صحيفة كورة سودانية الإلكترونية

مجلس السوباط يستثمر في مشجع الهلال!!

90

العمود الحر
عبدالعزيز المازري
مجلس السوباط يستثمر في مشجع الهلال!!

*تاني ما في زول منكم يجيب سيرة (الهلال)
* وحبوباتنا زمان كانوا بقولوا الفلس صعب
*يعني مشجعي الهلال الزمان ديل والان كانوا بشجعوا الهلال دا عشوائي ساي كده
*كده بالواضح ما بالدس وحسب تصريحات السيد رامي كمال عضو مجلس الهلال
*أي كيان غير شرعي ستتم مجابهته وزيادة وقد تم مخاطبة وزارة الخارجية
*جابت ليها كمان تهديد ووعيد!
*شكيتها لي الله الحرب دي ..
*جهجهت باكات الجماعة !!
*يعني هي وزارة الخارجية دي فاضية لمشاكل البلد ولا أوامر السيد رامي بملاحقة جماهير الهلال
*هو الهلال دا حق المجلس ونحنا ماعارفين ولا شنو
*ثم ثانيا وأخيرا انتو يا جماهير الهلال بالسعودية كنتو فارشين شعار الهلال في الشارع وبعتو ولا كنتو بتعملوا طواقي بالدس فيها اسم الهلال عشان نعرف برضو مش المجلس دا عاوز استثمار
*ومالو معاهم في الاستثمار وبدل عن الشركات والمحلات التجارية خلونا نستثمر في جماهير الهلال ديل
*أي تاني أي مشجع هلالي لو كان حتي في سقط لقط غير مسموح لهم بعمل مجموعة او كيان فيهو اسم الهلال نهائي وإلا ستطالكم العقوبات جراء استخدام اسم الهلال ولازم تدفع العشرين دولار شهريا عدا نقدا
*زمان كان عندنا حافلة لمن يكون في مباراة للهلال بنرفع علم الهلال فيها في الحافلة وكنا مجموعة واحدة كلنا مع بعض نمشي المباراة اسمنا هلالاب وشعارنا الهلال
*يعني لو حضرنا زمن رامي دا كان اسه قاعدين في ثلاجات سوبا
*هي لجنة التسيير في جدة دي عندهم عضوية ..كلام ساي ياجماعة
*وقال تسعة علي عشرة !! تسعة مريخاب وواحد من الهلالاب
*والشرك زاتو قبض خلاص!
*واحد تاني هناك قال اغلب الأشخاص المختارين ديل مهندسين! ماهو زاتو رامي مهندس طبخة اللجان
*ويعني تاني اللجان دي الا يخشوها خريجين هندسة ولا شنو
*حليلك يا ابزرد وقال مسمي نفسو في الفيس اب زرد الهلالابي
*يا اخوي حصل نفسك ساي الناس ديل شغالين استثمار وعملوا تحذير كبير وتهديد ووعيد
*احسن خليك اب زرد ساي وإلا تعتبر خارج شرعية المجلس
*صاحبي الأستاذ الجميل عبدالوهاب هلاوي جاء داخل توش وقال لي (انا معاهم)
*مسكين هلاوي الراجل المعطون بحب الهلال قلت لي متوقع ان يشملك القرار..اصلو الفلس صعب واهلنا قالو لمن يغلبك سدها وسع قدها
*ومع الأمانة العامة لمجلس الهلال والطباخ مش حتشوف النور
*استثمار قالوا لتقنين عمل الروابط بالخارج!! هي الروابط دي كانت مقصرة ما براكم حليتوها وخليتو النار مولعة
*جدة دي كلها كانت مقدرة ظروف المجلس وداعمه له بقوة لكن فجأة كده بعد مصادرة حق التشجيع من مجلسنا كلهم قلبوا معارضة
*أي المجلس الان في جدة كلها معاهو لجنة التسيير المعينة مع مريخاب الرابطة الرياضية
