شيلوا من حيطة الهلال (مدماك) !!

1
529

بالعربي الكسيح
محمد الطيب الأمين

* قبل إنتشار ظهور الساعة كان الناس يعتمدون على (الضل) لتحديد (المواعيد) و(الزمن) ..
* الواحد لو عندو مشوار الساعة أربعة بينتظر (الضل) في البيت يصل (حتة معينة) ثم يتحرك ..
* مواعيد الصلاة ذاتا بيظبطوها بـ(الضل) ..
* والمواعيد الغرامية برضو بـ(الضل) ..
* ورغم أن الساعة أصبحت منتشرة وموجودة في (الجيب) وفي (اليد) وفي (التلفون) وفي (اللابتوب) إلا أن أهلنا الكبار في كثير من قرى السودان لسه شغالين بـ(ساعة الضل) ..
* لسه بعاينوا لضل الحيطة لتحديد المواعيد ..
* وبما أن الساعة (جروها) يبقي من باب العدل أن نشيل من الحيطة (مدماك) ..
* شيل من الحيطة (مدماك) عشان يديك الوزنة مع الساعة (الجروها) ..
* جر الساعة الذي حدث في توقيت السودان يجب أن يوازيه (جر ساعة في حياة الهلال وتوقيته) ..
* يحتاج الهلال أن يجر (ساعته للوراء) حتى يعود فريق الكرة وتعود كثير من الأشياء التى تميز بها الهلال دون سواه ..
* ومن أبرز هذه الأشياء الهيبة والقوة والبريق ..
* بعض الإستساهل في إدارة الهلال هو الذي أضعف الشخصية الفنية للفريق على الأقل في فترة الكاردينال ..
* يحتاج الهلال لضمائر صاحية وشخصيات تهمها المصلحة العامة وليس المصالح الشخصية ..
* ثم يحتاج الهلال أن نحبه بتجرد ..
* نحبه عشان هو الهلال وبس ..
* لو كل زول حب الهلال عشان هو الهلال وبس لن تكن هنالك مشكلة ..
* نبعد الأغراض الشخصية من حبنا للهلال وسنجده من بعد ذلك بدون علة إن شاء الله ..
* يواجه الهلال غدا فريق هلال الأبيض ..
* والمباراة أكثر من عادية بحسابات التاريخ والقاعدة الجماهيرية والفوارق المادية ..
* ولكن ما يجعل المواجهة غير عادية هو أن هلال الأبيض يواجه الهلال بسلاح الهلال نفسه ..
* هلال شيكان يحاربنا باسحلتنا التى رمينها بدون تخطيط وبدون تفكير ..
* وهذه تعتبر أيضا من أكبر مشاكل الهلال في الفترة الأخيرة ..
* لاحظ الآن معظم الفرق التى تقف مع الهلال (ألف أحمر) ستجد إنها تعتمد بشكل كبير على مشاطيب الهلال أو تعتمد على لاعبين كانوا في غرفة الهلال وخرجوا لأن الهلال تساهل في ضمهم ..
* نحن نرمي إسحلة خطيرة جدا فيستخدمها الخصم ضدنا مستغلا العامل النفسي والمعنوي عند اللاعب ..
* غدا سيلعب الشغيل وكأنه لم يلعب من قبل وكذلك نيلسون وكرنقو وسيسية وغيرهم من اللاعبين ..
* أهلي شندي ولأكثر من ثلاثة سنوات يحرج الهلال بالأسلحة التى تخلص منها الهلال دون مبرر فني ..
* الفريق إذا أراد أن يحافظ على سطوته ومكانته وقوته لابد أن يسجل صاح ويشطب صاح ..
* وللأسف الشديد الهلال في فترة الكاردينال (لا بسجل صاح ولا بيشطب صاح) ..
* حتى في الشطب بنشطب غلط ..
* وهذا عيب كبير ..
* الهلال يملك أسطول كبير من الخبراء والمدربين والمحبين الذين هم على إستعداد لخدمة النادي دون مصلحة ..
* والإعتماد عليهم سيجنب الهلال شر المقالب والأخطاء المتعلقة بالشطب والتسجيل ..
* تلقائيا أنت لو إتعلمت تسجل صاح ح تتعلم إنك تشطب صاح ..
* هى حلقات مربوطة مع بعضها البعض ..
