مسكوا (الكراسي) وفكوا (شيبولا)

3
1625

وان طال السفر

محمد عبد الماجد

  • نحن أصلاً (قلة الأدب) ما بتنفع معانا…ما عندنا حاجة بتفوت ساكت.

  • بنمسك التجاوزات.

  • ووقت نبقى على الحساب ..ما بتنستروا.

  • عاوزين تنستروا بي علاءالدين يوسف.

  • بي صلاح نمر.

  • صلاح نمر دا قدام هلال كادوقلي ممكن يطلع أحسن زول.

  • قدام التريعة بتقطع.

  • نملة ما بتفوت منو أمام الأهلي مدني.

  • لكن وقت الموضوع يكون فيه (الهلال)…كلموه يشوف ليه بلد ساكت.

  • هو وأخوه علاء الدين يوسف.

  • انتوا عندكم صيوان عاوزين تركبوه؟!!!.

  • مالكم الحاصل عليكم شنو؟.

  • عندكم بكاء.

  • عندكم عزاء.

  • يمين صلاح نمر في دفاع المريخ متل (غفير المدرسة) البيظهر بعد جرس طابور الصباح ما يضرب.

  • يا نمر – والله ما في نمر بيعمل عمايلك دي.

  • وكان لي علاءالدين يوسف ..بنفتكر انو كان مع كاريكا من نجوم الهلال في المباراة.

  • كدا فييرا خلوه.

  • تعالوا شوفوا أبو لسان 120 سنتمتر.

  • قال شنو؟.

  • قال فرحانين عشان جمال الوالي دفع ليهم قروش وارغو.

  • هو جمال الوالي ما كان يدفعها وهو رئيس لنادي المريخ.

  • وارغو دا سجلو في المريخ (ديوان الزكاة).

  • تتخيلوا مزمل ابوالقاسم بقى يتكلم عن لجنة الاستئنافات.

  • مزمل زعلان من لجنة الاستئنافات.

  • انتوا عارفين لجنة الاستئنافات كان تعمل شنو؟.

  • لجنة الاستئنافات مفروض تخصم من الهلال 6 نقاط ..عشان الأهلي عطبرة اشتكى المريخ في باسكال.

  • هسع لجنة الاستئنافات ممكن تعملها.

  • لجنة الاستئنافات الليلة ممكن تتجمع وتقرر اعادة مباراة القمة.

  • عارفين ليه؟.

  • عشان القرار مفروض يصدر قبل المباراة.

  • ومزمل برضو زعلان من لجنة الاستئنافات.

  • أصلاً لجنة الاستئنافات خربت ليهم طبعهم.

  • لجنة الاستئنافات سبقت ان منحت المريخ بطولة يتقدم فيها الهلال على المريخ بـ (6) نقاط.

  • مزمل بتكلم عن لجنة الاستئنافات.

  • يا عالم.

  • يا ناس في زول يتكلم مع الزول دا.

  • زول يقعد معاه في الواطة.

  • هو قالوا ليكم نحن بننتظر قرار اللجنة يا مزمل.

  • بتلقاها عند الغافل.

  • استئنافات شنو؟.

  • يا زول نحن الحاجات (المكتبية) دي ما قاعدين نقتنع بيها.

  • شغل (الزبادي) دا ما بنفع معانا.

  • نحن ما عندنا صبر للكلام.

  • المكشن بلا بصل ..ما في زول برجاهو.

  • البنتظر ليكم قرار لجنة الاستئنافات منو؟.

  • نحن الناس ديل ما عندنا ثقة فيهم.

  • يمشي معتصم ..يجي شداد.

  • يفوت اسامة عطا المنان يظهر الفاتح باني.

  • كلهم عندنا واحد.

  • عشان كدا ..يوم الليلة الأحد قولوا  لناس لجنة الاستئنافات اكلوا (زلابيتكم) ساكت.

  • افتحوا (مراوحكم).

