صحيفة كورة سودانية الإلكترونية

ما فعله (الغربال) في توتي (البحر) و(الفيضان) ما عمله فيهم

1٬153

صابنها

محمد عبدالماجد

ما فعله (الغربال) في توتي (البحر) و(الفيضان) ما عمله فيهم

_____________________
• لمن يقولوا ليكم المريخ (ضل) للهلال بتزعلوا.
• الهلال فريق ليه (ضل).
• زمان وقت يقولوا ليك الزول دا ليه (ضل) ما كنا فاهمين حاجة.
• هسع عرفنا معنى هذه العبارة.
• الزول وقت يكون عندو (ضل) فذلك يعني انه عنده شخصية وعنده مكانة.
• والهلال فريق عنده ضل.
• ضلنا (المريخ).
• الكلام دا قالوه ناس فيلا والاكسبريس وفايبر وكمبالا سيتي.
• ناس يوغندا قالوا ان المريخ هو (ظل) الهلال.
• الكلام دا قالوه قبل كم سنة.
• ووقع لينا يا دوب كلامهم.
• انتوا يا ناس المريخ حتى في (قرعة) الممتاز طلعتوا (ضل) للهلال.
• مباراة الهلال وتوتي بمشي ليكم عليها ، خلوني هسع اتكلم ليكم شوية عن (القرعة).
• عارفكم أنا ..عاوزني ادخل ليكم على (الغربال) طوالي.
• زي الناس البيعزموك (غداء) – يدخلوا ليك بالبطيخ قبل ما يجيبوا ليك (الغداء).
• وانتوا هسع عاوزني ادخل ليكم بالطبيخ.
• لكن دي انا ما بعملها ليكم.
• خلوني اقيف على قرعة الدوري الممتاز.
• قرعة باني.
• انت يا الفاتح باني – القرعة دي لو عملتها لدورة مرحوم – ما بتعملها كدا.
• دورات شهر رمضان البتكون في الاحياء ما بتكون بالصورة دي.
• لو عملتها (نقاشة) في بيتكم ما بتكون بالصورة دي.
• معقولة بس.
• هسع الكلام دا في مزرعة دواجن ممكن يحصل.
• لو زرعتوها (بصل) ما بتكون بالصورة دي.
• فجل ما بتكون كدا.
• شغلكم شغل (قرع) ساي.
• نلعب مع حي العرب في الاسبوع الاول – المريخ يلعب مع حي العرب في الاسبوع التاني.
• نلعب مع اهلي مروي في الاسبوع التاني – المريخ يلعب مع الاهلي مروى في الاسبوع الثالث.
• نلعب مع الامل عطبرة في الاسبوع الثالث …المريخ يلعب مع نفس الفريق وفي نفس الملعب (الجوهرة الزرقاء) في الاسبوع الرابع.
• الهلال في الاسبوع الرابع يلعب مع هلال الابيض…المريخ يلعب مع نفس الفريق وفي نفس الملعب في الاسبوع الخامس.
• عليكم الله هسع لو الفاتح باني (قاصدها) بجيبها كدا.
• زي لو في زول (نشن) عليها ..ما بجيبها بالصورة دي.
• لو (القرعة) دي خطط ليها مامون ابوشيبة وقالوا ليه اعمل لينا (البرمجة) بي مزاجك ما بعملها كدا.
• دي (قرعة) شنو؟
• دي ما قرعة دي خطة.
• في الدنيا – في قرعة بالشكل دا.
• في قرعة كدا.
• تلعبوا في استادنا – وتلعبوا مع نفس الفريق الذي لعب معه الهلال.
• الناس ديل ما فاضل ليهم إلّا يأخدوا (حافز) الانتصار من تركي آل الشيخ.
• ماشين على نفس الطريق.
• مفروض تشكيلة المريخ يختها زوران.
• أي فريق نلعب امامه يلعبوا ضده في الاسبوع التاني.
• هسع وقت الهلال في الاسبوع الـ 11 الهلال يلعب مع المريخ …المريخ في الاسبوع الـ 12 هل سوف يلعب امام المريخ.
• يعملوا ليكم شنو؟
• عملتوها ظاهرة.
• قرعة زي (غيار الجرح)…من نلعب معه اليوم …يلعبون معه في اليوم التالي.
• يعني الفريق نكشفو ليهم.
• ونحتوا.
• ونرهقه ليهم.
• ونجيبوا ليهم جاهز.
• نجيبوا ليهم (مدروخ).
• اتذكر زمان كان عندنا عمنا وقت يجينا (حرامي) بقول لينا انتوا (دوخوه) لي وابعدوا لي منو.
• نجيبوا ليه (مدروخ) من السكسكة والجري والضرب وعمنا ينقض عليه بعد ذلك.
• المريخ هسع بتعلم من الاخطاء التى يقع فيها الهلال في المباراة.
• غايتو يا الفاتح باني قرعتك دي ما عندها أي علاقة بالقرعة.
• في العالم اصلو ما شفنا لينا قرعة بالشكل دا كدا.
• قرعة زي السماية.
• نلعب الليلة…يلعبوا معاه بعد اسبوع.
• سماية بس.
• تحلف تقول (سماية).
• خلوه الهلال.
• هسع قابلكم فريق بيلعب في نفس سير نادي اخر.
• ما في كدا.
• هل يمكن ان يلعب الاهلي شندي في مسار هلال الابيض؟
