معلومات خطيرة وكارثية عن أسود حديقة القرشي !!

0
162

بالعربي الكسيح

محمد الطيب الأمين

معلومات خطيرة وكارثية عن أسود حديقة القرشي !!

* وجدت صور (أسود حديقة القرشي) اهتماماً لم يجده كل فقراء بلادي الذين ماتت آخر طموحاتهم عند بوابة ديوان الزكاة .
* وآخرون ماتوا قبل أن يصلوا ديوان الزكاة .
* مجموعة أسود لم تأكل من زمن طويل، ظهرت في الصور وهي شبه ميتة لا تقوى على الوقفة والحركة .
* وقد تدافع مجموعة من الشباب لدعم هذه الأسود باللحوم كما تبرَّع رئيس نادي الهلال الكاردينال بثلاثة خرفان يومياً تقدم لهذه الأسود المسكينة .
* ولأن الصحافة تبحث دوماً عن الحقيقة كان لابد لنا أن نصل لهذه الأسود ونحاورها (افتراضاً) لنرى ما يجوش بدواخلهم .
* (افتراضاً) ذهبنا حديقة القرشي وأجرينا حواراً مع (الأسد الجائع) وقد سجل إفادات خطيرة تنشر لأول مرة من خلال هذا الحوار .
* مرحباً بيك يا ملك الغابة؟
حبابكم ناس صحيفة (قوون) وأنا سعيد بهذه الاستضافة .
* أحكي لنا الحاصل شنو بالضبط يا ملك الغابة؟
أولاً أنا لم أعد ملكاً للغابة .
* كيف الكلام ده؟
أنا ما ملك غابة لأنو ما في ملك غابة بقعد قعدتي السوداء دي، ما في ملك غابة بيكون مادة دسمة في مواقع التواصل الخاصة بكم .
* نفهم إنك زعلان من تناول الإعلام الحديث لحالتك الصحية أنت وأخوانك؟
لا بالعكس ما زعلان لكن بقول فعلاً (هانت الزلابية) .
* كده خليك من الزلابية .. أنت أصلاً من وين؟
أنا من غابة الشواطئ بجنوب أفريقيا وهي من أكبر الغابات في العالم .
* طيب الجابك هنا شنو؟
قبضوني قبل (7) سنوات، ومعاي شقيقي الأصغر ده وهو الآن في وضع صحي حرج .
* ولكن يا ملك الغابة أنتو الآن خمسة أسود؟
أيوة خمسة أنا وأخوي من جنوب أفريقيا ومعانا (لبوتين) من مدغشقر وعندك الأسد داك قالوا من جنوب السودان .
* أنت متزوج يعني ؟
أيوة متزوج والمدام حامل في الشهور الأولى .
* جيت من جنوب أفريقيا متزوج؟
في جنوب أفريقيا عندي زوجة ولكن لما قبضونا لم تكن معنا .
* اتزوجت هنا يعني؟
نعم، تزوجت داخل هذا القفص واللبوة ديك زوجتي .
* طيب واللبوة التانية دي زوجة أخوك؟
لا دي زوجة الأسد الجنوب سوداني .
* يعني هسه زوجتك حامل؟
نعم.
* أحكي لي الحاصل شنو بالضبط ؟
الحاصل يا سيدي نحن كنا كويسين بناكل تلاتة وجبات في اليوم والأكل كان على مستوى عالٍ .
قاطعته … معليش كيف أكل على مستوى عالٍ؟
كانوا بجيبوا ليك كلاب وكدايس في الفطور والغداء في الغالب حمير وغنم والعشاء فراخ .
* فراخ عديل؟
أيوة الفراخ ثابت في العشاء .
* أها وبعد داك؟
بعد شويتين بقت (وجبتين) .
ليه؟
ليه دي إلا تسأل ناس الحياة البرية ومدير الحديقة .
* ماشي .. أها وجبتين برضو كويس؟
