صحيفتنا تغرد خارج السرب والزعيم لاعب باكر السبت

1
636

تغريدة واتساب
بقلم : معاذ ابومؤيد
صحيفتنا تغرد خارج السرب
والزعيم لاعب باكر السبت

الناس كلها منتظرة القرعة وناسية كورة باكر السبت
القرعة وعرفناها
لكن من هنا ولي قدام حنمسكها عتبة عتبة وباب باب والناس السرحت بعيد ووصلت المغرب نقول ليهم المغرب لسه لحدي مانصلو قدامنا ثلاث عتبات واول عتبة باكر
عايزين نعرف كورة السبت وعتبة باكر طالما مجلسنا الهمام راضي بكل كلفتة وهرجلة في الدوري العام !!!
عايزين نشوف تجهيزتنا ونشوف مدرجنا دربو وين وعايزين نستقبل اللاعبين استقبال جميل لرفع الروح المعنوية والناس ماتنتظر اداء لانو الارهاق حيكون سيد الموقف عايزين نضمن نتيجة تجيب الثلاثة نقاط فقط لاغير !!!
المهم مدرجنا لازم يعرف انو مباراتنا الجاية دي محتاجة رفع معنويات لانو لاعبي الفريق حيكونوا مرهقين جدا جدا لم نحس الرتم انخفض نرفع رتم المدرجات وممكن نبتكر حركات ،،،،،
••••••••••••••••••••••••••
مافي شي حيضيعنا غير المجاملات الكتيرة دي
كل شي مجاملات
من تشكيل لجنة التسير لحدي الموية في التمرين!!!
اقلام معينة شغالة في اتجاه المجاملات وقصة صاحبي وصاحبك !!!
يعني مجاملات وصداقات الاعلام موديانا للخلف معتدل مارش ،،،،،،
اليومين دي التلميع الاعلامي سيطال شخصيات معينة واسماء محددة ركزوا في الاعمدة الايام الجاية تلميع وتزبيط علي حساب الكيان ،،،،
مصالح شخصية ياباشا وقلمي تحت امر حضرتك!!!!
••••••••••••••••••••••••••
غايتو ناس التجمع والمعارضة المعروفين حاضنين صحيفة الكيان وقاعدين
وكمان الصحيفه تفرد ليهم في مساحات بالله دا يسموه شنو والغريبة صورهم كمان في الصفحة الاولى
وقت الزنقة ماشفناهم لي ولاشفنا مساهمتهم معانا !!!
وكمان بيعلقوا علي تقرير امين المال تعلقوا لي شنو ودخلكم بيهو شنو دفعتوا جنيه واحد عشان تعلقوا ولاخلاص عايزين تظهروا في الكفر وتتلمعوا علي حساب الجماهير الغلبانة !!!
ولو صحيفة الكيان حتكون واجهة للمعارضة والتجمع من ضهر الغلابة والجماهير حنقول ليكم
شكرا سعيكم مشكور!!!
لانو الدعم الجاكم والبجيكم دا عشان انتو صحيفة للنادي مش صحيفة للناس البتعادي،،،
عندكم اي فهمه تاني ممكن تعملوا صحيفة انشاء الله الكترونية بس
لكن صور الجماعة منورة الصفحة الاولى!!!!!!
قلتو لي ابتدأ من الاحد والايام القادمة مسلسل جديد
لكن نحن في الاعلام الجديد سنكشف كل الحيل والسم المدسوس في اللبن !!!
عشان ناس قريعتي راحت يشوفو ليهم منبر تاني يلمعوا بيه نفسهم
وصحيفة الكيان للكيان وللشرفاء من ابناء النادي مش للناس الشردت وقت الزنقة والناس البتفشخر وتتلمع في الزحمة !!
•••••••••••••••••••••••••• ومن اسه نقول ليكم ياشفوت وياجمهور النفرة الجاية في ناس عايزة تلمع نفسها علي حسابكم خدو بالكم!!!
حنسمع تبرعات مليونية من بعض الشخصيات الكانت منسية !!
عشان كدى نفرة الجمهور ماعايزين اي وجوه ادارية سابقة تتلون او تندمج معاها !!!
الكلام ليك يالمطير عينك
ناس ابجضوم والناس العاملة اركان وعامل كيمان ديل تاني شوفوا ليكم مسطبة اقعدوا فيها لانو مجتمعنا مابشبهكم وبدل تدينو مبالغ من المال عشان تلمعوا نفسكم احسن تشوفوا ليكم شغلة تانية!!
نفرتنا دي للناس البتحب الكيان بالجد ،،،
شايف صوركم منورة صفحات التواصل الاجتماعي وقاعدين تتلمعوا حبة حبة في القروبات !!!
••••••••••••••••••••••••••
كلمة اخيرة
التلميع والتسطيع دا للعربات ماللبشر عشان كدى ممنوع تكرار الوجوه الادارية في مجلسنا القادم
••••••••••••••••••••••••••
ونحن علي المدرج ندعم ونشجع ونتفرج وامبارح فرجتنا كانت مختلفة ،،،
كانت في مطار الخرطوم وشكرا لكل شفت ادانا من زمنو واتحمدل سلامة الوصول
شكرا قروبات المريخ بالواتس
شكرا ناس ساس واساس
عايزين مدرجنا يوم السبت يقود المباراة ويتحكم في ايقاعها اللاعبين مرهقين لكن حناجرنا غير مرهقة ،،،
ولاطبلاتنا تعبانة،،،،
نتحكم في مجريات المباراة بالهتاف اللاعب عايز الحماس فهمتوناياشفوت المدرجات ،،،،،
وياريت ايمال يلعب بمظاليم الهوى بتاعين محمد ميرغني
ناس كنبة وراء القاعدين ساي !!!!
عشان كل زول ياخد فرصتو قبل المغادرة القادمة ،،،،،
لكن في ناس اصلا مفروض يغادروا من غير فرصة معروفين بالاسم وبالشكل والجضوم !!!”
••••••••••••••••••••••••••
همسة اخيرة
دي رسالتنا الاخيرة ياصحيفة النادي الناطق الرسمي باسم الكيان
ياتنضفوا صفحاتكم من ناس المصالح
والناس الاخرونا سنين بسبب الصراعات
ياكمان تغريدتنا حتعرى الجميع للجمهور
في ناس كدة بيجيبو التخمة ارحمونا منهم !!!
سامعني يا استاذة
نكن لكم كل الحب والاحترام لكن !!!استغلال منبر الكيان لتمرير التلميع والتسطيع دا كمان عندنا معاه وقفة
دي اسمها صحيفة النادي اهدافها حماية الكيان وتطوير الافكار واحتواء جماهير النادي وزرع ثقافة نقد الذات وحب كل شي حتى الطوب الفي المنشأت

