صحيفة كورة سودانية الإلكترونية

شوية (عواطلية) ما بحددوا مصير ريكاردو يا سوباط !!

1٬771

قزاز ورذاذ

محمد الطيب الأمين

شوية (عواطلية) ما بحددوا مصير ريكاردو يا سوباط !!

* من سيئات مجتمع الهلال هي (الشتارة) التي تسيطر على البعض منا.
* شتارة وليتها كانت شطارة.
* شتارة وانانية ووهم كمان.
* لاحظ في الهلال دائماً تتم إثارة القضايا الحساسة في الوقت الخطأ.
* هم كده على مر التاريخ.
* تكون أمام الفريق مباراة في غاية الأهمية، فجأة يظهروا ليك ناس يعكروا الجو ويشتتوا الإنتباه ويضعفوا التركيز.
* لا بعرفوا بطولة أفريقية ولا بعرفوا تسجيلات ولا بعرفوا مباراة قمة.
* (عواطلية) يتحدثون بإسم الهلال وفي حقيقة الأمر الهلال في آخر اهتماماتهم.
* وهؤلاء (العواطلية) يجدون الدعم من أعضاء في المجلس للأسف الشديد.
* أي مجلس من مجالس الهلال بتلقى فيهو (عواطلية) حولهم (عطنلجية) من خارج المجلس.
* ديل الحق والباطل عندهم واحد.
* الهلال عندهم مجرد (بقرة) يحلبونها طوال العمر .
* و(العلف) هو إثارة المشاكل وخلق الأزمات.
* حاجة تكسف والله.
* فجأة وبدون مقدمات تعرض مدرب الهلال المحترم ريكاردو على هجوم غير مبرر على هامش مباراة الهلال والأمل.
* أقول هجوم وليس نقد لأن النقد لا يكون عن طريق الصراخ والعبط.
* ثم إن محاولة اضحاك الناس وخلق جو داخل الإستاد بالسخرية من المدرب هو جهل وعبط.
* دخل ريكاردو في حالة من الاستياء والحزن أثناء وبعد مباراة الهلال والأمل بسبب هتافات بايخة وسخيفة كانت تصدر من بعض الحضور.
* ريكاردو أبلغ المقربون أن طريقة الهتاف لم تكن محترمة.
* مسكين البرتغالي ما عارف نحن الله عاقبنا بناس ما بعرفوا في كرة القدم إلا (لون الشعار وجيوب الإداريين).
* تاني ما بعرفوا حاجة.
* عليك الله في هلالابي مباراة القمة باقي ليها (٤٨) ساعة بطالب بإقالة المدرب؟
* ساعات ويلعب الهلال أمام المريخ فبدلاً من الدعم يحدث العبط.
* أنت لما تهتف ضد المدرب لازم تعرف إنو المدرب ده عندو مترجم ومن حقو يعرف كل كلمة بسمعها.
* أنا بنصح رئيس الهلال السوباط.
* بنصحك يا ريس .. ما تخلي شوية (عواطلية) يحددوا مصير الهلال.
* ما في زول من مجلسك يدعي ليك إنو بعرف كورة وتسمع كلامو.
* لو في زول من المجلس عندو رأي في ريكارود خليهو يحتفظ بيهو لنفسو.
* ريكاردو مدرب مقتدر وعلى درجة عالية من الفهم والمعرفة.
* يتعادل أمام فاسيل ولا يخسر من توتي ده ما مربط فرس.
* يخت فارس في الكنبة ولا يعتمد مؤيد عابدين في التشكيلة ده ما موضوع.
* وأوع تقول لي (شوط المدربين وما شوط المدربين).
* لما الدورة التانية بدت شكل الهلال كان مختلف.
* وأي هلالابي يقابلك يقول ليك الهلال بقى يلعب كورة جميلة.
* قالوا بصمات المدرب بدت تظهر.
* فجأة حصل تعادل مرتين قالوا المدرب كعب.
* بالسهولة دي؟
* الهلال استسهل عملية إقالة الأجهزة الفنية بحثاً عن نتائج مستعجلة.
* سبحان الله .. دايرين فريق زي برشلونة وما دايرين يصبروا على المدرب.
* طاقم فني كامل كان يعمل مع مورينهو ومع ذلك ناس قريعتي راحت عندهم رأي.
* هو مورينهو ما عندو رأي في ريكاردو أنت منو ذاتك عشان يكون عندك رأي؟
* نصيحتنا للسوباط أبقى عشرة على ريكاردو حتى لو طار الهلال من الأبطال وفقد كأس السودان.
* لو طرنا من الابطال قم بتغيير اللاعبين وتغيير النجيلة وتغيير الإستاد ذاتو لكن ما تغير المدرب.
* العيب فينا نحن ما في الأجهزة الفنية.
* الكاردينال تعاقد مع ٢٩ مدرب وفي النهاية لا طال بلح الشام ولا عنب اليمن.
* هسه الجماعة ديل بدخلوك في دوامة اقالات وفي النهاية خسران أنت.
* وح تخسر تركي آل الشيخ عشان شوية عواطلية.
* والله تشيل المدرب ده العواطلية ديل مرتب محسن سيد ما يقدروا يدفعوا.
* أي فشل يصاحب الهلال في الفترة القادمة غير الفريق كلو وجدد الثقة في الجهاز الفني.
* أنا من عرفت الهلال اشرفوا على تدريبه حوالي (998) مدرب وما عملوا حاجة.
* ما عملوا حاجة عشان العيب فينا نحن ما فيهم.
* ما في مدرب جا البلد دي كعب.
* كعبين نحن.
* عليك الله ما عيب .. مباراة القمة بكرة والناس بتتكلم سلباً عن ريكاردو وعن السموأل.
* حاجة تسد النفس والله.
* و.. و..
* وأعوذ بالله.

قد يعجبك أيضا
2 تعليقات
  1. Maqdi يقول

    مدرب فاشل ما عندو شى يقدمو اكتر من كده.. الهلال ياهو الهلال ماف اى تغير ولا بصمه بتاعت مدرب والله الهلال قبل الاسمو ريكاردو ده كان احسن هسه أضعف فريق ممكن يقيف معاه الف احمر . كل المباريات اللعبها الهلال اثبتت انو الاسمو ريكاردو ده مدرب فشنك وسيضيع ذمن الهلال وفى النهايه بتحصدو منو السراب .

  2. انت ما عارف الزمن بالزين ولأ بالذال تكتب عن مدرب محترف

اترك رد

لن يتم نشر عنوان بريدك الإلكتروني.

يستخدم هذا الموقع ملفات تعريف الارتباط لتحسين تجربتك. سنفترض أنك موافق على ذلك ، ولكن يمكنك إلغاء الاشتراك إذا كنت ترغب في ذلك. قبولقراءة المزيد