هلال الديمقراطية.. ومريخ (اللجان التسيرية)..!!

كرات عكسية
محمد كامل سعيد
هلال الديمقراطية.. ومريخ (اللجان التسيرية)..!!
# أهلنا في السودان لما يقنعوا من زول.. ويفقدوا فيهو الأمل.. بيقولوا عليهو: (الزول ده قلبو مااات)..!!
# يعني الزول (القلبو مااات) بقي ما بتفرق معاهو اي حاجة..!!
# ممكن نقول عليهو (ااي الزول القلب مااات) انو (دخل الضل)..!!
# وطالما (دخل الضل) ف ح يستقر فيهو (الضل طبعا).. وبالتالي يبقى مافي حاجة ح تكون فارقة معاهو نهائي..!!
# حملت لنا الاخبار فوز مجموعة السوباط في انتخابات الهلال الأخيرة.. وبالتالي ح تقود النادي لأربع سنوات قادمة بكل الشرعية..!!
# في الجانب الآخر.. نتابع ما يمر به نادي المريخ منذ سنوات عديدة.. والمتمثل في ابتعاده عن الشئ الغريب المسمى (بالديمقراطية)..!!
# (الديمقراطية).. صارت للاسف عبارة عن كلمة (شاذة)، تظهر في سماء النادي الأكثر تتويجا بالبطولات الإقليمية والقارية.. والسجلات تشهد بذلك..!!
# يعني المريخابي (آخر الزمن)، ممكن يتكلم معاك في كل حاجة.. ويناقشك بكل عقل متفتح في جميع المواضيع..
# لكن اول ما تعرج بالكلام، وتجيب ليهو سيرة (الديمقراطية).. طوالي يعمل ليك رايح..!!
# وممكن يشوفك خمسة خمسة.. كلو شئ ولا تجيب ليهو سيرة (الديمقراطية) دي..!!
# الهلال يمارس الديمقراطيَة طوال السنوات الماضية.. (حتي ولو كانت مشوهة).. وحال انك تقوم (تنطس في نظرك) وتجيب لاي مربخابي سيرتها.. يقول عليك (مترصد وحاقد)..!!
# ااي والله.. القصة وصلت للدرجة دي.. عادي جدا جدا يا حبيب..!!
# مريخ آخر الزمان، اسهل حاجة فيهو توزيع الاتهامات.. واشهرها اتهامك بانك (هلالابي مندس. او مكروه)..!!
# والقصة ممكن تصل إلى أن ينزعوا منك (مالكوا صحوك الانتماء) صفة انك مريخي.. خاصة بعد ما تصبح في نظرهم غير مؤهل للحديث عن المريخ..!!
# المشكلة هنا صدقوني ما في المشجع المسكين.. المشكلة في (المشجعين اللي صوروا ليه) ان الصحفي لابد أن يكون في المقام الأول مدافعا عن النادي الذي يشجعه بالحق والباطل..!!
# السبت اكتملت الجمعية العمومية لنادي الهلال.. فبالتالي وباعتبار انك ككاتب او (مشجع مريخابي) لازم تعترض، وتسخر من جمعية الهلال، وتصفها بما ليس فيها..!!
# وحبذا لو انتقدتها.. وقلت انها جمعية فاشلة، وما فيها ميزانية.. كما أن الأعضاء المشاركين فيها عبارة عن عضوية مستجلبة، جابوهم بالقروش..!!
# تهاجم انتخابات الهلال، وتبخس منها.. يبقى انت كفاءة.. وبالتالي تكون جدير باحترام السواد الاعظم من المريخاب، الذين لا يقرأون الا للشخص (اللي بيطبطب عليهم)..!!
# حتى ولو بالكذب.. فما عليك إلا ان (تتبتب وتطبطب عليهم).. وتستوهم وتقول كلام يرضيهم وخلاص..!!
# اوعك لما تشوف حاجة صاح في الهلال، وتلك الحاجة ولا وجود لها في المريخ، اياك ثم اياك ان تتناولها بالحياد المطلوب.. او تنظر إليها من زاوية الصحفي المحايد..!!
