بابكر سلك
*ثورتنا دي المافي زول بقدرها
*كان ليها كتير من المشاهد في الشارع
*بعضها يخليك ترفع راسك للسماء فخورا ومتفاخرا وشاكرا لله الذي وهب القوة
*وبعضها يخليك ترفع الاكف ترنو للسماء شاكيا
*وبعضها مواقف لطيفة وظريفة
*وبعضها مشاهد مؤلمة جدا
*والخلاصة ان انتصرت الثورة
*لو في اي خرخرة مستعدين نلغيها ونبدا ثورة جديدة
*من مشاهد شارع الثورة العجبتني
*ذلك الفيديو الكان متداول علي وسائل التواصل
*واحد من الكجر بهدد
*وثائر يتوعد بنجاح الثورة
*والكجرابي يصر علي فشل الثورة
*والثورجي يقسم بالذي وحاجات تانية ان الثورة ناجحه جوه عين الكجر
*كان حوارا تحت وطاة الرصاص
*ولكن احساس الخلاص انتصر
*شارع الثورة كان ملئ بالمشاهد التي يجب علينا الاحتفاظ بها في ذاكرة الوطن
*سنعود لها باذن الله تفصيلا جميلا
*ولكن
*ابداعات الثورة لاتقل روعة عن مشاهد شارع الثورة
*ويجب علينا حفظها للدنيا والزمان
*اسي ابداعات دسيس دي مابتستحق الارشفة؟؟؟
*ومن ابداعات الثورة ماخطه يراع اخي الحبيب اكرم زكي الذي قال
نشيد العلم
انا ما سياسي
ولا مصنف دبلوماسي
ولا حتى ف فريق الحلة
كنت يوم لاعب أساسي
أنا بس بحبك يا وطن
منذ الولادة وانبعاثي
بس بحبك دون تحيز وأنحيازي
لكل الوان العلم وكل لون منك أساسي
ياعلم أنت رجائي
وطني أرضي و تراثي
لونك الأحمر دماهم ماني ناسي
وعد الشهدا والحرية حق شامخ و راسي
لونك الأبيض سلام …
نوم هني يريح نعاسي
لونك الأسود عدالة
والسواد أهلي وناسي
ونحن متساوين أمامك
لو تحاسب أو تجازي
لونك الأخضر ده وعدنا
إنو تعمر ما تقاسي
تتلو موكبك الأمم
وانت مرفوع النواصي
طعمك الطمن أنين الجوع والخوف والمآسي
ريحتك العبت شراع مستقبلا فات المراسي
دينك الإيمان معاني
لا مفاسد لا مخازي
ولحنك الطمبور يسالم
في الصباحات والأماسي
دقة المردوم بتظبط لى مسيرنا زمن قياسي
نسمو نحن وبى سمحنا على المعاصي
ياللا مشوارنا ابتديناه
والكفاءات في الكراسي
واصلي ابدا ما سياسي . .
بس متيم بيك فاقبل إلتماسي
أكرم محمد زكي
*سوداني بسيط ولكنه فنان جميل
*انا صديق للشلة
*فاكرم شلة لا فرد
*اكرم اخ
*اكرم شاعر
*خصص كتاباته للوطن
*اكرم ملحن
*ادهش الناس بالحان تمس الوجدان فخرا
*اكرم مغني يداعب الاحساس دغدغة
*اكرم عازف يدغدغ الحنايا
*واكرم خطاط يكتب كأنه يرسم
*واكرم رسام يرسم كانه يكتب فتخاطبك رسوماته
*ولن انسي اكرم الانسان
*ومن مشاهد شارع الثورة النبيلة
*لو عندك خت لو ماعندك شيل
*تقول لي تكافل
*التكافل احساس لامؤسسات هلامية ياناس
*التكافل قناعة بسودانويتنا
*ومن مشاهد شارع الثورة الرائدة
*تلقي في الموكب تمنيني وطفل بتعلم في الكلام
*حلاتو لما يهتف
*التلقه ماتتل بتل ستات الزول
*وحلاة الامو شايلاهو في كتفها وهو شايل علم السودان
*نسي حلاوة حربه ونسي البلونه وشارك في الثورة
*دي ماثورة دي
*ده درس انساني لشعوب العالم
*لما نهتف
*العالم كلو بيسمع
*وتردد اوروبا تسقط بس
*وتخلع امريكا الجنوبية القبعات خلعة خلعن خلعا
*مشاهد شارع الثورة دايرة رجعة ومراجعة
*المهم
*اخبار المريخ زي اخبار الزول السافر اوروبا بالسمبك
*لامعروف غرق
*ولامعروف شواطئ اوروبا حازما وملازما
*لكن مريخيتنا تجعلنا نردد
*نو نيوز قوود نيوز
*والهلا ماشي رواندا
*كان دايرين نصيحتي العبوا الكورتين هناك يامحمد عبدالماجد
*ايها الناس
*ان تنصروا الله ينصركم
*اها
*نجي لي شمارات والي الخرتوم
*كان شفت يا والينا
*عمود الاستاذ الطيب مصطفي لما ليهو قرينا
*استغربنا يا والينا
*هي الاعراف السودانية دي يادوبك قرروها علينا؟؟؟
سلك كهربا
ننساك كيف والكلب قال بيوت الاشباح والصالح العام ومكاتب الامن وغابات كافوري وفنادق ماليزيا علاقتها شنو بالاعراف والاخلاق الانسانية خليها السودانية
والي لقاء
سلك
