في ملعبنا انتصرنا (5) في كوبر (7) في الجبل الفرق بقى (6) نقاط

صابنها
محمد عبد الماجد
في ملعبنا انتصرنا (5) في كوبر (7) في الجبل الفرق بقى (6) نقاط

· لعب الهلال في (الجوهرة الزرقاء) امام الشرطة القضارف (الفريق المحترم) ، فاز الهلال بالخمسة.
· ناس (متعصب) عبدالسلام اتململوا – قالوا الهلال لازم يطلع يلعب خارج ملعبه – عشان بالطريقة دي (الجاكومي) بروح فيها.
· ركبوا ليه (درب) وعملوا ليه موجات صوتية (مسربة).
· وطلّعوا ليه الهلال من ملعبه.
· هو سوداكال خلى حاجة في (الجاكومي)؟
· الما بشتري يتفرج.
· لعب الهلال في ملعب (كوبر) عصرا – فاز الهلال على فريق الامل عطبرة (الفريق العريق) 7 / صفر.
· ناس معتز (الشاغر) ما عرفوا يتصرفوا كيف؟
· اضايروا متل (الملايات) الجديدة في البرد.
· قالوا الهلال يلعب برة استاده. لعب خارج استاده غلب سبعة.
· قالوا يلعب عصر – لعب عصر ..قدم اجمل مباراة.
· معتصم جعفر وأسامة عطا المنان شلة (ويبقى لحين السداد).. قالوا ما في طريقة .. ناس صلاح نمر ومصطفى كرشوم وبخيت خميس ما بنستروا … المريخ لازم يلعب بي (متعصب) عبدالسلام ومعتز (الشاغر) ومحمد حلفا.
· الهلال يلعب في جبل اولياء.
· ما في حل.
· إلّا يلعب في جبل اولياء.
· بس كدا.
· في مطر.
· في تروس.
· ما مشكلة.
· جبل اولياء مالها ؟ قالوا ليكم نحن بنرفض الجبل.
جبل اولي الحبيب يغشى
وحصل فى القطينه عشا
دمعى اللى الثياب بلا
· والله لو برمجتوا لينا الدوري الممتاز على اغنية (من الاسكلا وحلا) ما عندنا مشكلة.
· بنلعب ولو في الصين.
· بنغلب ولو في زحل.
· شفتوا يا طارق عطا المنان لو جدول الدوري الممتاز عملتوه على اغينة (من الاسكلا و حلا) ما عندنا مشكلة.
· كل اسبوع في مدينة.
قلبى السابها واختلا
من بدرى التمام هلا
دمعى اللى الثياب بلا
…
صفر ودع البابور
حاجزين قمره اتنين دور
دمعى اللى الثياب بلا
…
البابور مر بى المجرور
شال ظبيا سكونو تلول
دمعى اللى الثياب بلا
…
جبل اولي الحبيب يغشا
وحصل فى القطينه عشا
دمعى اللى الثياب بلا
…
راح قبلى الطفشا وفشا
الماليتو يلقى فشا
دمعى اللى الثياب بلا
…
حيى بى الصقر خوه
بى البدرى الدويم طوه
دمعى اللى الثياب بلا
· في استاد الهلال غلبنا خمسة.
· في ملعب كوبر غلبنا سبعة.
· في جبل اولياء عملنا شنو؟
· في الجبل الفرق بقى (6) نقاط.
· تبارك الله .. فضله علينا كتير.
· يعني انتقلنا من مربع (الاهداف) الى مربع (النقاط).
· الهلال اصلا كل ما يضعوا (العراقيل) في طريقو بكون اخطر.
· انتوا عارفين الهلال عندما كان الدكتور كمال شداد رئيسا للاتحاد فقد الازرق الدوري ثلاث مرات على التوالي.
· لم يحقق الهلال الدوري في فترة شداد إلّا مرة واحدة وناس مزمل ابوالقاسم شغالين (كورال دار فلاح) هجوم في الدكتور.
· منذ ان جاء معتصم جعفر ومجموعته وحاربوا الهلال… الهلال فاز بالدوري في الموسم الماضي ويتصدر الآن بفارق (6) نقاط.
· دي ناس (متعصب) عبدالسلام و معتز (الشاغر) ومحمد حلفا … ما بقدروا عليها.
· الناس ديل حدهم (الجبل).
· وفهمهم ما اكتر من زيادة الزيت في الفول.
· بالكتير كدا بعملوا ليه (جبنة).