# حياد ما عندنا.. فقط عليك ان تضع الحياد على جنبة.. وَتلبس فورا (نظارة التعصب) التي تصور لك الأشياء بطريقة بعيدة عن المنطق، ولا علاقة لها بالواقع..!!
# عشان تلقى الرضاء.. لازم (ترش) اي حاجة هلالابية.. ولو كمان جات سيرة (اللجان التسيرية).. ما عليك الا ان تؤيدها.. وتهاجم الديمقراطية الهلالية.. وكمان لازم تنتقد.. وياحبذا لو سخرت من الجمعية.. او أن شرعت في وصفها باللعبة او الوهمة او الكذبة..!!
*كلمات ساخنة جدا:*
# الحقيقة ان جل مريخاب (آخر الزمن)، صاروا لا يعرفون غير التعامل بالعصبية والتعصب.. تعصب وبس.. اساءات توجهها للهلال.. تبقى انت عال العال..!!
# تنحاز وتدعم اللجان التسيرية الحالية.. يبقى انت مريخابي لا يشق لك غيار..!!
# (غبار وكتاحة ومطر) على الهلالاب.. ذلك بعد صارت الرياضة وكرة القدم منبعا للبغضاء والكراهية.. وتفشى في محيطها الغل..!!
# لقد وصلت درجة الفرقة والشات والكراهية بين بعض المريخاب والهلالاب، الي مرحلة متاخرة جدا جدا..!!
# بجانب كل ذلك، لقد اصبح الحقد والسعي لممارسة الانتقام، من الثوابت الأساسية المتاصلة في السواد الاعظم من بين مشجعي الفريقين..!!
# (بعض الشواذ) في الصحافة المريخية والهلالية.. هم الذين اوصلوا الأمور إلى هذه المرحلة المتأخرة.. وحولوا بعض مشجعي الفريقين الي مجموعة من (القطيع).. الذين يسيرون بلا فهم ولا دراية..!!
# الكرة في كل العالم تقرب بين الناس.. وتساعد على توسيع دائرة العلاقات بين المشجعين.. الا في السودان فأنها تساعد على الفرقة والشتات..!!
# الحقيقة التي لا مفر منها، ان ديمقراطية الهلال الحالية، (بالتشوهات التي نراها)، تظل أفضل مليون مرة من اللجان التسيرية المريخية..!!
# وتظل محاولات الهلالاب، وسعيهم لانتخاب مجلس لقيادة النادي كل أربعة أعوام هي (العلامة الفارقة)..!!
# (العلامة الفارقة) والتي تجعل كل المحاولات والاستماتة والتمترس خلف وهمة ان اللجان التسيرية هي الأفضل، يظل عبارة عن محاولات (فارغة)..!!
# لا مقارنة بين ديمقراطية الهلال، ولجان المريخ التسيرية.. (رضي من رضي.. وابي من ابي)..!!
# الديمقراطية تظل هي الكفة الأرجح والأكثر شياكة.. والفعل الحضاري الامثل، بجانب رابطها الأساسي مع الشرعية..!!
# فعلا: قلبنا مااات.. ودخلنا الضل..!!
# سنتابع احتفالات الهلالاب.. وفي القلب حسرة..!!
# لو فاتك الميري.. (….) اها ده ياهو زاااتو الحاصل لينا منذ سنوات..!!
# القليل جدا من المريخاب هم (اللي عارفين المطرة صابة وين)..!!
# يا مطيرة.. صبي لينا.. في عينينا.. (دي مطرة والا قطرة)..؟!
# الليلة التخريمات برضو اجازة.. (عيونا صابة فيها المطرة)..!!
# الراجل الجد.. بيحب الجد.. وكمان (الراجل السهل.. بيحب السهل)..!!