صحيفة كورة سودانية الإلكترونية

مابين الدوشة والدوشكا عاش شعب 

2

 في السلك

بابكر سلك

مابين الدوشة والدوشكا عاش شعب

*بالترحم علي ابنائنا شهداء الابيض

*نكون قد حطمنا الرقم القياسي للجزائر

*واستحقينا لقب بلد المليون شهيد

*الفرق بين شهدائنا وشهداء الجزائر

*انو شهدائنا فيهم الطالب والاستاذ والمدرسة والكراس

*فيهم الكبير والطفل الصغير

*فيهم الولد والبنت في بلد البنت والولد

*فيهم الراجل والمرا

*فيهم الطبيب والصيدلي والموظف والخريج والضابط(؟)

*فيهم كفاءات

*اشراف اقتنعوا بالوطن فقدموا ارواحهم وقودا لاعظم ثورة شهدها التاريخ الحديث لدول العالم اجمع

*شباب لايهوي الظهور خلف المايكات ولاعلي شاشات الفضائيات ولكنه يتسابق نحو منظار القناصة ليحتضن  الرصاصة بصدور يملؤها حب الوطن

*فنال الشباب الوسام وارتقي بارواحه الطاهره الي سماء فيها رب عادل يعرف كيف يقتص ممن قنص

*يعرف كل المتهمين المجرمين فردا فردا ولاينتظر تحقيقا من لجنة او نائب عام او نائب نام او نائب عمل نايم

*حقهم عند حكم عدل اقسم بعزته وجلاله ان لايظلم عبدا لعبد

*ايها الناس

*يقال ان الله عز وجل قد أخر عذاب فرعون حتي بعد رحيل والدته

*احتراما وتقديرا لبر الفرعون بوالدته

*وبعد رحيلها شق عليه البحر هو واتباعه والمنافقين اصحاب المصالح الشخصية في التبعية

*وهاهي ام الفساد والاستبداد قد ماتت في حداشر ابريل

*لذا اتوقع في اي لحظة بعد ده انشقاق للبحر واليابسة يبتلع فراعنة الفساد والاستبداد و التاتشرات

*المهم

*هذا الشعب الوفي عاش مراحل غريبة

*كان في الماضي لاتصيبه الا الدوشة

*والآن تصيبه الدوشكا

*انها تصاريف زمان ونتاج هوان ثمنه كان السكوت تلتين سنة

*تلتين سنة ما اجتمع فيها الشعب الا علي السكوت

*فكانت فرية الاجماع السكوتي

*يبقي طبيعي تتغير الدوشة لتصبح دوشكا

*دوشكا تقضي علي الشباب والأطفال والاخضر واليابس وتقضي علي الاحلام والطموح

*ولكن

*الله يقضي بيننا وهو الحكم العدل ذو العرش المتين

*وهل انطلقت الرصاصات القاتلة من دوشكا حقا ؟؟؟؟

*المهم

*مابين الدوشه والدوشكا عاش اعظم شعب وظهر اعظم جيل

*ماعلينا

*ايام معدودات تفصلنا عن موقعة الجزائر

*ونحن نتفاجأ بخبر مفاده ان عاطف خالد كان معار وانتهت الاعارة

*في هذه الحالة يعتبر آخر لاعب تم تسجيله خارج الكشف

*وآخر لاعب هو سخانه ياغانا

*لو صدق هذا الخبر

*علمية شنو يا اسد ومنهجية شنو ياشمس الدين وطموح منو ياقريش ودولاب عمل شنو يامدثر خيري

*لو صح هذا الخبر ليس امامنا سوي التأكد من سدادنا لرسم النفايات

*عشان يجوا يلموا المجلس والمكتب التنفيذي

*وقبل ذلك عليكم الاعتراف بانو مجلسكم ده بوكلنو جواهو

*دي عملية جرسون في مطعم مابعملها

*لانو الجرسون لو طلبت منو فاصوليا

*وبعد شوية قلت ليهو خلي الفاصوليا وجيب بطاطس

*ماممكن بعد يجيب البطاطس يرجع ويجيب الفاصوليا ويحاسبك بالاتنين

*عشان كده اذا صح هذا الخبر اعملوا فاصوليا يا اسد وقدموا استقالاتكم سريع

*واذا ماصح هذا الخبر

*هناك ايضا كارثة الاعداد والاستعداد والجاهزية النفسية والجماهيرية

*وده كلو مافي

*ده صفر كبير زي صفر ناس روشا ده

*الموسم الفات مباراة زائد ودعومات الاقطاب ومبادراتهم المختلفة اخرجتنا من حرجنا ومشت الحال

*السنة دي لازايد لاناقص لا مبادرات ولا توقيع اتفاق للحكم المدني

*السنة دي يمكن نمشي الجزائر بالمواصلات

*عاد من وين؟؟؟

*وممكن نمشي المغرب بترحال

*ولو بتاع ترحال عرف الطالب المشوار مجلس المريخ

*بقفل النت وبتخارج

*السنة دي ماعندنا غير نمشطها بي قملها

*والتبقي تبقي

*ايها الناس

*ان تنصروا الله ينصركم

*اها

*نجي لي شمارات والي الخرتوم

*كان شفت يا والينا

*لاقني بنات اساس

*ماشات حلاتن علي بيوتن

*حلات الغبار فوق شعيراتن

*كانن بلعبن اثناء مشيهن

*ساوات عازه واحده فيهن

*يقولن ليها

*عازه يا عازه مالك بتبكي عاوزه ايه

*تقول ليهن

*دايره حكومة تكون مهمومة بهم الناس

*تجيب الموية تجيب الكهربا والكراس

*وعازه ياعازه مالك بتبكي عاوزه ايه

*دايره وزير لاسراق لانقناق لا افاق

*هنا كلهن بي عازتن صدحن

*مدنياااااااااو

*زي ديل بدرسن ويكبرن يحققن حلمهن

*ولا بتقنصن يا والينا ومايتعرف منو القنصهن؟؟؟؟

سلك كهربا

ننساك كيف والكلب قال عجبتني لعبة عازة…..وردد ودايره جيش جيش زي الجيش جيش زي الديش الديش اب شاويش شاويشا بي شنبات….وقام جاري

والي لقاء

سلك

قد يعجبك أيضا

اترك رد

لن يتم نشر عنوان بريدك الإلكتروني.

يستخدم هذا الموقع ملفات تعريف الارتباط لتحسين تجربتك. سنفترض أنك موافق على ذلك ، ولكن يمكنك إلغاء الاشتراك إذا كنت ترغب في ذلك. قبولقراءة المزيد