مجلس (حديقة الموردة) يبحث عن (الشرعية) عبر (الكرفتات الحمراء)

صابنها

محمد عبد الماجد

مجلس (حديقة الموردة) يبحث عن (الشرعية) عبر (الكرفتات الحمراء)

• الدكتور الحبيب مزمل ابوالقاسم كتب (تحكمت فلول المؤتمر الوطني في اتحاد كرة القدم أربع سنوات عانت فيها فسادا غير مسبوق بتعد قبيح على أموال الاتحاد لدرجة إنفاقها على زوجة شداد ، التي نالت عشرين ألف دولار من الدعم المقدم من الاتحاد الإفريقي لكرة القدم الى الاتحاد السوداني).
• البيسمع كلام مزمل يفتكر ناس حازم مصطفى جاءوا للمريخ من (لجان المقاومة).
• تابيتا بطرس التي تشغل مقعد المرأة في مجلس (حديقة الموردة) شغلت عدد من المناصب في حكومة الإنقاذ وهي يمكن إن نطلق عليها من (أخوات الفلول) ان لم تكن هي (الفلول) ذاتها.
• تابيتا بطرس ما خلت ليها (حفلة) او (برنامج) للمؤتمر الوطني ما شاركت فيه.
• ومجلس (حديقة الموردة) فيه (لواء) من الدعم السريع (ولواء) من القوات المسلحة.
• الغريبة ان (قنصل حديقة الموردة) متهم مع أيمن المامون بالاستيلاء على (2) مليار يورو…ومزمل ليه أكثر من سنتين بكتب عن (20) ألف دولار يتهم فيها الدكتور كمال شداد.
• تخيلوا ان شداد يشرف على ملايين الدولار منذ أكثر من نصف قرن لم يجدوا غير (20) ألف دولار ليتهموه به.
• 2 مليار يورو التى سرقت من قوت هذا الشعب ما مشكلة ..المشكلة في الـ 20 ألف دولار التي قدمها الاتحاد الإفريقي لاتحاد الكرة السوداني.
• مزمل لا يرى غير (فلول) الاتحاد (فلول) المريخ لا حرج عليهم.
• البلد حاكمها (الفلول)..ولو كانوا الفلول في نزاهة وأمانة البروفيسور كمال شداد …ما كان سوف يكون عندنا معاهم مشكلة.
• د. مزمل ابوالقاسم كتب : (بقى كمال شداد عضو هيئة شوري المؤتمر الوطني وعضو برلمان الإنقاذ بالتعيين وعضو لجنة المواقفين الخمسة في مؤتمر البشير للحوار الوطني رئيسا لاتحاد الكرة وبرز معه حسن عبدالله برقو أمين أمانة وسط وغرب إفريقيا بالمؤتمر الوطني ، وتم انتخاب كل نواب شداد ومعظم اعضاء الاتحاد من أعضاء أمانة الخراب التى دمرت النسيج الرياضي وأفسدت أجواء كرة القدم في البلاد).
• يا ربي جمال الوالي الذي حكم المريخ (14) عاما كان حزب (البعث العربي).
• خلوه الوالي (ما بترضوا فيه) – كل الأسماء التى ظهرت في عهد الإنقاذ في المريخ كانت (مؤتمر وطني) – والآن مجلس (حديقة الموردة) يتواجد فيه بعض (الفلول).
• على كدا يفترض ان يكون سوداكال رئيسا للمريخ لأن النظام البائد كان يسجنه ..عكس حازم مصطفى الذي استفاد من النظام البائد وافسد فيه.
• لا يمكن أن نطبق هذه القاعدة على (الاتحاد) ونرفض أن نطبقها على الهلال والمريخ الأكثر تأثيرا على الجماهير والشعب السوداني.
• الهلال عرف أن يحصن نفسه من المؤتمر الوطني رغم دخول بعض عضوية المؤتمر الوطني لمجالس الهلال عكس المريخ الذى لم ينجح في ذلك – إذ مازال المريخ مخترقا.
• شفت صورة لمجلس المريخ جمعية (حديقة الموردة) على طريقة صور مجلس الوزراء ومجلس السيادة والمجلس التشريعي في بدايات التكليف اعلن فيها مجلس (حديقة الموردة) بداية دورته في إدارة المريخ – الكلام دا طبعا حسب (الصورة).
• ما ح يكون عندكم وجود إلّا في مثل هذه الصور.
• في الواقع مجلس (حديقة الموردة) كرسي ما استلمو في المريخ.
• للأمانة الصورة ما فيها كلام – يتوسطها الحبيب محمد سيد احمد (الجاكومي) نائب رئيس المجلس أو الرئيس المناوب كما يطلق على نفسه.
• الجاكومي واضح عليه السيطرة على (الصور) كدت أن أقول (الأوضاع) فتذكرت ادم سوداكال.
• رجعت تاني سكت.
• غايتو كان على (الصور) – محمد سيد احمد الجاكومي ما بقصر معاكم في الحتة دي.
• وممكن يتم الناقصة بي شوية (لايفات).
• في الصور يظهر الحبيب هيثم كابو الناطق الرسمي باسم المجلس (الصامت).
