صحيفة كورة سودانية الإلكترونية

فزيع فزيع فزيع 

575
 في السلك
بابكر سلك
فزيع فزيع فزيع

 

 

*الوضع اصبح فظيع
*او كما يحلو لقبيلة لي اللسان فزيع
*الودع بقه فزييييع
*فزيع فزيع فزيع
*الودع تعني الوضع
*بقه(معاها فزره في الهاء)تعني بقي
*وفزيع تعني فظيع
*وسواء كان الوضع فظيع
*او
*الودع بقه فزييييع
*في الحالتين محمد احمد الضائع
*وبرغم فظاعة الوضع الجماعة البلووا السنتهم ديل  لسه مستمرين في اكل الكلام وتعطيش الحروف
*خلوا الحروف كلها تلهث من العطش ولسانها مدلدل
*واحدة من الناس ديل نطقت كلمة جبنة
*جبنة العادية دي البنفتها في الفول
*عطشت الجيم لما الجبنة نشفت
*وشربكت ليك لسانها في النون
*لما الجبنة العادية دي براها اتضفرت
*وبركة الجبنة مافيها جيمين
*لانو لو كان في الجبنة اكتر من جيم
*وصاحبتنا دي عطشتن كلهن
*اكيد الجبنة بتفقد سوائل
*وتلحق بنا نحن الشعب السوداني الذي فقد سوائل والنيل هايج وسايل والوضع فظيع
*المهم
*زي دي مع سخانة الجو والاسعار الفينا دي
*اكيد مابتقول وضع فظيع
*اكيد بتقول ودع فزيع فزيع فزيع
*نطق يحير فظاعة الوضع زاتها
*وما مشكلة
*يعني شنو مية طوبة حمراء بمليون
*ولاشى
*يعني شنو برلوم ماشي الجامعة وساكن صابرين وحايفطر طعمية محتاج مصاريف يوم خمسمائة الف جنيه
*ولا شي
*يعني شنو كيلو اللحمة ماشي علي المليون
*واحتمال بعد شوية نستأجر اللحمه نطبخ بيها ونرجعها
*وده في حد ذاتو اذا الزيت رطلو نزل من تلتمية ولقينا الغاز لانو الفحم مابقدر عليهو الا ناس ودع فزيع ديك
*ولا شي
*طالما نستمتع بحرية
*ونجوع بحرية
*ويسعر التجار بضائعهم بحرية
*ونعيش كفافا بحرية
*ونموت ونحن علي نقالة الحرية
*تبقي مافي مشكلة
*لاننا نتحمل اخفاقات حكومة اخترناها بحرية
*وفشلت في ملفات كتيرة بمنتهي الحرية
*فهي تريد ان نربي الناس علي الحرية بصرف النظر عن الحالة البطنية للناس
*وبكدة نحطم المثل القديم
*ولدك شبعو حتي تطبعو
*فشعار الحكومة التي اخترناها بحريه هو
*ولدك ماتشبعو
*وعلي الحرية طبعو
*وهي حرة طبعا
*بس ناسية اننا شعب برضك حر ويمكننا تغيير اي شئ بمنتهي الحرية
*الودع فزييييييع
*ايها الناس
*البلد دي عيبها شنو؟؟
*اسي لو وفرنا البنزين والجاز والغاز والكهربا والدقيق والعلاج والموية والوظائف
*تاني البلد دي عيبها شنو؟
*ايها الناس
*الدوري علي الابواب
*ونحن في المريخ نصنع العراقيل والمعارك
*سبحان الله
*وندعي كلنا المريخية
*اللهم انت عارف ومابوروك
*ولاخير الا فيما تختاره
*اللهم الودع في المريخ فزيييييييع
*ايها الناس
*ان تنصروا الله ينصركم
*اها
*نجي لي شمارات والي الخرتوم
*كان شفت يا والينا
*تلاتة سنين الحرب مدورة فينا
*ذكرونا الروس في افغانستان يا اخينا
*لما قنعوا شالوا عتادهم ورجعوا روسيا يا والينا
سلك كهربا
ننساك كيف والكلب قال تأبي الرماح اذا اجتمعن تكسرا يا ناس المجلس واذا افترقنا تكسرت احادا
والي لقاء
سلك
قد يعجبك أيضا
اترك رد

لن يتم نشر عنوان بريدك الإلكتروني.

يستخدم هذا الموقع ملفات تعريف الارتباط لتحسين تجربتك. سنفترض أنك موافق على ذلك ، ولكن يمكنك إلغاء الاشتراك إذا كنت ترغب في ذلك. قبولقراءة المزيد