أعزموا فيفا وكلموا كاس .. بالتتويج ورفع الكاس !

بدون حجاب

خالد عزالدين

أعزموا فيفا وكلموا كاس .. بالتتويج ورفع الكاس !

• واحد .. اتنين … سرجي مرجي .. انت حكيم ولا تمرجي .. أنا حكيم بداوي الناس من الحمي ووجع الرأس ..
• في حالات من الحمي ووجع الرأس بعالجها الزمن فقط لا غير .. الهلال ممنوع من التتويج بسبب استئناف .. كان واضحا ان الاستئناف سيتم رفضه وسيتم لاحقا تتويج الهلال .. الوقت فقط هو من يحسم هذا التتويج ..
• وهناك عدالة في السماء افضل مليون مرة من عدالة الارض بس كيف نشيل الصبر ! .. قررت لجنة الاستئنافات في الاتحاد السوداني رفض شكوي المريخ ولكن بعد ان انهي الهلال مباراته في الفاشر وفاز بالدوري الممتاز واحتفل وحمل الكاس ولكن بصورة غير رسمية وبكاس غير رسمي .. عدالة السماء اعادت الهلال للفاشر ولمقابلة المريخ نفسه وفي افتتاح الموسم هذه المرة ليحتفل رسميا بالفوز بالدوري مع جمهوره في الفاشر ..
• وفي الفاشر تم كتابة اغرب شكوى في العالم .. بذلت اللجنة المنظمة مجهودا غير عادي لمعرفة ما يريده المريخ من الشكوى بعد ان تمت الاستعانة بعالم في اللغة العربية ودكتور في علم النفس وخبير رياضي فتوصلت اللجنة الى ان المريخ يريد ان يشتكي مريخ الفاشر في مشاركة لاعب اسمه جنية .. الجن الكلكي !!
• بعد ان توصلت اللجنة لهذه المعلومة لم يستغرق وقت حسم الشكوى دقيقتين فأيمن عدار الذي وقع علي الشكوي لا مفوض من رئيس المريخ ولا هو رئيس المريخ لان اللجنة المنظمة تعرف جيدا ان المريخ ليس له رئيس حتي عندما ينتصر علي اتحاد العاصمة تتم تهنئة قريش وعندما ينهزم من الهلال في ابوظبي تتم مهاجمة قريش !
• اهل المريخ يعشقون كاسات (المكاتب) زي عيونهم خصوصا بعد ان تركوا حكاية المحمولة جوا دي ! ذهبوا هذه المرة لكاس ودفعوا مستحقات المحكمة رغم انهم قبل ايام كانوا تحت رحمة سبعة الف دولار فقط تقيهم شر الهبوط لدرجة ادني !! ومن الحب ما قتل !
• قالوا لي كاس .. جنية لعب ضدنا ونحن اتغلبنا .. لكنو ما لعب ضد الهلال والهلال اتعادل .. كيف جنية يلعب ضدنا وما يلعب ضد الهلال .. والفيفا خصم ست نقاط من الهلال ونحن ما فزنا بالدوري .. والقرعة برعاية سوداني ونحن من المسالمة !!! ونحن عايزين نعرف القرعة دي حتكون كيف .. عشان المريخ لو وصيف حيكون في المجموعة (ب) والهلال حيكون في المجموعة (أ) وفي السودان في اختلاف كبير بين الف وباء .. ناس (كاس) قايلين روحهم ما بعرفوا عربي عشان كده ما فهموا عربي (جنية ) ده قاموا استفسروا دكتور شداد وقالو ليهو (انت ناسك ديل عايزين يقولوا شنو بالظبط) شداد قال ليهم المشكلة مافي العربي ! والعربي برئ منهم .. العقده في حكاية الوصيف دي .. ما عايزين في القرعة يقولوا عليهم وصيف !
• كاس اخذت مهلة حتي تعرف المريخ قاصد شنو .. ناس المريخ وعلي طريقة شكوي (عدار) اعترفوا بالخطأ وقاموا بالتصحيح بعد الاستعانة بمعلم لغة عربية جديد !!
• كاس لما فهمت قصد المريخ قالت لي ناس الاتحاد اختاروا ليكم مُحكم .. ناس الاتحاد قالوا ليهم اختاروا انتو .. الموضوع بسييط .. اي مُحكم منكم نحن موافقين !!
• والقرعة يا كاس .. عاااادي جدا اعملوا قرعتكم شنو يعني (اي) مكان (بي) !! والتتويج يا كاس .. هو البطل منو يا شداد ؟ البطل طواااالي الهلال يا كاس .. والله نحن لو ما خائفين الاندية تزعل كان ندي الهلال الكاس قبل الدوري يبدأ وبعدين نشوف البمثل السودان معاه منو ؟! طيب شنو المشكلة يا دكتور .. أدو الهلال الكاس .. احتفلوا زي ما عايزين وبعد تنتهوا من الاحتفالات ردوا علينا .. ونحن بنختار ليكم مُحكم ..
• ونحن ماشين الفاشر .. محتفليين بكاسنا وسط ناسنا .. هذه هي الحقيقة وغيرها مجرد جدال .. القرعة انتهت .. سوداني راعي الدوري الممتاز .. الملاعب الناقل الرسمي والوحيد .. الهلال بطلا للممتاز والتتويج بالفاشر ..
• مريخ الفاشر محظوظ جدا .. لعب اخر مباراة ضد الهلال في الموسم الماضي واول مباراة ضد الهلال هذا الموسم .. وفي اندية غير محظوظة زي اهلي الخرطوم .. موسم كامل ما قابل الهلال وعليه الاجتهاد هذه المرة ليقابل الهلال في دوري النخبة .. مسكين محمود صالح من بقي رئيس ما دخل استاد الهلال في مباراة رسمية !!
• ثلاثة اجانب في الهلال سيتم اختيار اثنين منهم في مباراة اليوم .. اي لاعب يغيب خسارة علي الهلال .. توقيت القرار خاطئ جدا ولكنه واقع وسيكون لزاما علي المدرب ان يتعامل معه .. جمهور الهلال لم يشاهد المدافع النيجيري حتي الان .. سنبقي في حالة شوق لمشاهدة الثلاثي سويا في دوري الابطال ..
• وفي دوري العرب خرج الاهلي والترجي واصبحت البطولة مثل الكونفدرالية الاتحاد السكندري ومولودية الجزائر والمريخ السوداني !! وسوداني الراعي الرسمي للدوري الممتاز الازرق …