هو قضاء وقدر أصلو ؟

0
224

في السلك

بابكر سلك

هو قضاء وقدر أصلو ؟

 

*شنيق فؤل مذراخة النوي
*والططس فيه نخبة وذيرال
*تخفو النوافس والنوافيس مزرال
*يا شباخ مقيا ايا الندقي ياكعبرال
*افتكر الكلام ده واضح
*ما محتاج شرح
*وببساطة هذا ما يحدث في مسألة تعيين رئيس القضاء والنائب العام
*فالططس فيه واضح جداً
*ولا أدل عليه من ذكر النوافيس
*ايها الناس
*نريد، بل نصر على اختيار رئيس للقضاء يحقق عدالة الثورة التي جاءت بالشعار (حرية سلام وعدالة)
*والعدالة تعني انصاف الناس واعادة الحقوق المسلوبة والمنهوبة والاموال المضروبة لاصحابها
*فيا شباخ مقيا
*القصة دي ما دايرة درس عصر
*فان كنا نريد قضاء يكمل اركان الثورة
*الموضوع ما بستحق خلاف واختلاف
*اما ان كان مسعى بعضنا يهدف لقضاء وقدر
*انت وحظك وثقلك وثقالتك
*يبقى شنيخ الفؤل فعلا مذراخه النوي
*لكن ثورتنا ما بتموت ابداً
*بل ستكشف المواقف اصحاب الططس والنوافيس
*ووقتها ببقى الحساب صعب في عهد رئيس قضاء الثورة محقق العدالة التي سطرت اسمها كمكون ثالث على لافتة الشعار حرية سلام وعدالة
*انتوا قايلنوا هو قضاء وقدر اصلو؟؟؟
*ايها الناس
*من اعمق مظاهر فساد الدولة العميقة
*هو الصيد العشوائي لطيورنا وحيواناتنا البرية
*يدوك تصديق باتنين غزال ضكور
*تكتل ليك تلتمية بينهم اناث وصغار
*وتسخلهم
*وتجي مارق بيهم علناً
*وكذا الطيور
*الامر الذي يؤدي لفقداننا لثروتنا البرية ببساطة
*ولعلنا جميعاً قد شاهدنا صور وفيديوهات لابادات جماعية لحيواناتنا البرية وطيورنا بصورة مستفزة جداً
*وده كلو بطلع بتصريح من حيوان وغض طرف من حيوان آخر وقبول الرشوة من حيوان تالت
*ابادة الحيوانات التلاتة ديل افيد للبلد لأنها توقف عمليات ابادة طيورنا وحيواناتنا البرية
*يا حكومة حمدوك اتدخلي سريع
*فالعقالات الحايمة في بلدنا داخل سيارات الدفع الرباعي تبيد في ثرواتنا لمجرد الترفيه
*المهم *مراجعة ملفات الدولة تستلزم قبل كل شي مراجعة الارقام الوطنية والجوازات
*البحر ما بيابا الزيادة
*لكن كمان الزيادة البتبقى فيضان يضر بالناس ما حبابا
*السوداني الاصلي ياعمك يموت موت عشان ياخد رقم ينتسب به للوطن ويستمتع فيه بجنسيته
*والاجنبي جوازو السوداني بجيهو دلفري
*والغريبة ناس الكورة وبدعة التجنيس التي ابتدعوها للخروج من قيود الاتحاد حول اللاعب الاجنبي المحترف ومنع التغول على الخانات الوطنية *ياخ لعيبة كورة بس
*عندنا مليون الاربع جواز شالوهوا معاهم
*اها
*نجي للكورة
*هي وينا الكورة
*كورتنا دقست ونفست مما سلمت المنفاخ لامانة شباب الدولة العمية
*بقت تنط فوق لاعبنا ينزل تحت
*تنزل تحت لاعبنا ينط فوق
*وبالمناسبة دي عجبتني نكتة بريمة
*لما قالوا المنتخب كان ماخد خمسة والنقر خاتمو وقع في الميدان
*النقر وبعض اللاعبين مشوا يفتشوا الخاتم
*كان بكوسوا جوه خط طمنطاشر
*بريمة قال ليهم تعالوا فتشوا في النص هنا انتوا متين دخلتوا خط طمنطاشر
*واللـه يصلح حالنا في عهد البوشي
*واقول ليك يا البوشي يا اختي
*اختي المستشارين وتذكري ان للرياضة مناشط كتيييرة ولجنة اولمبية تشبه امانة الشباب تلك
*ايها الناس
*ان تنصروا اللـه ينصركم
*اها
*نجي لي شمارات والي الخرتوم
*والينا
*لقيتوا مفقودينا
*ولا فص ملح وداب علينا؟
سلك كهربا
ننساك كيف والكلب قال سيد الرايحة بفتش خشم البقرة واولادنا كان راحو البقرة تستعد
والي لقاء
سلك

المشاركة

أكتب رد

أدخل تعليقك من فضلك!
أدخل إسمك هنا من فضلك