• ممكن يلعب مريخ الفاشر في مسار هلال الفاشر.
• كلام ز يدا ما بحصل.
• ولاى سمعنا بيه.
• ولا لاقنا في حتة.
• غايتو ناس الاتحاد العام ديل لو عندهم (حلة) بعملوها في الاكاديمية …والله (الطبخة) ما ممكن تتطلع بالشكل دا.
• طبخة عجيبة.
• الكلام دا بس ما تدخلوه لينا في النظام الاساسي للمريخ.
• ممكن القرعة دي تبقى ضمن لوائح الاتحاد.
• تبقىة ثابتة.
• ندخل بعد كدا على المباراة.
• اول حاجة قبل الاهداف الخمسة التى سجلها الهلال في فريق توتي …خلونا نقول توتي لعبت.
• توتي قدمت مباراة كبيرة.
• توتي لعبت.
• انا ما عارف توتي لو ما لعبت كان حصل عليها شنو؟
• الكلام دا حالتو بعد (الكوبري) الجديد.
• الموضوع دا لو كان بالبنطون كان بكون اكتر من كدا.
• الناس ديل قدر ما عملوا ما قدروا على الغربال.
• ما شاءالله.
• وتبارك الله.
• الله يحفظ الغربال ويغطي عليه.
• انتوا تعالوا هنا يا ناس توتي…انتوا فيضان 46 ما قدر عليكم.
• فيضان 88 ما قدر عليكم.
• فيضان 2020 والذي لم تشهد البلاد مثيل له منذ قرن ما قدر عليكم.
• الغربال يجهجهكم كدا؟
• الفيضان ما عمل فيكم كدا؟
• يعمل (الغربال).
• الغربال طلع اخطر من (البحر).
• اخطر من (الفيضان).
• اخطر من (السيول) و(الامطار) ذاتها.
• ما شاءالله …وتبارك الله.
• الزول دا قدر ما حاولوا يترسوه ويثبتوه ما قدروا عليه.
• جابوا (خيشهم) و (شوالاتهم) و (باكاتهم).
• وبرضوا ما قدروا يترسوا (الغربال).
• توتي غرقت في الشتاء.
• انتوا يا ناس (توتي) ما فيكم كلمة.
• وانتوا ذاتكم مننا وفينا.
• انتوا هلالاب مننا.
• لكن برضو (البشتنة) كعبة.
• توتي في الخريف ما بتغرق …معقولة توتي تغرق في الشتاء.
• الفيضان ما قدر عليكم …يقدر عليكم (البرد).
• الغربال صعب.
• وهو ماشي على الطريق عشان يكون هداف للدوري مع نزار حامد.
• نزار حامد جاب ليه (هدف) – زي صورة العرس.
• هدف لوحة.
• نحن شفناه من داخل الملعب …ما عارفين الحصل شنو؟
• والسمؤال كمان جاب ليه هدف ..ذكرنا بهدفه في المريخ.
• هدف صاروخي.
• واباذر (حكاية).
• اباذر ذكرنا بي حلاوة المولد.
• حلاوة جكسا.
• والغربال ارمي ليه الكورة وأسالوه بعد ذلك من الهدف.
• اسألوه من القون.
• المباراة في مجملها بديعة وجميلة ورائعة.
• يمكن جمال المباراة جاء من شجاعة توتي.
• توتي لعبت بشجاعة.
• الناس ديل تقول كل اسبوع بيلعبوا امام الهلال.
• اصلو ما في زول بتخيل ان اخر لقاء رسمي جمع بين الهلال وتوتي كان قبل نصف قرن.
• …………
متاريس
• مباراة الهلال القادمة امام الاهلي شندي.
• والاهلي شندي ايضا بيلعب كورة.
• عشان كدا المباراة سوف تكون جميلة بين الهلال والاهلي شندي.
• اباذر عبدالمنعم كان من نجوم المباراة – لعب مباراة كبيرة.
• وينتظر من (ميسرة) مستوى كبير في مقبل الايامات القادمة.
• بوجبا ايضا كان من نجوم المباراة.
• ونزار كالعادة طبعا نجم.
• اوتارا ممتاز.
• وارنق تخلص من الثقة الزايدة.
• ننتظر التسجيلات القادمة – عشان ياسر مزمل والدالي.
• خلوهم المحترفين.
• اتخيلوا الهلال في وجود ياسر مزمل والدالي.
• هجوم فيه الغربال وياسر مزمل وعيد مقدم يتعاملوا معاه كيف؟
• جمال سالم عاد كما كان.
• بس ما ترجعوا لينا الكورة للخلف.
• هذه المشاهد ظلت تكرر في كل مباريات الهلال.
• والمشكلة انها تشكل خطر كبير على مرمى الهلال.
• تخلصوا من (عادة) اعادة الكرة للوراء.
• ما ترجعوا الكورة.
• ألعبوا لي قدام.
• الليلة هلال الابيض والمريخ.
• والمريخ بي حالت ودي عاوز ليه فريق شجاع.
• فريق شرس.
• ناس طبنجة ديل ما بنستروا.
• الليلة ان شاءالله ح نفرح.
• وهلال الابيض قادر على تحقيق اول فوز في الدوري.
• علما ان هلال الابيض في المركز الاخير.
• وهلال الابيض دا ما موقعه.
• يا جلنجات …الطريق سالك.
• يا مهند الطاهر انت متعود.
• ………
• ترس اخير : وتستمر الافراح.