• كابو ما بقدر يقول أي شيء.
• يقول شنو؟
• الناس ديل مباراتهم لغاية الآن ما معروفة وين؟
• ناس يقولوا الابيض.
• وناس يقولوا الجوهرة الزرقاء.
• عليكم الله مشاكلكم دي ابعدوني منها.
• ما تخربوا لينا طبع الجوهرة الزرقاء.
• في الصورة أيضا تابيتا بطرس – الزولة دي من سقط نظام البشير ما في (صورة) نزلت ليها.
• إلا مع المريخ.
• زمان كانت عاملها كلها (صور).
• تابيتا رجعت من خلال المريخ.
• أعضاء المجلس لابسين في الصور (كرفتات) حمراء – يمكن دي الحاجة الوحيدة التى يطلعوا بيها من المريخ.
• أقول ليكم شيء.
• الكرفتة الحمراء لن تمنحكم (الشرعية) لإدارة مجلس المريخ.
• بقية أعضاء المجلس في الصور ما عرفتهم – ديل ح يكونوا طوال فترة عملهم في المريخ في حاجة الى (كباشن).
• قنصل (حديقة الموردة) طبعا بقى في رقبتو …من سوداكال للجنة إزالة التمكين.
• الزول دا يلقاها من منو؟
• مجلس (حديقة الموردة) – سوف أطلق عليه اسم (المجلس العسكري) عشان فيه (لواء) من الدعم السريع و(لواء) من الجيش.
• الموضوع لو وقف على كدا ما في مشكلة.
• لكن (اللواء) بتاع الدعم السريع واللواء بتاع الجيش عاوزين يستلموا المريخ بالقوة الجبرية – عن طريق (السلاح).
• بالكاكي.
• بالبزة العسكرية.
• عاوزين يستغلوا سلطاتهم ويستلموا المريخ (عنوة) زي ما بصرح محمد سيد احمد الجاكومي والذي يمكن ان نعطيه رتبة (لواء) صور.
• الجماعة ديل مشوا مطار الخرطوم عشان يستلموا (جوازات) اللاعبين عن طريق القوة الجبرية وبدون تفويض من النيابة.
• شغل بتاع (عصابات).
• معقولة يا الجاكومي ….سوداكال يجيب (الطائرة الخاصة) ويدفع قروشها ..وانتوا عاوزين تستلموا (الجوازات).
• هي بقت على الجوازات.
• عاوزين تشتغلوا في المريخ ادفعوا.
• استلام (الجوازات) ما فيه بطولة.
• مجلس سوداكال (جمعية النادي) عسكري واحد ما فيها ..عشان كدا سوف نطلق على مجلس سوداكال (المجلس المدني) للمريخ.
• انتوا يا جماعة ما سمعتوا الشعب السوداني داك لو بهتف (مدنية).
• عاوزين تحكموا المريخ – النادي الوطني الكبير (عسكريا).
• سوداكال بقولوا ان مجلسه مدعوم من (الحركات المسلحة) وهذا أمر نحن أيضا نرفضه اذا كان صحيحا.
• ابعدوا (السلاح) من الصراع في المريخ.
• كل مجلس جاء للمريخ بدعي انه جاء عن طريق (صناديق الاقتراع)…السلاح لزومو شنو؟
• المريخ مقبل على مرحلة مهمة …نهاية الدوري والكاس ..وانطلاقة البطولة الإفريقية..وبعد ذلك سوف تأتي مرحلة (التسجيلات).
• كل هذه الأمور تحتاج الى استقرار.
• انتوا يمكن ان تواجهوا الهلال مرتين في هذا الشهر خلال 72 ساعة.
• عاوزين تقابلوا الهلال بي مجلسينكم ديل.
• رتبوا اوضاعكم.
• والعنوا الشيطان.
• وحلوا مشاكلكم.
• عشان مقابلة فريق بهذه التصدع …نحن ذاتو ما عاوزنو.
• الصراع في المريخ يدور على هذه الصورة …مجلس يقول المباراة في (الجوهرة الزرقاء) – المجلس التاني يقول في (الابيض).
• انتوا مختلفين على شنو؟
• لو مختلفين على المريخ انتوا بي طريقتكم دي بضيعوا المريخ.
• مجلس يقول المدرب (غارزيتو) – المجلس التاني يطلع ويقول لا مدرب المريخ (كلارك).
• على كدا في التسجيلات القادمة ممكن مجلس يسجل والمجلس التاني يشطب.
• سيف تيري قال الأوضاع دي أنا ما بقعد فيها.
• والتش ذاتو اظنو قال اخير لي (الاصابة).
• ……..
متاريس
• الهلال لعب في بحر دار يوم الأحد ..قاعد لي يوم التلاتاء ليه ؟ وهو عنده مباريات مهمة في الفترة المقبلة.
• سوداكال جاب للمريخ (طائرة خاصة) دي السوباط في الهلال ما قدر عليها.
• الهلال في اثوبيا لغاية الآن منتظر الحجز.
• مباراة الهلال مع الاهلي الخرطوم يوم الخميس في كاس السودان ما ساهلة.
• السنة دي دوري وكاس.
• اللهم دوري وكاس.
• …..
• ترس اخير : قنصل حديقة الموردة بقى في (الصورة) ما موجود.