ماشكرا حمدوك كلو كلو

0
172

في السلك

بابكر سلك
ماشكرا حمدوك كلو كلو

*طالعنا بالامس خبر مفاده ان الهلال يخوض مباراة اليوم لتأمين الصدارة قبل مقابلة النجم
*عن اي صدارة يدور الخبر؟؟لست ادري
*وطبعا ممكن بالفهلوة يتم تفسير الخبر علي اساس ان القصد منه ان يظل الهلال قريبا للمتصدر حتي ينافسه علي الصدارة
*ولكن اه وييين يا
*مصدر هذا الخبر ولد فاقدا لثقة ملايين المريخاب
*لان اخباره السيئة عن المريخ تكتب بحب كبير
*عكس الاخبار الجميلة التي اما طانشوها او بيخوها
*والجمهور العاقل لاتفوت عليه الاستراتيجيات ولو وضعت بدهاء كبير
*لذا احتفظ معظم الجمهور الواعي بثقته لنفسه ولم يمنحها ساكت
*المهم
*يلعب امل عطبرة الدورة الاولي بسقف اعلي تلاتة وتلتين نقطة
*ويلعب الهلال بسقف حده الاعلي خمسة وتلتين نقطة
*ويلعب سيد الناس علي سقف يصل لتمنية وتلتين نقطة
*فعن اي صدارة يتحدث مصدر الخبر وعن اي تأمين لها؟؟؟
*الفيكم انعرفت
*المهم
*رددناها كثيرا
*شكرا حمدوك
*ولكن آن الأوان ان نردد
*ماشكرا حمدوك كلو كلو
*طالما فوضي الاسعار تضرب بالثورة عرض الحائط دون ادني تدخل حكومي
*ماشكرا حمدوك
*طالما فوضي المرور وسوء استخدام الطريق تتيح لبتاع ركشة ماشي قدامك فجأة يقبل عليك بعين قوية
*يبقي ماشكرا حمدوك
*طالما اسعار قطع غيار السيارات يحددها التجار بالتلفون
*لدرجة ان ساعة الفرامل التي لا يزيد سعر الدسته منها عن دولار تباع القطعة الواحدة بتمنمية وخمسين الف نهارا جهارا
*وفيها كمان رجعة للكمبيوتر لتأكيد السعر
*طالما جوز لقم الفرامل الخلفية بستة مليون
*يبقي ماشكرا حمدوك
*طالما الحافلات تصرف جاز يوميا والمواطن تتقطع براطيشو من الكداري لعدم توفر المركبات
*يبقي ماشكرا حمدوك
*طالما سعر اللحمة بتغيير كلو يوم
*وطالما لحمتنا بره بلدنا ارخص من لحمتنا جوه بلدنا
*يبقي ماشكرا حمدوك كلو كلو
*صحيح الحفرة عميقة
*لكن تركيز الجهود علي الحلول الخارجية اكتر من الضبط والربط الداخلي
*يجعل الفوضي قادرة علي مص دماء جميع الاعانات والاعفاءات الدولية
*وطول امد الحلول يمثل ضغطا علي الناس المضغوطة اصلا يفقدها رشدها ويفقدها ثقتها في ثورتها
*داخليا السلحفائية تعوق مسيرة الثورة داخل الشرايين
*سامعني ياحمدوك؟
*يبقي شكرا حمدوك لانك سمعتني
*ايها الناس
*لسة ما في زول جاوبني
*بأي حق قام الاتحاد السوداني بتعيين مجالس تسيير لهلال الابيض واهلي شندي وغيرهما؟
*وموقف المفوضية شنو ولي شنووووو؟
*ايها الناس
*ان تنصروا الله ينصركم
*اها
*نجي لي شمارات والي الخرتوم
*عندي قصة يا والينا
*دايرك تحكيها لي حمدوك تقول ليهو حكاها لي سلكا لينا
*قالوا ياوالينا
*واحد مسافر في الخلا ملفح بالعباية والعمة والمركوب الماخمج وشايل شنطة جلد زي بتاعت قضاة السودان زمان
*اسمو حمدان
*اها
*حمدان جا جمب حلة كده مع المغرب لقاهم واقفين دايرين يصلوا المغرب
*الجماعة شافوا الهيئة قالوا وحاتك هيئة علماء العالم
*حلفوا عليهو وقدموهوا امام
*صاحبنا شكل بس لكن مضمون تك
*وحسب رواية حمدان وصف الصلاة وقال
*قلت الله اكبر
*نسمع لك دنننن وراي
*قريتلهم ام حمدو وقريت لهم ام قلابيز
*ورقد بيهم
*وقلع بيهم
*وبتا رقد بيهم
*وقلع بيهم
*وكت قلت سلامو عليكو
*اتلفتت لقيت كلو زول بصلي وحيدا
*اها ياحمدوك
*الواحد فينا لما يخش السوق ويقول سلامو عليكو واتلفت
*بلقي كلو زول ببيع وحيدا وحيدا
*علي زول علي كيفو
*وكلو سعر براهو
*فهل لنا ثورة ام مجرد حمدان ملفحة وعمة وشنطة قضاة زمان؟؟؟
سلك كهربا
ننساك كيف والكلب قال البلد دي مليانة كترت حمدان
والي لقاء
سلك

المشاركة

أكتب رد

أدخل تعليقك من فضلك!
أدخل إسمك هنا من فضلك