش عند الله بعيش.
و طيش أفريقيا ثابت مهما كان الخصم.
المصري البورسعيدي (تاسع الدوري المصري) و نهضة بركان (ثامن الدوري المغربي) و الزنطور المحلي حامل الأرقام القياسية بعدم الهزيمة محلياً.
طيش أفريقيا محلياً لم يذق طعم الهزيمة في الممتاز لثلاث سنوات!!
حكمتو بالغة.
أفريقياً أي فريق ممكن يهزم الهلال.. و محلياً فالأرقام القياسية حاضرة و الدعم التحكيمي متوفر لحماية الزمبوق من المصرنة.
بالأمس أنعش لاعبي المصري مشروع الأمن الغذائي عبر إفتتاح مزرعة الدواجن.
لأول مرة في العالم لاعب (يبيض) زمبوقين ورا بعض.
لعيبة ناس قريعتي راحت جارين زي الطرش في الزفة و اللاعب شغال يبيض.
أخيراً فستشهد أسواق الدواجن انخفاضاً طال انتظاره.
المعلق قال لم يبق من الهلال سوي الشعار.
شعار شنو يا حبيبنا.. الشعار ذاتو بتاع عصمت.
الحقيقة لم يبق من الزمبوق سوي البيض الذي فقس سواسيو من شدة المصرنة.
المصرون هو طيش المجموعات الأربع.
ما شاء الله لا قوة إلا بالله.
رقم قياسي خرافي.
الطيش لثلاث سنوات متتالية.
أنعم و أكرم.
سبع نقاط من 11 مباراة.
هيييييع.
دفيف البلد دائماً رافع راسنا.
المصري جاب ليهو قوون من خط بارليف.
يونس ما شافها.
يشوف شنو ملوص ده.
في كورة عايز يشوتها ملصها و شات الهواء.
أول مرة أشوف لي حارس بتكبكب براهو.
دي الحالة المصريين لاعبنها ودية.
المصريين لو كانوا محتاجين لنقاط المباراة دي ملوص ده كان إلا يهاجر قبرص.
مباراة زي التمرين.
و ناس بوي يبرطعوا تقول لاعبين في روسيا.
قول بسم الله يا بوي.
مخلوع و تدفر في أولاد الناس ديل مالك؟
اليشوف برطعتك يقول اتنين صفر حتأهل الهلال.
الفريق الوحيد الما فاز في المجموعات.
في الجدول بتاع البطولة محل عدد مرات الفوز مكتوب قدامهم (صفر).
الصفر الدولي لاصق في الزمبوق.
صفر البطولات تحول لصفر في الانتصارات.
حصالة المجموعة قاعد في السهلة.
الحمدلله الوقعتو في مجموعة المصري و البركان.
لو كنتو في مجموعة الوداد كنا هسه أعلنا الحداد.
قدر أخف من قدر.
هارون أمس جابوهو في التلفزيون.
انا قلت امكن يطلع ليهو بي بيان واللا حاجة.
أمس طبعاً المنسقة معاش فتحت باب (الحشرات و الكلاب).
الكلام ده قبل الطيشية تثبت.
البداية كانت بالحشرات و الكلاب.
لحدي نهاية الاسبوع الجاي غالباً نصل مرحلة الخنازير.
شيل الحال دور.
و أي زول قبض ليهو جنية موضوعو استحمي.
الكتابات حتنزل الخور.
و المتعة حتكون حاضرة.
كل سنة نعيد نفس الفيلم.
البطل بموت بطلقة في قفاهو.
الطلقة الفي القفا دي دلالة علي انو البطل كان جاري.
بطلنا ده مقضيها كلها لبس و طول لسان.
لكن ساعة الكوماج يدور بتلقاهو أول زول جاري.
الزمبوق يديهو كف.
و المغربي كفين.
