لسه ببرد الشاي بـ(كبايتين)!!

0
125

بالعربي الكسيح
محمد الطيب الأمين
لسه ببرد الشاي بـ(كبايتين)!!

 

* من لطائف (البكش وطق الحنك)، قالوا واحد عمرو (16) سنة،، ممتحن الشهادة السودانية بتكلم مع (بت) بالليل قال ليها أنا عشانك بمشي في الجمر ..
* نظام البت حبيبتو وكده ..
* ونظام الولد عنتر وكده ..
* قال بمشي في الجمر عشانها ..
* والبت صدقت وشغالة تتبسم ..
* قالت ليهو (تسلم لي من الجمر يا حبيبي).
* قاليها بمشي علي الجمر ولما الواطة أصبحت جاب (كبايتين) عشان (يبرد الشاي) ..
* كباية فيها الشاي وكباية فاضية عشان يحول الشاي من الكباية دي للكباية ديك طمعا في تبريد الشاي ..
* ده حالتو قال بمشي علي الجمر ..
* الصبي ده بيذكرني بناس المريخ ..
* ناس المريخ السنة كلها بتكلموا عن المنتخب، وعن مجاملة الاتحاد للهلال ..
* قالوا الاتحاد بجامل الهلال وبيختار لاعبين لا يشاركون حتى مع فريق الهلال ..
* وضربوا مثل باللاعب الشاب ولاء الدين ..
* سنة كاملة هم بيستنكروا اختيار ولاء الدين الذي لا يشارك مع فريقه على حد قولهم ..
* الآن لما (الواطة أصبحت) واختارت لجنة المنتخبات عدداً من لاعبي المريخ الجرسة دورت ..
* شغالين يجعجعوا ولما الواطة صبحت جابوا (كبايتين وقعدوا يبردوا في الشاي) ..
* جرسة شديدة ..
* ظروفنا العربية ..
* عندنا معسكر ..
* أمير كمال مصاب ..
* رمضان عجب عيان ..
* مباراة النجم قربت ..
* جرسة عجيبة ..
* يا جماعة ده المنتخب ..
* ده المنتخب الاستنكرتوا إنو ولاء الدين يلعب فيهو ..
* ده المنتخب البمثل البلد يا جماعة ..
* عشان حركاتكم دي شداد حرم بكري المدينة من اللعب للمنتخبات الوطنية مدى الحياة ..
* بكري لما كان معانا بيمشي معسكر المنتخب أول زول ..
* لكن خربتو طبعو ..
* المهم ..
* الليلة يوم الفرح بالنجم الكبير أبوعاقلة ..
* قلنا إن فرحة تأهل الهلال سنتعامل معها بالأقساط المريحة ..
* خصصنا يوماً للفرح بالتأهل، ويوم للفرح بالرباعية، ويوم للفرح بالعرض القوي.
* واليوم نفرح بالنجم أبوعاقلة.
* أبوعاقلة أحد أبرز نجوم اللقاء، لعب واحدة من أهم وأجمل مبارياته مع الهلال.
* وكان أكثر اللاعبين انضباطاً.
* قام بواجبه الدفاعي على الوجه الأكمل وسند الهجوم على أفضل ما يكون.
* خرب وخربش هجمات الخصم وكان حاضراً بقوة في الاحتكاك والافتكاك ..
* تعامل أبوعاقلة بحسم وصرامة مع مفاتيح اللعب الزامبية ..
* هو الجندي المجهول في اللقاء الأخير ..
* نهني أبوعاقلة على هذا الأداء الراقي ونتمنى أن يواصل بذات القوة والتألق ..
* توهج الشعلة وهدف أمبومبو سحبا البساط من تفرد أبوعاقلة ولكن الحقوق محفوظة.
* البتاكلوا ينفعك يا أبوعاقلة ..
* اليوم القرعة ..
* ونحن تحت تحت نتمنى مقابلة قورماهيا الكيني ولكن في كل الأحوال جاهزين بإذن الله ..
* لو جانا النجم بنقول ليهو (نحن الهلال) ..
* لو جانا بطل المغرب بنقول ليهو (نحن الهلال) ..
* ولو جانا قورماهيا بنقول ليهو (نحن الهلال) ..
* نحن الهلال مليانين ثقة وطموح ..
* مليانين تحدٍ وقوة ..
* بنخوِّف ولا نخاف ..
* بره عندنا كلام وجوه إستادنا ما في كلام ..
* حقو شعار الهلال في دور الثمانية يكون (بره عندنا كلام وفي الجوهرة ما في كلام) ..
* نزار رجع ..
* والثعلب رجع ..
* وموفق رجع ..
* سيكتمل الهلال والهلال في ليلة تمامه حاجة تانية ..
* وعلى فكرة .. نحن بنقاتل عشان نحافظ على مقاعد السودان الأربعة في بطولات الكاف .
* كل الأندية السودانية (وقعت من البلكونة) ومن التمهيدي ..
* وقدر الهلال أن يداري خيبات الغير ..
* المريخ طار من التمهيدي والسنة دي ح يكون وصيف ومع ذلك سيشارك في الأبطال الموسم القادم بفضل الهلال ..
* بختكم والله، قاعدين في صمة خشمكم وتشاركوا في الأبطال.
* لقيتوها والله.
* اللقيتوها أنتو بفضل الهلال، الفرق في نيجيريا والكاميرون ما لقتها.
* والله صحي ..
* عشان كده أنا اتوقعت ناس المريخ يفرحوا بتأهل الهلال ..
* اتوقعت كده ..
* وطبعاً أي زول حر في (توقعاتو) ..
* ده واجبنا ..
* وقدركم إنكم تكونوا (صحبة راكب) ..
* صحبة راكب ..
* زي الزول لما في زحمة المواصلات يلقي حافلة ويركب ويحجز لصاحبو ..
* وفي نوع بحجز بالشباك ..
* قبل فترة معانا واحد حجز في الحافلة بـ(كيس الموز) ..
* بالشباك وضع كيس الموز في المقعد ومشى يركب بالباب ..
* لما جا داخل لقى المقعد وما لقى الموز ..
* حاجة حارة ..
* هسه المريخ بيركب حافلة الأبطال بالحجز ..
* الهلال بحجز ليهم، لكن هم لما يجوا بيلقوا الموز وما بلقوا المقعد.
* وموز موز حياة حياة ..
* وتبكوا بس .. عين قطرة وعين مس ..
* ونركب صافنات ونجيبه (شايقية) وأصلو الزول بيموت والذكرى تفضل حية ..
* وإذا الخاطر سرح عنك تأكد إنو ……..(مشغول بهدف أمبومبو) .

المشاركة

أكتب رد

أدخل تعليقك من فضلك!
أدخل إسمك هنا من فضلك