*الجمعة قربت
*يانجي ستين الف شفت
*يانروح في ستين الف داهية
*فمثل هكذا مراحل
*يسكن التأهل حناجر الجماهير
*وينطلق النصر منها
*ان جادت به
*تحقق المراد
*وان بخلت
*بياكلها الطير
*ايها الشفوت
*الجمهور زاتو لازم يستعد
*يجهز نفسو
*يشجع باستراتيجية
*يوزع لياقتو
*مايبهلها قبل الكورة
*وبعد ربع ساعة يقعد ساي
*دايرين جمهور شفت لمن غلط
*جمهور شرس لكن بتهذيب
*بمعني
*لانمارس الفوضي
*لانقذف الحجارة والقارورات علي الملعب
*ولكن نقود المباراة بشراسة واعية
*نشجع اولادنا بفهم اننا شاحن طاقتهم الوحيد ومصدرها
*نرهب الخصم لمن يتمني ان تنتهي المباراة وهو خاسر
*حتي التحكيم نقوده
*نستنكر الحالة قبل احتسابها من الحكم
*نعلن الفاول نحن
*ونحسب الاوف سايد نحن
*ونحدد اتجاه رمية التماس
*كل ذلك من حناجرنا
*فحانجرنا هي ريموت كنترول اللعبة كلها
*شكرا مقدما للشفوت الذين اعدوا انفسهم من بدري
*وهل تدري ان كواسر المريخ لو تم اعلان المباراة الآن لامانع لديهم
*لانهم جاهزين ليهم اسبوع
*والبقية تسابق الزمن كي تكمل جاهزيتها للمباراة
*انها مباراة جماهير قبل كل شئ
*لذا زي ماقال كمال ود النملة شفت شفوت كندا
*يانجي ستين الف شفت يا نروح في ستين الف داهية
*لذا
*النجار داير عروس
*وعلي وزنها
*الزعيم داير التأهل
*والتأهل عند اللاعبين
*واللاعبين دايرين وقود
*والوقود عند الشفوت
*والشفوت جايين طبعا
*وما النصر الا من عند الله
*ياربي تجيب لينا المطر ياربي تجيب لينا النصر
*ايها الناس
*غرفة الفار ادهشت اتحاد العرب
*فالحبيب بابكر عثمان قد قام بتصويرها علي مقطع فيديو وارسلها لاتحاد العرب
*اشادوا بها جميعا اشادة كبيرة
*وقالوا ماشفنا غرفة مخصصة للفار بهذه الروعة خلال تجوالنا العربي
*عقبال ماتشوفوا يوم الجمعه جمهور ماشفتوا مثلو خلال تجوالكم العربي
*وفريق ماشفتوا مثلو من بداية البطولة
*وتأهل مستحق للمريخ
*ايها الناس
*صدقوني
*كورة الجمعة دي هي مباراة البطولة
*لاننا لو وصلنا العين
*قطعا سنخلف كراعنا فوق للحاجب علي جبين العرب ولو قابلنا منتخب ابي لهب وتب زاتو
*وكي نصل لتلك المرحلة
*لابد من توفير ستين الف شفت
*ستين الف يشجعوا مايتفرجوا
*ستين الف هدفهم التأهل وقناعتهم ان النصر يقطن حلاقيمهم التي لاتبخل علي المريخ
*انا فرصة للمجد متاحه
*قد لاتلوح علي الافق المريخي قريبا
*لذا نستغلها
*نجعل التتويج هدفنا المنشود
*نضحي بكل شئ
*لاجل ان يسجل التاريخ علي صفحاته
*المريخ بطلا للعرب من ارض زايد
*نعم النجم ماساهل
*لكن نحنا ماهينين
*نحنا الهزازين والرزازين
*وطالما هي معركة شفوت
*مبروك مقدما يامريخ
*فوفود مقدمة شفوت الولايات قد وصلت
*وبص الضعين جاهز
*واعضاء سفارة جمهورية المريخ ببورتسودان اكملوا الاجراءات
*شفوت مدني
*شباب مدني
*كان ما اخاف الكضب
*بصهم في سوبا
*وناس شندي
*اهل جحا
*اولاد المكوك
*اسي في الجيلي
*مدد
*وفي انتظار شفوت بقية الولايات
*ادونا خبركم يجينا خيركم
*النجم لازم يشوف كونفدرالتو وين
*ويا سلام
*علي الجار
*ونفرة الجار
*وواجهة القلعة
*وكراسي الصفوة تلاتة
*وغرفة الفار
*ياسلااااااام
*علي امة المريخ
*شيبا وشبابا ورجال ونساء واطفال
*ياسلام علي امة تضع بصمتها مجتمعة علي جدران التاريخ في صفحة الانجاز لصالح المريخ
*وياسلااااااام
*علينا ونحنا ستين الف شفت
*شفت يسند شفت
*داخل القلعة نصنع النصر الكبير
*لنرقص علي صدر الواقع علي انغام النهائي
*طالما بي حقنا يبقي من حقنا
*انت وانا
*هو وهي وهم وكلنا
*ايها الناس
*ان تنصروا الله ينصركم
*اها
*نجي لي شمارات والي الخرتوم
*كان شفت ياوالينا
*مقرشين ومفلسين وده الطلق الحيرة فينا
*زمان بنقول ماشين نشتري يا والينا
*اسي بنمشي نقايض بالهدم الفينا
*ندي ست الكسرة البدلة
*تلات طرقات تدينا
*بتاع السلطة بالفنيلة الداخلية سلطة بدون ليمون ممكن يدينا
*بتاع العيش بالقميص كيس عيش بدينا
*اما الجزار فالا البنطلون يا والينا
*ولو نسينا الملح
*بعد البنطلون شنو الفضل لينا ؟؟؟
سلك كهربا
ننساك كيف والكلب قال لو قابلك زول شايل لحمتو وخدارو وماشي ساااااي اعلم انو مضيوف و جاي من السوق
والي لقاء
سلك
