صحيفة كورة سودانية الإلكترونية

غايتو اللاعب ده أنا شفتو في باص الوالي !!

18

بالعربي الكسيح
محمد الطيب الأمين
غايتو اللاعب ده أنا شفتو في باص الوالي !!

* عندما دشنت حكومة الولاية (باصات الوالي) قبل نحو(5) سنوات كانت تنشد حل مشكلة المواصلات بالخرطوم..
* ولا نجزم بأن (الباصات) التي جاءت من أجل (حل المشكلة) قد أصبحت هي نفسها (مشكلة) ..
* لا نقول ذلك لأنها خففت لحد كبير ولكنها قطعاً لم تحل المشكلة..
* و(باص الوالي) من أبرز عيوبه (بطئ وبقيف في أي حتة) ..
* ومن أبرز مميزاته (التكييف وشاشة الفيديو) ..
* طبعاً التكييف في باص الوالي إشتغل أسبوعين ووقف وكذلك الشاشة.
* غشونا بالتكييف وخلونا خسرنا علاقتنا مع ناس (الهايسات والروزات) ..
* لما شفنا التكييف في باص الوالي بقينا نشوف (الروزا) مجرد (خردة) ..
* وأول ما التكييف وقف إكتشفنا أن باص الوالي بضيع ليك نص اليوم ..
* وده بيثبت ليك إنو إحنا أصلاً كنا بنركب البص ده عشان المكيف ..
* والشعب السوداني كلو بيحب المكيف والتكييف ..
* نقطة ضعفنا في البلد دي التكييف..
* والله صحي..
* هسه لو ملاحظين .. أي مدرسة خاصة لما تعمل إعلان قبل إنطلاقة العام الدراسي بيقولوا : (أساتذة أكفاء، كما توجد لدينا فصول مكيفة) ..
* أي مدرسة خاصة عملت إعلان تجدها تركز على حكاية (الفصول المكيفة) ..
* مع إنو التكييف في الفصول يفترض يكون شئ طبيعي جداً..
* كونو يكون (الفصل) فيهو مكيف ده ما حاجة مدهشة مقارنة بالدول من حولنا ..
* شنو يعني توجد فصول مكيفة ؟؟
* المشكلة إنو في آباء وأمهات بسجلوا أولادهم في المدرسة دي عشان (الفصول المكيفة) ..
* أنا زمان كنت فاكر إنو (فصول مكيفة دي مادة في المقرر) ..
* كل ما أشوف لي إعلان بتاع مدرسة بلقاهم كاتبين (فصول مكيفة) ..
* قلت يمكن (فصول مكيفة دي مادة جديدة تبع المقرر) ..
* قلت إحتمال تكون (مادة) زيها وزي (نحن والعالم المعاصر ومسكننا) وكده يعني ..
* قلت كده ..
* وأي زول طبعاً حر في (قوالاتو) ..
* المهم ..
* من أكبر عيوب (باص الوالى) إنو ممكن يلمك بزول انت ما دايرو ..
* زحمة وشماعة ودنيا وعالمين ..
* أمبارح أنا بقرأ في جريدة (الصدى) شفت صورة محترف المريخ الغاني إنكوم ..
* وحقيقة للأمانة أنا اللاعب ده زي الشفتو قبل كده في (باص الوالى) ..
* أنا متأكد إني شفتو ..
* متأكد عديل ..
* (إنكوم وأنا) إتقابلنا قبل كده في (باص الوالى) ..
* ولو ما أخاف الكضب إتقابلنا في (باص الوالي الماشي السوق المركزي) ..
* وتقريبا هو نزل في (الصينية) ..
* لكن الزول ده ما غريب علي ..
* شفت الصورة وطوالى إتذكرتو ..
* لما شفتو في الباص كان لابس ليهو (تي شيرت أخضر وبرمودا بتاعت جينز صفراء) ..
* وكان خاتي سماعات كبيرة في أضانو ..
* ولابس شحاطة ..
* وكمان (سلسل) ..
* المهم.. شفت الصورة في الجريدة ودخلت قريت الخبر..
* ف الخبر قالوا: المريخ يخطف إنكوم من الهلال ..
* ياتو هلال يا مزمل ؟؟
* والله إلا يكون هلال أم صفقاً عراض ..
* إنكوم ده جاء الخرطوم شهر عشرة ..
* ودخل الجوهرة تابع مباريات الهلال وتمارينه ..