*وناس الوفاق ديل شغالين شغلهم براهم !! انا ما شوفت وفاق زي دا
*حاجة ولا أروع ما مشحودين علي الهلال !
*لجنة رامي المريخية والمتماهين معهم مضي علي إعلانها ثلاثة أسابيع سجلو ثلاثة مريخاب وواحد هلالابي قشرة نص كوم كده وواحد تاني متماهي
*عارفين المتماهين ديل منو !!
*وبرضو تسعة علي عشرة
*عضوية ما تخرش المية
*انتو العليقي والفاضل التوم وين! انتو ما سمعتو بالحصل دا ولا ماشايفين
*ما علينا ! وين الرابطة المركزية ووين أبو الزهور خرق الدستور!
*يعني اسه الكيانات الكانت بتدخل الانتخابات دي محتاجة شرعية وختم من الأمانة العامة للهلال حتي تمارس حقها ولا دي شرعية رامي
* تنظيم هلال المجد الذي اوصل المجلس للحكم من اين استمد شرعيته يارامي !
*الهلال صدارة, الهلال للجميع, عزة الهلال, جماعة الإنقاذ رابطة الموج الأزرق اسود المدرجات شباب الهلال اولاد الهلال وحتا التي كانت في زمن البابا وما بعده!فجر الغد وتنظيمات تاريخية اخري
*معقول كل الكيانات دي قاعدة في السهلة ساي كده!
*حيرنا مجلسنا الهمام ,يعني ديل كلهم الشارع ولا بس القصة دي في مشجع الخليج
*كمان جابت ليها تهديد ووعيد
*حيرونا الجماعة ديل انا ماجبت سيرة البرير ,,اصلو البرير دا ريس برش طوالي وبلنجتو فوق
*بقت علي المشجع المسكين دا ! وحليل المغتربين الكان بتجمعوا في الاستراحات والميادين لمن تكون في مباراة للزعيم سيد البلد
*انا زاتي خائف اكتب اسم الهلال تصل شكوي يقوموا يلحقونا امات طه
*غايتو شخصيا انا مع الاستثمار وبالله يامجلسنا طلع تحذير كده لكل الجرائد التي تستخدم اسم الهلال برضو دا مشروع استثمار
*بقت علي المشجع المسكين دا
*كلمة حرة أخيرة ..ZERO من عشرة
كلمات حرة
*لجنة جدة بها مريخاب أي مريخاب عديل!! ليس اتهام حقيقة لا تحتاج لإثبات
*لجنة جدة معين فيها أعضاء من الرابطة الرياضية المريخية وميولهم مريخية ولا تحتاج لإثبات
*لجنة رامي معينة من مجموعة واحدة بواسطة الطباخ ! ولاتحتاج لإثبات
*اللجنة عبارة عن شله ولا تحتاج لإثبات وبعد هذا هل يود المجلس ان يوافق ويبصم عليها الهلالاب
*ماعارف مش قلتو اللجان حقت مهندسين ودكاترة انتو جدة دي مافيها مهندسين ودكاترة ولا شنو..ياكافي البلاء
*اخر كلمة حرة ..جدة غير
حكاية
مجموعات الواتس اب ,,اعملوا حسابكم المجلس جااااااااااكم ,,أي تسمية غير شرعية تعتبر مخالفة قانونية عند مجلس الهلال الرجاء عدم استخدام الاسم
حكاية ثانية
زولنا دا عمل حكمة براهو (لا تسأل مجرب او حكيم لخبط برااااااك والله كريم)
اخر حكاية
هي اسمها الأمانة العامة ولا النيابة العامة!!

قد يعجبك أيضا
اترك رد

لن يتم نشر عنوان بريدك الإلكتروني.

يستخدم هذا الموقع ملفات تعريف الارتباط لتحسين تجربتك. سنفترض أنك موافق على ذلك ، ولكن يمكنك إلغاء الاشتراك إذا كنت ترغب في ذلك. قبولقراءة المزيد