يبقي عيب السودان ماكان بس في الكيزان

في السلك

بابكر سلك

*لما بعد الثورة توقف ركشة مشوار ابو عشرة يقول ليك بي اربعين
*يبقي عيب السودان ماكان بس في الكيزان
*لما تمشي زنك اللحمة عجالي وضان
*وداخل عليك رمضان
*وكيلو البقر الصافي يقول ليك باربعمية الف يامان
*يبقي عيب السودان ما كان بس في الكيزان
*لما السكر يطلع وينزل زي ضغط دم الانسان وداخل رمضان الشوال يقارع الالفان
*يبقي عيب السودان ماكان بس في الكيزان
*لما الناس تفعل الاستغلال بعد الاستقلال من الكيزان
*يبقي عيب السودان ماكان بس في الكيزان
*لما بتاع الاسبير رغم نزول الدولار علي كيفو يضاعف سعر الشكمان
* يبقي عيب السودان ماكان بس في الكيزان
*لما الانسان يستغل حاجة اخيه الانسان
*يبقي عيب السودان ماكان بس في الكيزان
*ولما الناس تقصي عرمان ومبارك وعثمان
*يبقي عيب السودان ماكان بس في الكيزان
*ولما ملوة بلح تلحق ميتين الف في شان خاطر رمضان
*يبقي عيب السودان ماكان بس في الكيزان
*ايها الناس
*الثورة ليست قوة احتجاج تسقط حكومة
*الثورة هي قدرة انسان علي تغيير سلوك قديم ليهو زمان
*واستبدالو بسلوك جديد لايستغل فيه الانسان اخيه الانسان
*وفوضي السوق الحاصلة
*وسعر مشوار الركشة القرب يصل المليون ويعمل فاصلة
*لايتناسب مع ثورتنا ولامع صبتنا الفيها لبناء وطن جديد
*شديد ولضيض
*فيهو الزول بحترم الآخر ولو اختلفا في الرأي
*فيهو الصدق شعار للثورة
*فيهو الآخر فوق للراس طالما قناعتو ان الوطن الواحد واسع وشاسع حقنا كلنا
*وانو السعر المناسب من حقنا كلنا
*وانو واننا اخوان كلنا
*ايها الناس
*صبوها في الركشات وماتدوهم اكتر من المعقول
*صبوها في الاسواق واعملوا هاشتاق لاي مرابي او مستغل للناس
*صبوها في الكريزات والهايصات وماتدوهم غير حقهم
*صبوها في دكاكين الاسبيرات
*واقلعوا منهم حقكم
* وادوهم حقهم
*لانو ناس اللولوة ديل بستغلوا لولوة ديك
*وعيييييك
*اتفقوا ما اتفقوا
*ومجرمو الحرب يبيعون لنا بمزاجهم ويحددون اسعار مشاوير ركشاتهم علي كيفهم
*معقول مشوار ركشة اغلي من نفس المشوار بي ترحال؟؟؟
*برهان
*كان غلبتك يامان
*برانا بنحمي ثورتنا ونحدد اسعار شرايتنا وحق مشاويرنا ووزن عيشتنا ورغيفتنا

*ايها الناس
*اخير نصبها
*بدل نقوم ونكبها
*لانو في انتفاضة خمسة وتمنين
*في رمشة عين
*سلمناها لي مجلسين
*لاتفاوض ولاتغالط ولا تلابط
*مجلس سوار الذهب
*ومجلس دكتور الجزولي
*بسرعة سلموها الاتنين
*ونحنا صوتنا بح
*كيف نحمي ثورتنا؟
*كيف نحمي ديمقراطيتنا؟
*واتفقنا
*نعمل ميثاق حماية الديمقراطية
*واختلفنا
*في ميدان الاهلية؟
*ام في جنينة السيد؟
*ام في حوش المولد؟
*ام في المنشية
*وبقي الخلاف
*الي اليوم لم نوقع علي ميثاق حماية الديمقراطية
*ونطت حكومة الحرامية
*وراحت ثورتنا الفتية
*ضاعت احلام شباب وردية
*لما وصلنا المرحلة دية
*وفي المرحلة دية
*كان الشعار الدم بالدم مابنقبل الدية
*ولي اسي لاشفنا دم ولاكرامة بليلة عدسية
*يبقي اسمعوا مني الوصية
*نصبها لمن نضمن كل الاهداف الاساسية والفرعية والثانوية
*ورانا شنو
*بلد شغل مافيها
*شعبها وراهو شنو غير يكون صابيها؟؟؟؟
*ايها الناس
*الحصة وطن
*وماكان في داعي الشرطة تضرب ناس الحركة الوطنية
*والشرطة ذاتها مضربة
*تضرب كيف؟
*غايتو استقالة كردنة تعارضت مع انشاء مستشفي ولادة بالقضارف
*قاموا الجماعه ولدوا بالحبل
*تعالوا ياروشا صبوها معانا
*اخير من الدفاع عن الخيانة
*الفيلم خلاص في آخرو
*ايها الناس
*الحرامية لسه في المناصب القيادية
*ياربي سقوطها ده كاميرا خفية؟؟؟
*ايها الناس
*ان تنصروا الله ينصركم
*اها
*نجي لي شمارات والي الخرتوم
*كان شفت ياوالينا
*كأنها لاسقطت ولا رحنا ولاجينا
*الناس دي كلها قاعده لسه تتلامع في البترينه
*دحين بتزبطوهم لينا
*ولا نقوم نزبط برانا ياوالينا
سلك كهربا
ننساك كيف والكلب قال الثورة زي نار المنقد كانت طولت بتعمل رماد…هزوا الكانون ياشباب فللثورة قانون وشرعية ثورية اذا اتأخر حساب الحرامية
والي لقاء
سلك