صحيفة كورة سودانية الإلكترونية

فيهو قائم

1

 في السلك

بابكر سلك
فيهو قائم

*كلنا سمع ببيان رابطة قطر العملاقة حول مفاوضات اعادة قيد ميدو الحبيب
*وبالرجوع للبيان نجد ان ميدو وحسب ما جاء فيه قد رفض عرض المية وخمسين الف دولار لاعادة قيدة تلاته سنين بدون الرواتب والحوافز
*ومرد ذلك حسب البيان تفضيل ميدو للاحتراف الخارجي
*وهذه خطوة نؤيده عليها لانها تفتح بابا للاعبي الداخل لولوج السوق الدولي
*اما اذا كان السبب هو فتح باب للمزايدة
*فانا نقول لميدو المية وخمسين زاتها كتيرة
*يعني لو اديناك المية وخمسين الف دولار ندي العقرب ستمية وخمسين الف دولار؟
*ورمضان نديهو كم؟
*قياسا بعدد الخانات التي يجيدها نفروض نديهو بالميت خمسمية الف دولار
*لذا ياميدو قشة ماتعتر ليك
*وسنحتفل بك عند الوداع ونكرمك علي الفترة الزاهية التي قضيتها بيننا في رحاب المريخ الذي جعل منك نجما يفاوض بالدولار
*ولن ننسي لك اهدافك في الهلال
*ولا اهدافك في البطولة العربية
*بالذات الهدف الذي ابدع العقرب في تمريرته لك من دائرة السنتر
*ولن يقلل من احتفالنا بك صيامك عن التهديف في اول مواسمك معنا
*تتذكر اول قون جبتو في اهلي عطبرة بعطبرة فرحت كيف؟
*وقتها صبرنا علي صيامك طويلا لاننا نادي تربوي
*ولايقلل من انجازك اهدارك لركلة الجزاء امام هلال الابيض التي كانت لها قصة
*ايها الناس
*مية وخمسين الف دولار مقدم عقد لتلاتة سنين كتيرة جدا ولو كان ذلك اللاعب هو كمال عبدالوهاب ذات نفسو
*مع خالص امنياتنا للغربال بتحقيق النجاحات في المرحلة القادمة مع النادي الذي يوقع له سواء كان داخليا او خارجيا
*اما المريخ فكلامو واضح
*يفتح الله
*ولو نزل السعر هناك شرط
*التقرير العلاجي والكشف الطبي قبل التنفيذ
*يعني حسب كلام السماسرة التفتيش قبل التوثيق
*قد لاتعجب الحالة الراهنة المشتري
*فالعيب في القائم بقوم البيعة
*ولا شنو؟؟؟؟
*المهم
*نتمني لميدو التوفيق في مشواره الجديد
*ونذكره
*انت غايب من بداية الدوري ونحنا متصدرين يا حبيب
*متصدرين بدون مهاجمين كمان
*المهم
*نجي لي مشكلة المواصلات
*مجرد التنظيم والرقابة بحل الاشكالية
*كلو عربية تلتزم بخطها
*الهايسات الملاكي الراغبات في نقل المواطنين يطلعن تصديق بخط معين
*وكل العربات الشغالة في نقل المواطنين يلزموهن بعدد من الرحلات معين
*تبدأ الرحلة من اول محطة وتنتهي في آخر محطة
*عشان نلغي حكاية حافلات الحاج يوسف البتشحن لي كوكو لتشحن من كوكو للحاج يوسف
*جشع يولد معاناة جديدة للمواطن
*تقوم من ليبيا بتوقيع وزمن
*يتم اعتماد الرحلة ليك في الحاج يوسف بزمن وتوقيع
*تكمل فردك تاخد تذكرتك وتتوجه للمحطة المعينة تشيل جازك
*ابيت الكلام ده بي جازك يا حبيب
*كدة بنضمن انو الجاز المدعوم حق المواطن استفاد منو المواطن
*وبنقدر نلزم الحافلة بالرحلة والتعريفة
*وبنقدر نكمل عربات الخطوط الفيها كثافة
*وبنعمل نواه لدعم عربات نقل المواطنين بزيت مدعوم ولساتك مدعومات وفي المستقبل قطع غيار معفية من الجمارك
*وكلو لاجل المواطن
*ايها الناس
*ان تنصروا الله ينصركم
*اها
*نجي لي شمارات والي الخرتوم
*كان شفت يا والينا
*انا مصر جدا
*اني اري شجرا متحرك علينا
سلك كهربا
ننساك كيف والكلب قال انتوا المحليات مشن وين؟؟شجرة هوزز ولا شنو؟؟
والي لقاء
سلك

قد يعجبك أيضا

اترك رد

لن يتم نشر عنوان بريدك الإلكتروني.

يستخدم هذا الموقع ملفات تعريف الارتباط لتحسين تجربتك. سنفترض أنك موافق على ذلك ، ولكن يمكنك إلغاء الاشتراك إذا كنت ترغب في ذلك. قبولقراءة المزيد