صحيفة كورة سودانية الإلكترونية

مساء سعيد ..

20

قزاز ورزاز
محمد الطيب الأمين
مساء سعيد ..

الجديد في (مقاطعة اللحم) هو (الإعلان) عن مقاطعة اللحم .
كنا مقاطعين وساكتين والآن مقاطعين بالصوت العالي .
وأظن وليس كل الظن إثم أن المقاطعة الصامتة اقسي من المقاطعة المعلنة .
بعد (30) سنة قاطعنا (اللحمة) وهي التي قاطعتنا قبل (30) سنة .
إحنا وأولاد حلتنا وصلنا لقناعة إنو في حالة المقاطعة وفي حالة عدم المقاطعة نحن اللحم ده ناكلو في الجنة بس .
في الجنة يا مولانا في الجنة .
كسرة :
مما قمنا عرفنا إنو عناصر الجمال (3) هي : الخضرة والماء والوجه الحسن .
وسقط البشير وعرفنا إنو عناصر الحكومة المدنية (3) هي : (الطول والعلا والوجه النضر) .
إنتهى عهد (الثوب الأبيض والكارينا الليمونية) … والله يقطع سنين (الشبكة طاشة تعال بكرة) .
كسرة ونص :
عندما كانت الدنيا بخيرها كان (الذباب) ينام عند السادسة مساء .
أكتر حاجة كانت (عاجباني) في الذباب هي حرصه علي مواعيد نومو .
كنت معجب بالحاجة دي عند الذباب .
وطبعا أي زول حر في (اعجاباتو) .
الآن أنا حزين .. حزين ما عشان الذباب بقى يساهر لحدي عشرة مساء بل حزين عشان الذباب علم الباعوض حوامة النهار وقلة الأدب .
كسرة ونص وخمسة :
ليس هنالك حالة تسول وشحدة أكبر واوضح من تلك التي مارسها التجاني حاج موسى عبر حنجرة كمال ترباس عندما قال : (وحاول لو قدرت كمان تقدر رقة الحابيك) .
والله يا التجاني هو من وصل معاك مرحلة (يحاول دي) المفروض (ترمي طوبتو) .
كسرتين إلا ربع :
في عز انشغال الناس بالثورة بلغ سعر (كأس الزبادي) 45 جنيه .
الزبادي الكبير (45) والزبادي الصغير (22) ، علما بأن الكبير والصغير كلاهما ما بسد الجوع .
نحن ننصح الأخ أسامة داؤد بأن يبيع هذه الزبادي في الصيدليات وليس البقالات .
ربما يكون هذا الزبادي (دواء وعلاج) من الأمراض الكبيرة .
هو أنت يا أسامة قايل الزبادي ده شنو ؟
الزبادي في الحقيقة هو (لبن بايظ) ، أو هو (لبن معفن) ، أو بالأصح (لبن واتقطع) .
لبن معفن وأسم الدلع (زبادي) .
وغايتو جنس غايتو .
و….و….
ويا أستاذة : العدس ظهر في مشيتك بعد مقاطعة اللحم .
و…..و….
و….
ومن جديد جيت تاني تكسر صمتي بي …….(مسكول الليل) .
تحياتي … محمد الطيب الأمين

قد يعجبك أيضا

اترك رد

لن يتم نشر عنوان بريدك الإلكتروني.

يستخدم هذا الموقع ملفات تعريف الارتباط لتحسين تجربتك. سنفترض أنك موافق على ذلك ، ولكن يمكنك إلغاء الاشتراك إذا كنت ترغب في ذلك. قبولقراءة المزيد