· تتخيلوا الهلال ترك ملعبه للمنتخب .. وحوّل تمارينه خارج ملعبه .. عشان المنتخب يلعب في استاد الهلال ويغلب الكونغو الديمقراطية بالغربال ووليد الشعلة.
· جزاء ذلك كان شنو من اتحاد (السجم والرماد)؟
· جزاء ذلك تم نقل مباريات الهلال من ملعبه.
· والله اصلو ما عندنا مشكلة .. انتوا كدا ضاعفتوا من كمية التحدي عند لاعبين الهلال .. شعروا بالاستهداف والاستفزاز .. والهلال وقت تستفزو حاجة ، ما في شيء بتقيف قدامو.
· ببقى اخطر من الريال.
· الاتحاد العام حفّز الهلال وحرّضه من اجل ان يفوز ببطولة هذا الموسم ان شاءالله.
· بطولة لعب المريخ فيها بـ (41) لاعبا في الدورة الاولى ويتحدث اهلها عن عدالة المنافسة وتكافؤ الفرص.
· بطولة ابعد فيها الهلال من ملعبه .. يبقى الفوز بها جميل وله طعم مختلف.
· هذه البطولة بالذات تهمنا وتعنينا اكثر من غيرها.
· بطولة للتحدى.
· بطولة الخصم فيها ليس المريخ وحده .. الخصم هو الاتحاد العام وكتلة الدوري الممتاز ومجلس السيادة.
· كلهم مع بعض.
· عندما كان صلاح ادريس رئيسا للهلال فقد الهلال الكثير بسبب استجابة صلاح ادريس لاستفزاز الاتحاد العام .. وكذلك خسر الهلال كثيرا في فترة الكاردينال بسبب انفعال المجلس ورده على الاستهداف الذي يتعرض له الهلال من الاتحاد.
· الهلال فقد في عهد الكاردينال ثلاث بطولات بسبب انفعالات الكاردينال .. مرة ننسحب .. ومرة نرفض ندفع الغرامة .. ومرة نرفض نعمل استئناف.
· الآن مجلس الهلال بقيادة السوباط اهم ما يميزه هو عدم استجابته لاستفزازات الخصوم .. وتحريضات مواقع التواصل الاجتماعي.
· ولا شغالين بالجاكومي واتحاد (السجم والرماد).
· شغالين في شغلهم.
· حرمونا من ملعبنا الرئيسي … مشوا يجهزوا في الملعب الرديف.
· الحمدلله على نعمة الهلال.
· تعاملوا مع الاستهداف بذكاء وبرود وهدوء لذلك اضاعوا الفرصة على معتز (الشاغر) و (متعصب) عبدالسلام ومحمد حلفا والجاكومي الذي قصد ان يستفز الهلال ويخرجه من طوره ليحققوا مآربهم بتلك السبل غير المشروعة وغير الشريفة التى اعتادوا عليها.
· محمد حلفا اصبروا بشوف ليه ليكم اسم قريب.
· والله البستهدف الهلال ما بتقوم ليه قايمة.
· وقع وما سمى.
· كان (المشاكل) والحفر والتواطؤ بعمل حاجة كان المريخ صعد مع الاهلي من مرحلة المجموعات.
· نحن اصلو ما عندنا مشكلة.
· مستعدين نلعب في أي حتة.
· ما عاوزين زول يشكك في بطولات الهلال .. قالوا اذا لعب الهلال في استاده بكون ما في تكافؤ فرص .. نلعب برة.
· ان شاءالله في خور ابوعنجة.
· اللعب خارج استاد الهلال يمنحنا دافع اقوى وحافز اكبر.
· سعداء بالانتصارات التى تحقق خارج ملعب الهلال.
· على استعداد ان نعيش المعاناة وان نحقق البطولة رغم الاستهداف.
· الهلال حقق سلسلة انتصارات متوالية في الدورة الاولى وهو يتجول بين جبل اولياء وعطبرة والابيض وبورتسودان.
· ما في مشكلة.
· والآن الهلال على استعداد ان يكرر ذلك في ملاعب ولاية الخرطوم عدا ملعب الهلال.
· كل ملاعب ولاية الخرطوم يلعب فيها الهلال إلّا ملعب الهلال ، الملعب الوحيد الجاهز والمجاز من الكاف والفيفا في السودان.
· شفتوا الاستهداف وصل لغاية وين؟
· الملاعب التى لم يتم اجازتها من قبل الاتحاد الافريقي نلعب فيها .. والملعب الوحيد المجاز ما نلعب فيه.