  • وشغلوا (مكيفاتكم) في البرد دا.

  • وانتظروا وزارة الداخلية ترد عليكم.

  • لكن شيبولا ما بنتظر ليكم الداخلية.

  • لا داخلية ولا خارجية.

  • معقولة نحن نقعد ننتظر الرد.

  • سحبوا الجنسية؟.

  • وسحبوها ليه؟.

  • ومتين؟.

  • ومن سحبها؟.

  • سموأل ما عندو صبر للحاجات دي.

  • لو شيبولا صبر ..سموأل ما بيصبر ليكم.

  • عاوزننا ننتظر (الداخلية).

  • بالله!!.

  • عشان يقعدوا يفكروا.

  • ويقوموا ويمشوا.

  • ويحكوا رأسهم.

  • ويفتشوا دفاترهم.

  • ويداغلوا شوية.

  • المرحوم مالو؟.

  • كان بيشكي من شنو؟.

  • ويقولوا لينا امشوا وتعالوا بكرة.

  • الشبكة طشت.

  • يكوّنوا ليهم لجنة.

  • اللجنة تنبثق منها 12 لجنة.

  • البترول ممكن يطلع في عطبرة.

  • والمطار الجديد يفتتحوه.

  • والأهلي مدني يرجع تاني للممتاز.

  • وفلسطين يحرروها.

  • والداخلية ما ترد ليكم.

  • عاوزننا ننتظر الحاجات دي كلها.

  • فالحين والله.

  • كلو حافظنو ليكم.

  • ترفعوا صوتكم.

  • تستفزوا الهلال.

  • تدخلوا المباراة ضامننها.

  • تعطلوا شكوة باسكال.

  • كلو …حافظنو ليكم.

  • تقولوا تسليم الكأس اليوم.

  • التكريمات اليوم.

  • بنكتشف ليكم خطتكم.

  • بنعرفكم بتعملوا في شنو؟.

  • تفلتاتكم.

  • تصريحاتكم.

  • كلامكم الكتير.

  • كلو.

  • كلو.

  • شايلنو ليكم لي هذا اليوم.

  • تفوزوا بالحكم.

  • محمد عبدالرحمن يجيب ليه 22 هدف ..فيهن 9 ضربات جزاء.

  • ولا بنسألكم.

  • وينو محمد عبدالرحمن؟.

  • وينو التش؟.

  • وينو بكري المدينة؟.

  • تعالوا لينا.

  • اطلعوا لينا برة.

  • يوم تجونا في (مقبرتنا)..بتشوفوا المكشن بلا بصل.

  • بتشوفوا حاجة.

  • انتوا لو عندكم رأس ..تمسكوا (الكراسي) وتفكوا في (شيبولا).

  • دا كلام عقل!!.

  • كراسي شنو البتثبت الهلال.

  • كسروا ليكم 12 كرسي.

  • 120 كرسي.

  • كسروا ليكم 1200 كرسي.

  • ما فارقة معانا.

  • فداء الهلال.

  • ناس باعوا كأسهم ..الكراسي شن طعمها؟.

  • شفتوا الهلال وقت لعب في جوهرته.

  • رجعت ليه الثقة.

  • والفريق قدر يقدم مباراة كبيرة.

  • هذا الاداء وتلك الخطة لو لعب بها الهلال في استاد الخرطوم كانت اتماصت ساكت.

  • كان راحت علينا.

  • لذلك فان أقوى قرار لمجلس ادارة نادي الهلال كان في ان تلعب المباراة في استاد الهلال.

  • هذا القرار منح الهلال الثقة.

  • وأكد للاعبي الهلال ان الجوهرة لا تساوي شيئا في سبيل انتصار الفريق.

  • وجماعتنا بتاعين (التش) ركزوا في (الكراسي).

  • انتوا لو عندكم رأس تفكوا (شيبولا) وتمسكوا (الكراسي).

