فلانابي وعلانابي 

0
163

في السلك 

بابكر سلك

فلانابي وعلانابي 

*ياقوم

*الانتماء للكيانات هو موقف واختيار

*نحترم الانتماءات المختلفة

*لاننا نؤمن بالرأي الآخر

*والتعصب في ممارسة الانتماء يكون محمودا ومرغوبا فيه اذا كان تعصبا ايجابيا

*لان في التعصب الايجابي حرب علي التعصب السلبي

*ولان التعصب الايجابي هو حب واخلاص ووفاء

*وفي كل الأحوال يكون الكيان المنتمي اليه هو المبجل والمقدس والقيمة العليا

*ولكن

*في مجال الرياضة ظهرت بعض العيوب التي شكلت تشوهات  للانتماء

*لانها اما بجلت اشخاص اكثر من الكيان نفسه

*او حاربت شخوص دون الاخذ في الاعتبار مضار تلك الحرب علي الكيان وعلي تفويت فرصة استفادة الكيان من تلك الجهود المحاربة لشئ في نفس يعقوب وخلل في ترتيب القدسية

*مثلا

*في النادي تلقي زول مريخابي

*تلقي الزول ده بحب فلان اكتر من الكيان زاتو

*ويكره من سواه وهو علان

*زي ده بكون علانابي اكثر من كونه مريخابي

*ويحب الخير للمريخ في عهد فلان

*ولايتخيل الكيان الا في وجود فلان

*لذا لايقبل علان ولا المريخ في عهد علان اطلاقا

*وكذلك الحال

*العلانابي يكره فلان حد التحريم

*كره يقلص مساحات حب الكيان في قلبه ليتمدد فيها كره فلان

*هذا بالطبع لايحب الخير للمريخ الا في عهد علان وبس

*الاول نطلق عليه فلانابي المريخابي

*لان محبة فلان عنده مقدمة علي محبة الكيان

*والتاني نطلق عليه علانابي المريخابي

*لان كره فلان عنده يسيطر علي كل قلبه ولا يترك مساحة لحب المريخ

*لذا الدعوة مقدمة للفلانابي والعلانابي لخلع ثوبيهما وارتداء ثوب المريخ الانيق ليستمتعا بوصف مريخابي

*وهنا اسال صديقي الكارديلانابي

*كردنة جا؟؟؟

*طيب ليه؟؟؟

*بالتأكيد رد الكاردينالابي سيختلف عن رد الاربابابي الذي يختلف بدورة مع رد البريرابي

*والقول بالتأكيد عند الهلالابي

*فهل تبقي بمساطب الهلال من يستحق ان نصفه بالهلالابي

*ام انقسمت الناس بين كاردينالابي واربابابي وبريرابي؟؟؟؟

*دائما الانتماء للاشخاص يضعف الانتماء للكيان

*القصة دي زي قصة الاحزاب زمان

* فالناس لاتعنيهم مصلحة الوطن الا اذا كانت عن طريق حزبهم

*وبالتأكيد يكيدون لافشال صالح الوطن اذا كان مدخله حزب آخر

*لذا خسر الوطن كثيرا وطويلا ووصل كيلو الطماطم في ارض الطمي ميتين وخمسين الف جنيه

*والسعيد بشوف في غيرو

*فكونا من الولاءات للاشخاص

*واجعلوا الانتماء المطلق حقا مقدسا للكيان الذي يعلو ولايعلي عليه

*مع الاحتفاظ بكل جمايل الاشخاص من خلال ماقدموه لانديتهم

*لان الاعتراف بجميل من قدم لاكيان هو في حد ذاته سلوك يبين عمق الانتماء لنفس الكيان

*المهم

*مريخاب الدمازين لاننكر لهم موكبهم الرهيب لاستقبال الزعيم عندما انسحب الهلال من لقاءنا الذي كان مقررا له ان يقام الدمازين

*شفوت الدمازين حمر لمن غلط

*مريخاب لي بهناك

*لكن

*هل ستصبح حناجرهم سقوفات للملاعب من الامطار والدنيا خريف؟؟؟

*هل تتوفر صالات اعداد البدن تحت راياتهم الحمراء؟؟؟

*هل سيشعلون انفاسهم مبيدات لحشرات الخريف؟؟

*نشكر السيد الوالي علي كرمه

*ونشكر جماهير الدمازين علي ترحابهم

*ونشكر اسد علي

*اقصد علي اسد

*ولكن الرأي عندنا ان المكان غير مناسب اقل شئ للزمان

*الدنيا خريف ياناس

*المهم

*يعني نفهم اسي انو الاستئنافات قالت للانضباط الغي العقوبة واستدعي بكري وجيبيهو لي حي؟؟؟

*وهل إدانة بكري كانت استنادا علي تقرير الحكم ام علي تقرير المراقب ام علي تقرير المصير؟؟؟

*غايتو لو علي تقرير الحكم

*بكري ده الا يكون بعد رجع البيت رسل للحكم ده في الواتساب

*اما اذا علي تقرير المراقب

*الزول ده راجعوا نظرو

*ولكني

*ماداير اصدق انو لجان الاتحاد دي فيها الفلانابي والعلانابي

*وحقو الفلاناب ديل مايخافوا من فلان

*فلان ده تاني مابجي

*ولا شنو ياروشا؟؟؟

*ايها الناس

*هدية الفنان النصري سيدا للمريخ

*كانت لاعب حريف وقع علي كشوفات الاشبال وسط ايقاعات الدليب ورنة الطمبور

*شكرا يانصري

*شكرا ياسيدا

*شكرا ياشفت الشمال

*ايها الناس

*ان تنصروا الله ينصركم

*اها

*نجي لي شمارات والي الخرتوم

*والينا

*لو دايرين ننوم يقولوا السعودية

*لو دايرين نقوم يقولوا قطر الفتية

*ولو دايرين نفكر يقولوا الامارات العربية

*الناس دي ماعارفة نحنا السودان دولة قدييييمة

*كنا الراعي لما الناس كانت رعية؟؟؟

*كلمهم ياوالينا

* نحنا دولة قديييييمة ديمقراطية مابتحتاج زول يفكر ليها

سلك كهربا

ننساك كيف والكلب قال ومابتسمح لزول يتدخل فيها…وكشر وزمجر ومشي علي العمود

والي لقاء

سلك

المشاركة

أكتب رد

أدخل تعليقك من فضلك!
أدخل إسمك هنا من فضلك