· والله دي يا طارق عطا (المريخ) ومعتز (الشاغر) و(متصعب) عبدالسلام ومحمد حلفا المجلس العسكري الذي ارتكب مجزرة فض الاعتصام ما سبقكم عليها.
· محمد حلفا قلت ليكم اصبروا بنشوف ليه اسم مع (الجوقة) دي.
· الهلال امس بحمد الله وفضله في جبل اولياء حقق انتصار على فريق الاهلي الخرطوم الفريق الذي يعتبر هو الاقوى في الساحة الرياضية الآن.
· حققنا انتصار على فريق يتكون من لاعبين يمتلكون دوافع خاصة للعب امام الهلال بكل هذه القوة.
· فريق يلعب له احمد عبدالعظيم وتمبش وسمؤال ونزار حامد ومهند الطاهر وخالد النعسان وعوض زايد نجم المنتخب الوطني .. الانتصار عليه يعني الكثير.
· اتحاد كرة القدم او لجنة الاستئنافات تحديدا جاءت ببدعة غريبة .. وذلك عندما قررت اعادة مباراة الهلال والأهلي الخرطوم.
· كان يجب ان يمنح الهلال نقاط المباراة طالما وقع الاهلي في المخالفة او حتى شارك فيها.
· هذه الاعادة كان يمكن ان تكون في صالح الاهلي اكثر من الهلال. وهذا شيء ضد مبدأ العدالة.
· الفريق الذي تضرر واشتكى وكسب الشكوى كان يمكن ان يفقد (النقطة) التى خرج بها من المباراة التى وقع فيه الاهلي الخرطوم في المخالفة.
· وكان يمكن ان يكافأ الاهلي الخرطوم وهو الذي وقع المخالفة بان يكسب النقاط الثلاث في المباراة المعادة بدلا من نقطة واحدة.
· هذا امر غريب لا يحدث إلّا في السودان… لو انتصر الاهلي على الهلال وهو يلعب بتلك التشكيلة المدججة بالنجوم والخبرات كيف كان سوف يكون الموقف؟
· تخيلوا الفريق المخالف يكسب النقاط الثلاث .. والفريق الذي تضرر من هذه المخالفة يخسر حتى النقطة التى كان قد خرج بها في المباراة التى تجاوز فيها الاهلي الخرطوم اللوائح والقوانين.
· هناك امور لا نكتب عنها في وقتها حتى لا نصدر (طاقة سلبية) للآخرين .. امور نحاول ان نظهرها على انها مكسب للهلال او نسكت عنها حتى لا نعطي الخصم الدافع الاكبر.
· الكتابة في هذا الامر قبل المباراة كان سوف يجعل الاهلي الخرطوم في موقف اقوى من موقف الهلال الذي كسب الشكوى.
· سكتنا …ليشعر الاهلة انهم حققوا الكثير من خلال اعادة المباراة وهم في حقيقة الامر تضرروا منها.
· لا يعقل ان تساوي بين المخالف وبين الذي تضرر من المخالفة وتعيد المباراة.
· لو كان الهلال خسر المباراة الاولى كان يمكن لنا ان نقبل الامر.
· لو ان قرار الاعادة صدر من اتحاد الكرة دون ان يقوم الهلال برفع شكوى ودفع الرسوم وإتباع كل الاجراءات الصحيحة لكسب الشكوى .. كان يمكن ان نجد المبرر والمنطق.
· هذا الاتحاد محشو بالكوارث في كل اللجان وهو مكب حقيقي للنفايات والفساد.
· سوف ينتصر الهلال ان شاءالله على هذا الاتحاد من غير (عنتريات).. بالمنطق والقانون فهذا الاتحاد يحمل عناصر زواله في لجانه التى يسيطر عليها المريخاب.
· …..
متاريس
· شكرا لفريق الاهلي الخرطوم – قدم مباراة كبيرة امام الهلال.
· الكورة كانت حلوة.
· مطلوب من الهلال ان يركز فقط في الملعب.
· حتى لو كان ذلك الملعب في خور ابوعنجة.
· لا تستجيبوا للاستفزازات.
· الرد قادم.
· الآن الهلال معني بتحقيق بطولة الدوري الممتاز مع كل الصعوبات التى تضع امامه.
· اللعب بعيد عن استاد الهلال يعطي الهلال الدافع والحماس والقوة.
· ما عندنا مشكلة.
· كله خير.
· عندكم تسجيلات وملعب رديف وإضاءة وانتخابات ما فاضين للحاجات دي.
· ….
· ترس اخير : انتوا ناس المريخ زي ناس عصام الحاج ديل بجيبوهم من وين؟