* لازم المعايير تكون دقيقة في الشطب وفي التسجيل حتى لا يختل ميزان الفريق وحتى لا يضعف ..
* إنت تضعف وغيرك شغال يقوي في نفسو ..
* بعد شوية ح تكتشف إنك بعيد من الصف الأول ..
* ح تلقى نفسك فقدت محلك ومشيت محل ما بشبهك ولا بشبهك مكانتك التاريخية ..
* والفرق بتتبني في أكثر من موسم ..
* لو كل سنة بتسجل إن شاء الله لاعب واحد (نافع) أو أتنين ، بعد تلاتة سنوات بيكون عدد النافعين في الكشف أكتر من عدد العاطلين عن الموهبة ..
* تلقط المواهب عشان تبني فريق صاحب شخصية وقوة حقيقة ..
* أكثر ما يضر الهلال بخلاف السمسمرة وشغل العواطف والمصالح هو (البطء) الذي يمارسه الهلال في حسم ملف التسجيلات ..
* بطء عجيب والله ..
* الآن المريخ أرسل خطاب لنادي الشرطة القضارف يطلب خدمات الطرف الأيمن حسين ..
* وحسين هو من نجوم الدوري الممتاز ولاعب صاحب موهبة كبيرة دون شك ..
* لماذا لم يقدم الهلال طلب لنادي الشرطة بل لماذا لم يستفيد الهلال من محمد موسى لإكمال الصفقة مع زميله لاعب الشرطة القضارف ؟؟
* بعض الأندية تمنح النادي الذي يرسل خطابا الأولوية في التفاوض ..
* نادي أمبدة عندما تساوى الهلال والمريخ في قيمة الصفقة فيما يتعلق باللاعب أبوعاقلة عبد الله ، رجع النادي لتاريخ الخطابات فوجد أن خطاب الهلال هو الأول فمنح الأزرق الأولوية ثم تحدث مع اللاعب لمعرفة رغبته ..
* الآن أتوقع أن يمنح نادي الشرطة الأولوية للمريخ لأنه أرسل الخطاب مبكرا بينما لجنة تسجيلات الهلال ربما هي مشغولة بإفتتاح الجوهرة ..
* إهمال مثل هذه الأشياء يدفع ثمنه الهلال غاليا ..
* والثمن في الغالب بيكون بالجهتين ..
* الجهة الأولى بتكون ضيعت لاعب موهوب مثل التش ..
* والجهة الثانية بتكون قويت المريخ بطريقة غير مباشرة ..
* (شغل الكورة) ينقص الهلال حاليا ..
* الهلال محتاج شفوت كورة لا ينظرون لمصلحتهم الخاصة ..
* شفوت كورة يرصدون المواهب ويقودون المفاوضات بنجاح ..
* لو لم يفتح الهلال الباب أمام الشفوت سيخسر الكاردينال كل معركة لها علاقة بالتسجيلات ..
* عموما .. نتمنى أن تشهد مباراة الغد عودة الهلال لسكة الإنتصارات والعروض الجميلة ..
* الدوري ما عاد يحتمل النزيف ..
* ونركب صافنات ونجيبة (هلالابية) وأصلو الزول بيموت والذكرى تفضل حية ..
* و..و..
* ونحن الهلال بنريدو جد .

 

 

 

حمل تطبيق كورة سودانية لتصفح أسرع وأسهل

 لزوارنا من السودان متجر موبايل1

http://www.1mobile.com/net.koorasudan.app-2451076.html

3,699 حملو التطبيق

لزوارنا من جميع انحاء العالم من متجر قوقل

https://play.google.com/store/apps/details?id=net.koorasudan.app

13230 حملو التطبيق

على متجر   mobogenie

 http://www.mobogenie.com/download-net.koorasudan.app-3573651.html

5000+ حملوا التطبيق

المشاركة

1 تعليق

  1. منذ الازل لم يكسب جلفوط البلد اي نجم تسجيلات امام الزعيم .. كدي احكي لينا يا شفت زمانك معركة وااااااحدة كسبها الجلفوط امام المريخ؟؟ يا زول ما عندك شغلة تقضاها .. لو كرنة بقى الطيب عبدالله ما بكسب لاعب يريده زعيم البلد الاوحد وانت عارف كدة كويس

أكتب رد

أدخل تعليقك من فضلك!
أدخل إسمك هنا من فضلك