  • اقول ليكم شيء.

  • ما عاوز أنسى ليكم وصية سمية الخشاب.

  • سمية الخشاب قالوا عندها (حلق) مفقود.

  • وبالمناسبة دي.

  • كركوع …زول في حلتنا شغال في (العدة)…ببدل العدة بالهدوم.

  • عايش كدا في أمان الله.

  • الموضوع دا لا جبت فيه سيرة لجمال الوالي.

  • ولا عصام الحاج.

  • ولا مزمل ابوالقاسم.

  • براكم انتوا عاوزين ليكم سبب.

  • العدة دخلها شنو؟.

  • تنططوا في (عيونكم) زي الستائر الجديدة.

  • كركوع شغال في (العدة) ..ما بتصاقع مع نسوان الحلة.

  • بغالط فيهن اليوم كلو.

  • 6 كبابي شاي بي جلابيتين وفستان وعراقي رجالي.

  • طقم الحلل بي بنطلون و4 قمصان رجالي وشوروت بتاع كورة.

  • الحلة الكبيرة بي توب ..طقة بي طقة.

  • 12 معلقة بي قميص واحد.

  • الكمشة بي لبسة أطفال.

  • صحن الطلس الكبير بي طرحة.

  • الجردل بي فانلة.

  • كركوع شغال بالنظام دا مع النسوان.

  • كركوع زول طموح.

  • وبفكر بعيد.

  • يوم داك لقيت كركوع حايم في العرضة جنوب.

  • قلت ليه يا زول مالك حايم جوار استاد المريخ.

  • عاوز شنو؟.

  • انت ما عندك رأس.

  • كركوع قال لي (كأس المريخ الذهبي بتاع السد) بجيب ليه 7 جلابيات رجالي و9 قمصان و4 بنطلونات.

  • ثم رفع كركوع رأسو في السماء – (صنقع يعني) وقال لي والله فوق الحاجات دي (شُراب) ما بزيدو.

  • قلت ليكم كركوع طبعو كعب.

  • ومن سمع بي ناس المريخ باعو كأسهم في مصر، الكلام ما عجبو.

  • كركوع قال وقت عاوزين يبيعوه ما كان يبيعوه لي..بدل ما يمرقو ليه في مصر.

  • …………………

  • ملحوظة: الهلال اشترى كأس الممتاز.. والمريخ باع الكأس.

هوامش

  • التفكير الآن يجب ان يكون في بطولة الكأس.

  • كأس السودان يجي.

  • زي ما جمعنا الدوري والكأس في الموسم السابق.

  • عاوزين نجمع هذا الموسم بين الدوري والكأس.

  • مباراة هلال الأبيض بكرة يجب ان تكون مباراة لرد الاعتبار أمام هلال الابيض.

  • هلال الابيض هذا الموسم قابل الهلال وفتح بحري للمريخ.

  • هنا وهناك.

  • انتصار الهلال أمس على المريخ وفوز الأزرق بالممتاز لا يعني ان الهلال يتراجع عن خطته في التسجيلات.

  • الهلال يحتاج لسبعة او تمانية عناصر وطنية.

  • هذا الموسم وجد الهلال مشقة كبيرة.

  • وتعرض الهلال لظلم كبير.

  • ووجد المريخ دعماً وسنداً كبيراً من الحكام.

  • ومن لجنة الاستئنافات التى انتظرت الى ان اتضحت الصورة ثم أعلنوا عن اجتماعهم.

  • التركيز في كأس السودان.

  • وفي التسجيلات.

  • على مجلس الهلال ان يفعل أي شيء من أجل ان يظفر باللاعب والي الدين خضر.

  • الجوهرة قبل الافتتاح محتاجة لبوغبا.

  • بوغبا وشيوب ونزار وبشة.

  • حكم المباراة الطريفي الصديق أمس تحامل على الهلال.

