صحيفة كورة سودانية الإلكترونية

والله ما ساهلة

26

في السلك

بابكر سلك
والله ما ساهلة

*ياناس كورة النجم ماساهلة
*والله العظيم ماساهلة
*ونحنا ذاتنا ماهينين
*لكن موقف النجم افضل من موقفنا
*التعادل يكفيه
*ولما فريق بقامة النجم يكون مجرد التعادل يكفيه للتأهل
*بقفلها
*ويبيخها
*ويكتلها
*التسعين دقيقة ممكن يختصرها في عشرين دقيقة لعب
*والسبعين تروح باصات لي ورا
*وادعاء الاصابة
*ومحاولة اثارة اللاعبين والجمهور
*عشان كده القصة صعبة شديد
*النجم مازي ناس ناكانا والكرور المغمور
*النجم فريق عريق له من البطولات القارية ما اهله ليسطر اسمه علي لوح الشرف الافريقي
*النجم ماصفر
*النجم بي حقو
*لكن نحنا ذاتنا ماهينين
*نحنا ذاتنا سطرنا اسمنا علي لوح الشرف الافريقي
*ماحضنا الاصفار وقعدنا
*سجلنا اسمنا علي لوح الشرف واحد صحيح
*نحنا ذاتنا نهز ونرز
*بس لو ادينا المباراة دي حقها
*يجب ان لانضع النصر في جيبنا الورا
*يجب ان نعلم ان التأهل غاية يجب ان نعمل لها بجد وكد واجتهاد
*يجب ان نعد العدة
*هاهو قطاع الجماهير يقودنا في اجتماع مهول لوضع استراتيجية النصر المؤكد
*فشمس الوطن بقت شمسين
*انها ايام اشراق ووميض
*يجب ان نستغلها خير استغلال
*باستراتيجية ممنهجة
*وبعد نجضت حقو مانخليها للطير
*نسيطر علي شمسنا التي اشرقت وبقت نور
*نولعها نور طويل ونور قصير كيفما شئنا
*موش شمسنا
*وهاهي الجماهير الواعية قد بدأت الاعداد الجاد
*منتدي الصفوة العالمي يقود حملته الجماهيرية التعبوية بنجاح كبير
*اولاد قلبا اعدوا عتادهم كاملا وفي انتظار الدواس
*وياسلام علي رابطة الثورات المرابطة بالاستاد تبني وتعمر وتجير وتطلي وتلبي النداء
*وهاهو فريق التيفو يقوم بصيانة الكراسي ونظافة طابق شاخور
*الصفوة ٣ كراسيهم الليلة بتصل
*لتكمل حلة الاستاد وتزيد الالق
*خلية نحل جماهيرية ماشاء الله
*ولكن لم اسمع عن شفوت الولايات خبر
*خيركم ياشفوت المريخ القومي؟؟؟
*اذا ماجينا من كل ولاياتنا
*بكل سحناتنا وصفاتنا
*اذا لم تذب كل الجهويات والعرقيات والديانات والمعتقدات تحت راية المريخ
*يبقي مافي فايدة
*دايرنكم حضورا مشرقا مشرفا علي المدرجات
*دايرنكم اسودا تزأر
*ليصل زئيرها المغرب العربي كله والعشاء زاتو
*دايرين نخمج الدنيا العربية
*الصيف العربي
*والخريف العربي
*والشتاء العربي
*والربيع العربي
*والكاس العربي
*لازم لازم لازم
*ده كلو
*بدون حضور جماهيري كثيف لن يتحقق
*فالامنيات وحدها لاتحقق نجاح
*لازم ثورة جماهيرية علي المدرجات
*وكم هو جميل ان نشاهد جميع كتاب الاعمدة المريخية علي المدرجات يقودون التشجيع بقوة
*لك ان تتخيل
*اسماعيل حسن ومزمل ومعاوية الجاك وجعفر سليمان في المدرج الجنوبي
*وناصر بابكر وبابكر سلك ومامون ابو شيبة في المدرج الشمالي
*كابو وود الشريف وابوبكر عابدين وهيثم صديق في وسط المسطبة الشعبية
*حسن بشير و موسي (فتيل )وامير عوض وعمر بابكر ودكتور بابكر الشريف وعمر الجندي وشمس الدين الامين والتيجاني وكورينا
*ديل كلهم يتوزعوا علي طابق شاخور
*لازم الاعلام والاقلام يقودوا التشجيع من وسط الشفوت
*اما صديقي الفاضلابي فيحرم عليهو طابق شاخور
*وعلي المدرجات الشعبية نخصص له مدرجا كاملا
*انا واثق انو صديقي الفاضلابي بملاهو براهو
*بملاهو تشجيع وهتاف
*رأيكم شنو ياشفوت ويا حملة الاقلام؟؟؟
*يبقي
*نجي كلنا
*كورة النجم
*والله ماساهله
*ايها الناس
*نكته بتكونوا سمعتوها
*لكن عاجباني شديد
*كلو يوم اصحي من الصباح اقولها لي روحي واضحك
*قال ليك هلالابي ساق مرتو مجمع طبي فيهو عدد من الاخصائيين
*البت بتاعت الحجز في المجمع واحده بتشتغل لكل الاخصائيين
*صاحبنا جاب مرتو وجاها
*قال ليها دايرين نحجز
*قالت ليهو دايرين تقابلوا منو؟
*قال ليها دايرين نقابل قورماهيا
*ايها الناس
*ان تنصروا الله ينصركم
*اها
*نجي لي شمارات والي الخرتوم
*كان شفت ياوالينا
*السكر زاد
*البنزل الاستون شنو؟؟؟؟
سلك كهربا ننساك كيف والكلب قال هو السكر نزل متين؟؟؟
والي لقاء
سلك

قد يعجبك أيضا
اترك رد

لن يتم نشر عنوان بريدك الإلكتروني.

يستخدم هذا الموقع ملفات تعريف الارتباط لتحسين تجربتك. سنفترض أنك موافق على ذلك ، ولكن يمكنك إلغاء الاشتراك إذا كنت ترغب في ذلك. قبولقراءة المزيد