قد يعجبك أيضا
4 تعليقات
  1. Hajjam يقول

    ابدعت ياابو عبد الماجد وكلامك ده سوف يشعل النار في ابي المستعار المتلون.
    قلنا قبلك ان قرعة باني موجهة بطريقة مخجلة والله وهذا كله بسبب الحملات المسعورة لاعلام التخدير والضلال وشحن البلطجية والمتفلتين للوقفات الاحتجاجية لارهاب لجان الاتحاد والحكام. وغواصات اليخماو في لجان الاتحاد عملوها ظاهرة جدا. الفريق يلعب مع الهلال وبعد اسبوع يلعب مع المدفور وطبعا الفريق يكون قد استنفذ طاقته وحتي لو لم يحدث ذلك فانه سيكون كتاب مفتوح لمدرب المريخ الضعيف القدرات والذي يبني خططه بناء علي احداث مباراة الهلال مع الفريق وهذا ليس من عندي وانما بناء علي تصريحات قوميز نفسه. مشكلة اعلام الهلال لا ادري ان اقول عنه مثالي او ضعيف ولكنهم يتركون الحبل علي الغارب لاعلام الدلاقين المهووسين ليسرحوا ويمرحوا واخر ارهاب وتهديد لكل من له علاقة بكرة القدم. يجب عليكم الانتباه لرسائل التهديد المبطنة التي تصدر من اعلام الضلال والتي تهدد الجميع اما ان تكونوا معنا او فانتم ضدنا. يجب وقف هذه الفوضي بالتصعيد الاعلامي والاداري حتي تكون هنالك عدالة في المنافسة التي اصبحت مهزلة موجهة لخدمة فريق اليخماو.

  2. صلاح يقول

    يا هجام شكلو صاج اللقيمات تاني رجعوهوا النار يجقجق، وده كلو بسبب مثالية لجنة التطبيع المهذبة، وبصراحة الدلاقين عاوزين ليهم زول شرامي وبعرف يدي على الراس !!
    نسجل اللاعبين يجوا يوقعوا معاهم عقد بي فوق ولجان الإتحاد الحمراء وضباعهم يتلاعبوا ويرجعوا ليهم اللاعبين، وفوق ده كلو نستضيف مبارياتهم في الجوهرة ويقلوا في أدبهم…..
    بس الشئ البحير ذي ما قال ود عبد الماجد ليه أهلي شندي مبارياته ما بتكون ذي هلال الأبيض أو ذي مباريات الخرطوم الوطني ؟ ريحة العفنة طاقة غايتو !!
    صبي الكاهن الأعظم أليخماو العجوز ولدنا أبو المستعار المندلاوي مركز مع مسمار هلال الأبيض بي غادي، ومستني الحكم يصفر ويعلن عن ضربة جزاء 😆😆😆

  3. جاغوم يقول

    والله يا محمد مستواك انحدر جداً
    عاوز تعرف انك مشجع متعصب ولست كاتب صحفي اقرأ التعليقات اذا لقيت اثنين في واحد اقصد هجام وصلاح اثنوا عليك فاعلم انك كصاحب كرات عكسية
    خليك في السياسة يمكن تلقي مشجعين اكثر

  4. كرياكوا يقول

    تم ضرب هلال الابيض وطبنجة جاب قون
    ماذا في خاطر .. بعد ذلك

اترك رد

لن يتم نشر عنوان بريدك الإلكتروني.

يستخدم هذا الموقع ملفات تعريف الارتباط لتحسين تجربتك. سنفترض أنك موافق على ذلك ، ولكن يمكنك إلغاء الاشتراك إذا كنت ترغب في ذلك. قبولقراءة المزيد