مابين امطار السودان ومريخ امدرمان وتكرار الاخطاء سنويا

تغريدة واتساب

بقلم معاذ ابومؤيد
مابين امطار السودان
ومريخ امدرمان
وتكرار الاخطاء سنويا

امطار تجتاح الخرطوم وحتى كتابة التغريدة مازال انهمار الامطار،،،
ربنا يجعلها امطار خير وبركة
وربنا يلطف بعبادة وربنا يفرجها علي جميع الاسر السودانية ويخفف الضرر ،،،،،
نفس الاخطاء في التصريف
ونفس السيناريو مكرر كل عام
والمتضرر المواطن
الا نستفيد من تجاربنا
ولا مستمتعين باخطاءنا
المدارس تفتح في الخريف؟؟؟
والولاية تغرق في الخريف؟؟؟
والمواطن يعاني في الخريف؟؟؟
نفس الخور الفاض وامتلا السنة الماضية فاض وامتلأ وفاض تاني وامتلأ الخور الجنبو !!!!!!
نفس المدارس تتوقف اسبوع وراء اسبوع ونفس الجدار الوقع السنه الفات وقع تاني!!!
والمسلسل مستمر
كل شي بالمقلوب
لماذا لاتفتح المدارس شهر اكتوبر وتغلق يونيو واجازة نص العام في مارس!!!!
احسن البرد ولا تقفيل المدارس اسبوعيا في الخريف
لماذا العناد والمكابرة!!!
دورينا ايضا بالمقلوب
مباريات تلعب في عز الخريف وملاعب تغرق في شبر موية!!!!
العام ليس باكمله خريف!!!
كلو بالمقلوب مين المسؤول
طالما واكبنا العالم بذيادة ساعة في التوقيت العام ياريت نواكب العالم في نظام التعليم والدوري!!!!
••••••••••••••••••••••••••
مريخ امدرمان ليس ببعيد عن اخطاء الولاية
وكل عام تتكرر نفس الاخطاء
اقيلو المدرب وجيبو مدرب والمدرب الوطني احتياطي لفترة مابين (الشوطين ) اقصد المدربين!!!
نفس المدرب المقال يرجع باعلي من الراتب الكان متواجد بيه قبل عام !!!
وتنتهي حلقه قديمة وابتداء حلقة جديدة لبناء حقبة جديدة!!!
ويقال نفس المدرب تاني
والساقية مدوره!!!
يرحل مدرب كنا نهتف ضده
ونهتف مره اخرى للمطالبة برجوعه
لاعب يرحل ونطالب برجوعه
والساقية مستمرة!!!
حتى الادارت نطالب برجوعها
وبعدين ماقدرين نصبر علي مدرب عامين
ولاعلي ادارة عامين
واللاعبين برضوا صبرنا ليهم محدود والعجب قرب يرحل بامر الادارة والجمهور في اول عامين !!!
ياجماعه مافي كيان بتبني في عام
ومافي مدرب بتصبروا عليه عام
وعايزين بطولات!!!!
لو عايزين مريخ بطولات اصبروا عليه لمده عام او اتنين
ولو عايزين فريق متقلب الاطوار خلونا نقعد نهتف كل عام !!!
وحنرجع لاحصائية المدربين تابعونا عشان تشوفوا العجب العجاب!!!!!
اذن لافرق بين مطرة السودان
ومريخ امدرمان
لانتعلم من الاخطاء سنويا،،،،،،
••••••••••••••••••••••••••
مسك الختام
مطرة واحدة تظهر عيوبنا ونقعد نشتم ونكورك من نفس المناظر كل عام
وهذيمة واحدة او تعادل او نزيف نقاط نقعد نشتم ونكورك ومانصبر علي معالجة الاخطاء
الحل في ايدينا في الحالتين
الصبر ومعالجه القصور بايدينا
شتيمتنا وهتافنا مابعالج الخلل
لوماصبرنا علي اللاعب والمدرب والادارة سنهتف غدا بعودتهم
••••••••••••••••••••••••••
ونحن علي المدرج ندعم ونشجع ونتفرج
لكن غدا ستحتاجنا الاحياء والمدارس والطرقات للمساعدة
فلنكن (شباب امنوا بربهم فذدناهم هدي)
مطرة امس ستخلف اثار ولابد من معالجته بايدينا نحن الشباب
كل حي يحتاج ايادينا
وكل مدرسه تحتاج سواعدنا
وكل طريق يحتاج ان نساعد سالكه
فيهم الوالد والاخ الصغير والوالدة والاخت ،،،،
كن عون لاخيك وسيكون الله في عونك غدا،،،،
حاربوا المتطفلين في القروبات باعلان النفرات واغلب اصحاب الشائعات والمنتمين الي العرضة شمال يكرهون سيرة النفرات
نفرتنا القادمة
الزمان : ٢٠١٦/٨/١٠
المكان : دار نادي المريخ
تحت شعار بنفرتنا نسدد غرامتنا
متبقي من الزمن فقط(٢٦ يوم)
••••••••••••••••••••••••••
همسة اخيرة
ليس فريق المريخ وحده من يعاني من غياب المحترفين
وكل محترف يطالب بقيمة عقدة
‏(محترف اتحاد جده السعودي ريفاس سبب تاخر عودتة بسبب اصابته غيرصحيح
‏الصحيح ان للاعب مستحقات تصل الى ٧٠٠ الف دولار يطالب بدفعها اولا
‏وهي غير الرواتب)