و المصري بقبقبو و يقع فيهو تلطيش لما جضومو تورم.
الفريق الضعيف ده في القمة لو ما مرمطناهو يبقي نستاهل البحصل لينا ده.
طيش أفريقيا ده لو ما مردغناهو في الطين يبقي كلام تاني.
فريق زي جنازة البحر المطفحة.. ما فاز في 11 مباراة أفريقية متتالية.
11 مباراة أغلبها كانت مع فيروفيارو و المصري و الزمبوق و البركان.
11 مباراة لا مع الأهلي لا الوداد و لا الترجي و النجم الساحلي.
11 مباراة مع أندية خفيف الريشة.. و طيشنا برضو ماسك الدفة.
دفيف و خفيف.
ياربي كردنة حيتصرف كيف؟
حيعمل شنو في السخانة دي؟
المحترفين شاتهم.
تاني يشوت منو.
غالباً المونديالي.
أو الفرحان.
كردنة ما مضمون.
بشوت ضفاري.
قبل يومين قريت حوار مع ولدنا السابق ابراهومه.
قال كردنة ما أداهو قروشو.
الغريبة كردنة لما سجلو (بعد شطبناهو) قال ده لاعبو المفضل.
انا غايتو اقتنعت انو كردنة ده علاقتو بالكورة ضعيفة.
أي لاعب أشاد بيهو طلع كيشة.
من زمن فيصل موسي.
بتاع لبدت ليهو زي التمساح و قبضتو كف.
موسم واحد و اللاعب مشي الرف.
بعد فترة كردنة جاب سالمون جابسون.
نظام عايز يغيظنا.. قال حنقعدو في الكنبة و كل مرة نقول ليهو ركبتك كيف.
سنة كاملة سالمون لافي ركبتو بالتلج و كردنة ممغوص.
كان متخيلو حيلعب زي الزجاجي المعطوب و بقي هداف الدوري موسمين.
المغصة خلت كردنة سجل ابراهومة.
سجلو و قال عليهو لاعبو المفضل.
طيب لو مفضل أديهو قروشو.
انتو يلمنغو ده محترف واللا محلي؟
الزول الأروش ده المقعدو شنو لليلة؟
زول يطس أي حاجة قدامو.
ديك العدة ده شنو؟
أي تداخُل فاول.
أي كورة جري عليها يا فاتها يا فاتتو.
أروش رواشه عجيبة.
ده كردنة فطاهو كيف؟
يكون بلعب بي بطنو.
الله العليم يكون بياخد بالدولار.
دولار شنو في العفيص ده.
لكن انا بقترح انو كردنة يشطبو الليلة.
أشطبو يا العراب و حملوا مسئولية الطياشة.
الزول ده لو قعد لي مباراة القمة ناس أرحل برحلوك.
مباراة القمة ستكون الاخيرة لكردنة في الزمبوق.
لو ناس تيري ختو الرحمن في قلبهم دفاع البيض المصري ده ما بياخد أقل من ستة صفر.
بعثة الزمبوق حاضرة بالطيارة و البيض إلا يترحل بالطريق البري.
كنفّوي بتاع شاحنات شايل معاهو الانتاج و جاي.
دفيف البلد دائماً رافع راسنا.
إتغسل من الزمبوق و إتظهر في البركان و أمس إتمصّر.
فاضل المكوة يوم 12.
التشتشة و الكوي ده خلوهو علينا.
تعالوا لينا مكرفسين كده.
وشكم يلعن قفاكم من الطياشة.
نحن بنفردكم.
بنطرحكم.
و بنطبق وجعكم.
و بعدها نشيل دفاعكم بالمكوة.
نص الكشف بتاعكم حتشيلوا المكوة.
يا طيش أفريقيا.
و السودان.
*نبضة أخيرة*
تحكيم القمة يا مجلسنا.

المشاركة

أكتب رد

أدخل تعليقك من فضلك!
أدخل إسمك هنا من فضلك