يعني صحيفة للوعي والحشد وتنوير المشجع البسيط بحقوقه وواجباته تجاه الكيان ومصدر دخل للنادي ،،،
ومن هنا ولي قدام حنعمل إن فوكس علي صحيفة النادي اي مسار ماياهو واي تلميع ماياهو واي صورة للناس الماياهم وقفتنا حتكون عبر هذه التغريدة الموجهة لكل القروبات ،،،،،،
••••••••••••••••••••••••••
خارج النص
المريخ كيان
والكيان ليه حراس
والحراس ديل الشفوت
والشفوت هم جمهورالمدرجات
ماعندنا كبير علي المريخ مهما كان اسمو او شخصيتو !!
المريخ نادي الشعب
والشعب هم الجماهير
لايصح الا الصحيح
تغريدتنا في الشباك مابهمنا اي باكات ،،،،
الواضح مافاضح
البينا عمل فقط ولاشي غير العمل
مافي زول بنتقدوه لو عملو ماشي صاح !!!!
العمل يسكت جميع الالسنه والاقلام ،،،،،،،
••••••••••••••••••••••••••••••••••••••••••••••••••••

 

تغريدة واتساب

المشاركة

1 تعليق

  1. كاتب يمكن أن ينتمي الي اي مكان الا الصحافة. أنصحك تشوف ليك شغلة غير الكتابة.

أكتب رد

أدخل تعليقك من فضلك!
أدخل إسمك هنا من فضلك