  • ولو لم ينتصر الهلال كان ذلك سوف يظهر بصورة اكبر.

  • الحمدلله ان الهلال انتصر.

  • وقدم عرضاً رائعاً وجميلاً.

  • وهدفين ..وليس هدف واحد.

  • امس المباراة كلها كنت بفتش عن الغربال.

  • والتش ما شفتو إلا بين الشوطين.

  • السماني الصاوي غادر بعد الشوط الاول.

  • وكان لي بكري المدينة تماها (جلحات).

  • الهلال عندما يفوز بفوز بدون مساعدة من الحكام.

  • لا شق.

  • ولا طق.

  • اذا نجح الهلال في ضم محمد المعتصم مدافع الاهلي عطبرة ومدافع الخرطوم الوطني حمزة داوود …لن يكون هناك مشكلة في دفاع الهلال في الموسم القادم.

  • كذلك ضم حسين افول لا يعني التفريط في مؤيد عابدين لاعب الامل.

  • مؤيد عابدين لاعب يحتاجه الهلال.

  • درمة أعلن عن ضربة جزاء واضحة ارتكبها جمال سالم مع كاريكا وكان يستحق عليها جمال سالم الطرد.

  • دي غير الفرص التي أضاعها الهلال وكان يمكن ان تصل النتيجة الى 6 أهداف كما قال رئيس الهلال في قناة الهلال.

  • رئيس الهلال أعلن عن 50 مليون جنيه لكل لاعب بعد الفوز أمس على المريخ.

  • واعتقد ان مجلس الهلال عليه ان يعلن عن نفس الحافز لو الهلال فاز بكأس السودان.

  • تتخيلوا ان الشركة الراعية قدمت للهلال بطل المنافسة 100 مليون.

  • يعني حافز لاعبين.

  • رئيس الهلال سوف يدفع 50 مليون جنيه لـ 18 لاعب في الهلال.

  • وربما للكشف كله.

  • وشركة سوداني قدمت للبطل 100 مليون جنيه.

  • يا ناس المريخ كأس السودان دا ما لعب.

  • وما عندكم فيه طريقة.

  • بعتوا كأس السد ..كمان عاوزين تبيعوا لينا كأس السودان.

  • أوعكم.

  • كلام زي دا ما بنفع معانا.

  • بكرة احتفالية خاصة لجمهور الهلال والهلال يستقبل هلال الابيض.

  • ببقينا على الكأس.

  • وما عاوزين تفريط.

  • لا في الكأس.

  • ولا في نجوم التسجيلات.

  • فرحة كبيرة لجمهور الهلال ببطولة الممتاز هذا الموسم.

  • يمكن عشان الهلال تعرض لظلم.

  • ووجد مشقة كبيرة في بطولة 2017.

  • الحمدلله.

  • بكرة ان شاءالله نلتقي في (من الغلاف للغلاف).

  • والفرحة متواصلة.

  • ……….

  • عاجل : نحن ما قايلين الجوهرة معذباكم كدا.

 

 

 

 

حمل تطبيق كورة سودانية لتصفح أسرع وأسهل

 لزوارنا من السودان متجر موبايل1

http://www.1mobile.com/net.koorasudan.app-2451076.html

3,699 حملو التطبيق

لزوارنا من جميع انحاء العالم من متجر قوقل

https://play.google.com/store/apps/details?id=net.koorasudan.app

13230 حملو التطبيق

على متجر   mobogenie

 http://www.mobogenie.com/download-net.koorasudan.app-3573651.html

5000+ حملوا التطبيق

المشاركة

3 تعليقات

  1. نفس أسلوب الفاشل/ شوربجي في الكتابة الفارغة الشتراء والسطور المتباعدة
    أنت محتاج لدورة تدريبيّة في نهج هذا النوع من الكتابة…. ننصحك بالكاتب سلك

أكتب رد

أدخل تعليقك من فضلك!
أدخل إسمك هنا من فضلك