دا نص الخبر عن اتحاد جدة السعودي
ماذالت الاندية تعامي مع المحترفين
وادارتنا حاليا تصيغ شكوي قانونية تجاه تراوري وسلمون!!!!
لكن الفرق بين الخبرين
انو المعلومة في اتحاد جدة تستطيع تلقيها من اقرب صفحه تويتر لاصغر صحفي من كتاب نادي الاتحاد
وعندنا نعاني الامرين لتلقي معلومة سبب الغياب او سبب الشكوى او سبب انهاء التعاقد!!
والمشكلة الكبرى تستطلع كشف ناديك تقراء اسم لاعب تسال عنو يقولوا لسه توفيق اوضاع بس هل توفيق الاوضاع يحتاج لهذه الشهور !!!
هل عناد واستقصاد من الاتحادالعام للكرة!!
ام قصور اداري ؟؟؟
نفس مشكلة الوك تتكرر مع عاطف الغزالة
كشف الفريق يعاني من النقصان وعندنا لاعب اسم موجود لكن انضمامه في خبر كان !!!
٣ خانات ولاعبين لايمكن الاستفادة منهم حاليا
تراوري وسلمون وعاطف
خانات معطلة او شبه معطلة
غير كشف الاصابات بقيادة كابتن الفريق !!!!!!
وكابتن الفريق لينا عودة ليه في الاحصائيات قريبا،،،،،،
عشان نشوف منو الظالم ومنو المظلوم!!!!!
••••••••••••••••••••••••••
خارج النص
الفترة القادمة تحتاج الي اعادة صياغه
اولا القطاع الرياضي ودائرة الكرة والحساب بالثانية ذي ناس سوداني عطاءك مقابل بقاءك في الكشوفات ومافي كبير علي المريخ
ومحاسبة كل اللاعبين علي البطاقات الملونة والاحتكاك مع الحكام والجهاز الفني والاداري
ثانيا القطاع الاعلامي
تفعيل موقع النادي واستقطاب كوادر مؤهلة من جماهير النادي لادارة موقع النادي لمحاربة ظاهرة الاخبار المفبركة والغير حقيقية وزعزعة استقرار النادي والجمهور
خبر في موقع يستطيع ان يزرع الكراهية في نفوس الجماهير تجاه لاعب وبعديها الادارة
لذلك محاربة الشائعات وشتلات الواتس بعد كثرتها لابد منها بعد تفعيل الموقع الرسمي للنادي نستطيع ان نقول للقروبات جيبو اخباركم من موقع النادي
لكن الان كل من هب ودب يشتل ويصدقه الكثيرون ويخلق عداوة بين اللاعب والادارة والجمهور
الشتلات والاخبار المفبركة ابعدت الكثير من الجمهور
والي لقاء في تغريدة اخرى
••••••••••••••••••••••••••
# هاشتاق طبي
‏للتخلص من الصداع الناتج عن التوتر الذي يتسبب في وجع بالرأس والعنق، يمكن استخدام كمادات المياه الدافئة، ووضعها على مقدمة الرأس ومؤخرة العنق
وربنا ينعم عليكم بالصحة والعافية
••••••••••••••••••••••••••
# هاشتاق توعوي
تجنب القيادة بسرعه في الامطار
وتجنب السير في المجاري
والخطر الأكبر للعواصف والامطار والذي قد ينتهي غالباً بالموت، يكمن في محاولة تفادي السائق للأغصان الواقعة على الطرق المحاطة بالأشجار، وهنا تتسبب السرعة العالية للسيارة في فقدان السائق السيطرة على السيارة، ومن ثم اصطدامه بالأشجار
ومحاوله عبور الطرقات والتقاطعات خاصة عند تعطل الاشارات المرورية يتسبب في كثير من الحوادث
تمهل في قيادتك اثناء الامطار وتشغل الهزر والاشارات المتقطعه وعدم استعمال الانوار الطويلة
وربنا يكتب سلامتكم
••••••••••••••••••••••••••هذه اراء التغريدة اقبل منها ماتشاء وارفض منها ماشئت..
التغريدة تنقل نبض المدرج والقروبات وتقف في مسافة واحدة من الاحداث ،،،،،
نحاول ان نلفت الانتباه لبعض الاحداث والنقاط بواقعية……..
التغريدة لن تخرج خارج نطاق المجتمع المريخي نهائيا الا ماندر
ونقد الذات يوصلنا الي الامام والي المنصات باذن الله ،،،،،
ادعمونا بالنصح والارشاد وصححونا إن اخطأنا في يوم من الايام ،،،،،،،،
***تغريدتنا ونسة وحكاوي ونقاط بصوت مسموع***
==================

حمل تطبيق كورة سودانية لتصفح اسهل

لزوارنا من السودان  على متجر 1موبايل

http://www.1mobile.com/net.koorasudan.app-2451076.html

لزوارنا من جميع انحاء العالم من متجر قوقل

https://play.google.com/store/apps/details?id=net.koorasudan.app

لزوارنا من الصين الشعبية

http://www.androidappstore.mobi/EN/displayproduct/112531/playstore