أيوة لكن بعد شوية بقت وجبة واحدة بجيبوها لينا زي الساعة تلاتة كده .
نفس الأصناف ولا اتغيَّرت؟
طبعاً اتغيَّرت .
اتغيَّرت بشنو؟
آخر مرة جابوا لينا فاصوليا ومنها دخلنا في إضراب .
* طيب أنتو جوه الحديقة حسيتوا بالثورة؟ وهل تدهور صحتكم عندو علاقة بالحرية والتغيير؟
أيوه نعم حسينا بالثورة والبمبان كان بجينا جوه هنا والحقيقة (لبوتي) تعبت جداً لأنو عندها مبادئ أزمة .
* سؤالي ما زال قائماً .. هل بعد الثورة أنتو عانيتو؟
لا بالعكس الناس واقفة معانا لكن الدولة العميقة هي الشالت حصتنا من الأكل .
* يعني ده شغل مخطط ليهو؟
بالضبط كده.
بتتهم عبد الحي يوسف مش؟
لا، أنا ما بحدد زول معيَّن .
* طيب شايف الكاردينال اتبرع ليكم بتلاتة خرفان يومياً؟
أيوه، الراجل كتر خيرو جاب لينا تلاتة خرفان الصباح ومشى العصر دفع للاعبين المرتبات والحوافز وبالليل سافر لندن .
* طيب سافر دي مشكلة بالنسبة ليكم ولندن بعيدة والشبكة مرات بتكون ما تمام؟
تقصد شنو يا أستاذ .
* قصدي إنو الكاردينال سافر لندن ووارد جداً الخرفان تقيف لأنو قبل كده كنا دايرين نسجل التش قام الكاردينال سافر وتلفونو مشفر فذهب التش للمريخ .. المهم خليك من الكلام ده يا الأسد، هل أنتو مبسوطين من تفاعل الناس؟
الناس ما قصرت لكن نحن راحتنا في الغابة فكونا بس .
* هنا الناس ما بتقصر معاكم يا أسد وأهو اللحوم بتصلكم تاني دايرين شنو؟
شوف يا أخوي أنتو في السودان شكلكم ما سمعتو بمقولة (الأسد ما بياكل الميتة)، لو دايرين تريحونا فكونا، نحن ما قاعدين في مستشفى عشان تجيبوا لينا أكل وسندوتشات.
* شكلك أنت أسد جاحد بس والله؟
ليه يا أستاذ.
* هل أنت عارف إنو بلدنا دي فيها حوالي (20) ألف طفل موزعين في معسكرات النازحين؟
لا لا ما عارف .
* طيب هل عارف إنو في (ألف تلميذ) في بلدنا دي بمشوا المدارس بدون (حق الفطور)؟
لا لا ما عارف.
* طيب هل سمعت بالفنان القامة أبو عبيدة حسن الذي لا يملك ثمن (قطرة العيون)؟
لا ما سمعت.
* هل سمعت بالأسر المتعففة الما عندها حق العلاج؟
لا ما سمعت .
* نحن يا أسد شعب بحب (الحركات) شفنا صورتك وجيناك باللحوم مع إنو نصف أطفال السودان لسه ما ضاقوا طعم اللحمة؟
كتر خيركم .
* طيب ما مشكلة .. سمعت بتغريدت ترامب؟
أيوه، ترامب ما قصر برضو ومنتظرين تغريدة من أوردوغان .
* هل من مناشدة للشعب السوداني؟
بقول ليهم بطلوا عباطة وادعموا أطفاكم وادعموا الأسرة المتعففة فهي محتاجة ليكم أكتر مننا وفي النهاية نحن أسود والأسد ما بأكل الميتة .
* طيب سؤال أخير؟
اتفضل
* ما عندك فكرة الفضى الاعتصام منو؟
ومات الأسد قبل الإجابة على السؤال ده بالذات.
* و..و..
* والله في.

ترك الرد

من فضلك ادخل تعليقك
من فضلك ادخل اسمك هنا