* تابع مباريات الهلال وأكل قصب السكر والتسالي وفول الحاجات ..
* وكان قاعد يجي الإستاد بنفس (التي شيرت) القابلتو بيهو في (باص الوالى) ..
* هو يا مزمل (التي شيرت بتاعو ده واحد وألا شنو) ؟؟
* ده لاعب عاطل ..
* وما عندو نادي ..
* وقعد في الخرطوم لافي يحضر في المباريات ويتصور سليفي ..
* بيتصور سيلفي ويشيل في الصور ويرسلها لبنات غانا ..
* البنات في غانا كل ما يدخلن (الفيسبوك) يلقن صور إنكوم من أمدرمان وتحديداً من داخل الجوهرة الزرقاء ..
* البنات طبعاً إستغربن في حكاية الشاب (أبو تي شيرت واحد ده) ..
* كرهن ليك الفيسبوك ذاتو ..
* اللاعب ده جاء (ضهب) عشان يتسجل في الهلال..
* والهلال ما إشتغل بيهو ..
* قاموا ناس المريخ شافو (حلاقة شعرو) وعجبتهم الفكرة ..
* فاوضوهو ..
* وطبعاً هو يعجبك طوالى قال ليهم عندي وكيل ..
* وكيل شنو يا ود الحلال ؟؟
* انت بتدخل الجوهرة ما معاك ولا زول ..
* إنكوم عمل ليهو وكيل بعد مفاوضة المريخ ..
* وأنا أحلف ليكم المريخ ح يكون سجل اللاعب ده بأقل من (15) ألف دولار ..
* الله أعلم يكون الزول ده كلف خزينة المريخ (200) مليون ..
* بيكون غايتو بـ(180) مليون كده ..
* وأنا والله ما في حاجة زعلتني غير إنو إعلام المريخ قال: (خطفنا الدرة الغانية من الهلال) ..
* المريخ الأيام دي والله ما يخطف (طاقية) خليك من يخطف لاعب ..
* إنتو الأيام دي بخطفوا منكم ما بتخطفوا ..
* أيام الخطف إنتهت بذهاب جمال الوالي ..
* واللاعب ده لو ما عملتو حسابكم ممكن النضال النهود يخطفو منكم ..
* عشان كده شايفكم دخلتو (الغرفة) من بدري ..
* سبحان الله.. لاعب كان بيقيف شماعة في باص الوالي وناس المريخ دخلوه غرفة التسجيلات..
* أنا خايف إنكوم ده يطلع من التمرين ويجي يتصور سليفي في الجوهرة ويرجع يتمرن تاني ..
* الزول ده أنا قلت ليكم بالجد شفتو بتصور سيلفي زي (12) مرة في مقصورة الجوهرة ..
* (12) مرة دي الأنا شفتها ..
* وما خفي أعظم ..
* وبعد ده يقول ليك: خطفنا من الهلال ..
* صااااااااااح ..
* وغايتو السنة دي بالذات يا متنا من الضحك ويا كمان الضحك كتلنا ..
* ونركب صافنات ونجيبة (جعفرية) وأصلو الزول بيموت والذكرى تفضل حية ..
* و..و..
* وبخاف أسأل عليك الناس و.. (يقولوا واقف شماعة في باص الوالي) ..

 

 

 

 

حمل تطبيق كورة سودانية لتصفح أسرع وأسهل

 

لزوارنا من السودان متجر موبايل1

            

http://www.1mobile.com/net.koorasudan.app-2451076.html

3,699 حملو التطبيق

 

لزوارنا من جميع انحاء العالم من متجر قوقل

 

https://play.google.com/store/apps/details

 

13230 حملو التطبيق

 

على متجر mobogenie

 

http://www.mobogenie.com/download-net.koorasudan.app-357365

5000+ حملوا التطبيق

 

 

 

قد يعجبك أيضا

اترك رد

لن يتم نشر عنوان بريدك الإلكتروني.

يستخدم هذا الموقع ملفات تعريف الارتباط لتحسين تجربتك. سنفترض أنك موافق على ذلك ، ولكن يمكنك إلغاء الاشتراك إذا كنت ترغب في ذلك. قبولقراءة المزيد