صحيفة كورة سودانية الإلكترونية

شارد الذهن وعندو حبات عرق في جبهتو !!

687

بالعربي الكسيح

محمد الطيب الأمين

شارد الذهن وعندو حبات عرق في جبهتو !!

 

* القناعة الراسخة أن كثير من (البيوت السودانية) بتخاف من (الفرح) .
* الأفراح في بعض الأحيان بتكشف الفقر والعجز .
* الأفراح دايرة رأس مال .
* رب الأسرة التي تتألف من سبعة أطفال بشيل هم العيد وبشيل هم المدارس ، في حين إنو هنالك أسر تنتظر العيد والمدارس بفارق الصبر .. وطبعا لا إعتراض على حكم الله .
* زمان ونحن أطفال كانت بتنجرح مشاعرنا لما أصحابنا يجيبوا ليهم (ملابس العيد) قبل شهر من العيد.
* تلقى الواحد من أول يوم في رمضان جابو ليهو لبسة العيد .
* والنوع ده كان بيختنا في ضغط نفسي لا يعلم به إلا الله .
* بنعيش على اعصابنا.
* على ما بال يوم (الوقفة) يجي ويجيبو ليك لبستك بتكون أعصابك باظت.
* والله هم ساكت صحتنا بتنزل.
* والأطفال طبعا ما بسكتوا ، يوميا يجي يذكرك يقول ليك (أنا جابو لي لبسة العيد انت لسه ما جابو ليك لشنو) .
* لو داير تنسى ذاتو ما بيديك فرصة .
* يعمل ليك نفسيات عديل .
* وبما أن ذلك كذلك فإن جمهور المريخ يعيش في هذه اللحظات ذات النفسيات وذات الضغط.
* الهلال جاب جيسي (لبسة العيد) قبل شهر من التسجيلات .
* بدري بدري .
* جبنا (اللبسة) قبل شهر والجماعة دخلوا في ضغط نفسي لا يعلم به إلا الله .
* وتعال أناقشك.
* من الليلة لاحظ لأي مريخابي ح تلقاهو (شارد الذهن وعندو حبات عرق في جبهتو) .
* الإحباط والضغط بيعمل عرق في الجبهة .
* والصراحة السوباط ذاتو بالغ .
* جاب ليهم (جيسي والأخطر من جيسي في يوم واحد) .
* بزار شديد .
* ترف عديل .
* وياريتو لو وقف على كده.
* جاب معاهم سادومبا .
* الشغل البيعمل فيهو الطاهر يونس ده شغل (مغارز) والله .
* عرفنا جيسي وسونجاني سادومبا جايبو لشنو ؟
* لشنو داير تصحي الذكرى المنسية ؟
* لشنو داير تنكأ الجرح القديم ؟
* المريخاب لما شافوا جيسي المريخ ذاتو مسخ ليهم .
* من الليلة ولحدي (يوم القفة) أقصد لحدي يوم التسجيلات صحكتم ح تنزل .
* والله صحي.
* ويوميا ح نذكركم.
* نعمل ليكم نفسيات .
* والله العظيم نفك فيكم عبد الرؤوف وجيسي من الخلف لا تعرفوها كورة ولا تعرفوها مطرة.
* والعجب كمان لو رمضان عجب كان قاعد في الكنبة جمب نزار حامد وموفق صديق .
* غايتو السنة دي بالذات يا متنا من الضحك ويا كمان الضحك كتلنا .
* اليوم الأخ غير الشقيق جيسي ح يتابع مباراة الهلال وحي الوادي من داخل الملعب.
* ومعاو ساسا .
* افتحوا قناة الملاعب بس يا مريخاب .
* اشبعوا فيهو شوف قبل ينزل الملعب .
* ده لو نزل الملعب بينزل الدولار وبيرفع الجنيه وبيشطب صلاح نمر .
* المهم .
* مباراة اليوم لن تكون سهلة .
* وإعداد الوادي نيالا أفضل من إعداد الهلال .
* كل المطلوب تحقيق الفوز وحصد النقاط .
* ما ح نسألكم من الأداء.
* ولا ح نسألكم من التألق.
* بنسألكم من النقاط فقط.
* بالخبرة وبالاسم الكبير للهلال يجب أن نمضي بقوة إلي الأمام.
* نستثمر الروح المعنوية والأجواء الإيجابية التي يعيشها الفريق .
* منذ سنوات طويلة لم يستلم اللاعب حافز الفوز داخل الملعب عقب نهاية المباراة مباشرة .
* دي ما حصلت قريب .
* الآن مجلس الهلال سلم اللاعبين حافز الفوز على أهلي مروي قبل أن يخلعوا تيشيرتات المباراة.
* وهذا عمل يستحق التقدير والله .
* على اللاعبين أن يكونوا قدر التحدي.
* لا تفريط في النقاط .
* ولا استهتار أمام الوادي اليوم .
* ونركب صافنات ونجيبة (دارفورية) واصلو الزول بيموت والذكرى تفضل حية .
* و..و..
* والزول أبو عيون كحيلة جا …….(من الضهر) .

قد يعجبك أيضا
3 تعليقات
  1. Hajjam يقول

    سادومبا البطاح دحين شطب ليهو كم حارس من الاصيفر ياود الطيب؟

  2. ابو حسام يقول

    ههههاي العربي المسيخ الظاهر الزهايمر زادت نوباته ههه نسيت يوم المدعوم سجل موكورو وايشيا والمدافع المنبرش البهدل القط الكاميروني حارس صواريخ الغربال…وقتها نفس البوبار وبعد شهرين فقط تم تسفريهم جميعا وبعدهم جات كوتات كثيرة واستمرت المسخرة والفشخرة الكاذبة والنتيجة صفر حتى القبر…. توبوا لله جميعا ودعوا المربخ في حاله…ياخي سجلوا كل المبرزين في الكرة الارضية ونحن عارفين والفشخرة كل يوم في تصاعد …اليوم سينكشف المدعوم ما لم اب شنب ينقذو ولا اي واحد من ألحكام المرافقين للمدعوم طوال مشوار اللامتتاز والبطولات المزيفة ومهما عملتو لن تقدرو من محو الصورة التعيسة لابوالهل… قال جيسي قال قبل كدا انت بالذات كل صباح ومساء ترفقع القبعة لركبة جايسون المعطوبة ههههه ومنتظر ساماتا واليوم تتكلم عن صاحب دموع التماسيح سدومبا هههههاااي

  3. Hajjam يقول

    الدلاقين انطلقت فيهم نارية من تسجيل جيسي وبدأوا في حملات التبخيس. هههههه هااااااي. ما قلتو بيشبهكم وكنتم منتظرين تسجيله لكم. خلاص بقي ليكم مسيخ ؟؟

اترك رد

لن يتم نشر عنوان بريدك الإلكتروني.

يستخدم هذا الموقع ملفات تعريف الارتباط لتحسين تجربتك. سنفترض أنك موافق على ذلك ، ولكن يمكنك إلغاء الاشتراك إذا كنت ترغب في ذلك. قبولقراءة المزيد